20歲做老闆 – 高宗舜

阿Kos中學就受到爸爸嘅影響，鍾意咗飲咖啡，無論喺香港定外國，都會成日去蒲café，特別係韓國，當地café嘅設計同環境都好正，所以開間屬於自己嘅café，一直都係佢嘅心願。

今次呢輯相，就係喺阿Kos間café度影嘅，入面環境都唔錯架，仲以香港舊式士多做主題，入面仲擺咗好多懷舊嘅擺設。雖然阿Kos都好明白，90後對呢啲舊香港文化，可能冇咩感覺，但係佢覺得如果呢啲特色嘢真係冇哂，其實都幾可惜，所以café 用呢個概念嚟做主題，希望可以喚起顧客一啲遺忘咗嘅記憶。

自己開舖，做咩都要親力親為，由諗名、度主題、設計、入貨同宣傳都一腳踢，阿Kos認為係一次難忘嘅經驗，因為未落手做過，都唔知所有工作原來都係唔簡單，真係要付出過，先會做到自己想要嘅效果。

不過阿Kos強調，自己唔係富二代，屋企人肯出錢出力支持佢，係因為佢哋都認同，應該趁後生去實現自己嘅夢想，唔好等老咗先嚟後悔！

阿Kos讀緊廣告設計，亦對香港廣告市場嘅前景充滿信心，對品牌設計方面仲寧舍有興趣，希望第日可以向呢方面發展。咁如果遲啲café開分店，仲可以自己計計埋個商標囉！

嚟到2015年，「學界男女神」都要增值吓，唔止要睇盡中學界靚人，仲要殺入大專界！

所以無論你係讀緊中學定大專，只要你認為自己或者身邊嘅同學仔有呢個資格，都可以自薦或推薦俾我哋! 由今期開始，成功自薦或推薦嘅話，仲有嘢送！

參加方法好簡單，只要將想推薦嘅同學，或者自薦勇士嘅facebook ，tag喺下面 “Comment”嘅位置；再將參加者及提名人嘅姓名、年齡、就讀學校、個人專長、聯絡電話，仲有一個月內影嘅近照兩張(全身及正面)，喺Sunday Kiss facebook專頁 inbox或電郵到[email protected]俾我哋；如果成功通過編輯部審核，成為「學界男女神」，自薦或推薦者就可以得到由遵理學校送出嘅「$300課程現金券」。

「學界男女神」，等緊你嚟挑戰!

撰文: Joanne

攝影: Clay Lam

拍攝: Chiu

剪接: Candy

Hair+Makeup: EM Makeup

提供場地: 山脈川流

鳴謝:

及

贊助獎品

如欲率先接收資訊，請讚好我們的FB專頁並於「已讚好」選單設定「搶先看」，多謝支持。