「愛」不簡單

專欄

廣告

前幾日打開Facebook,見到有人tag我個名,原來有位媽咪Ammie好想喺生今胎之前留影但約唔到攝影師,因為佢預產期係10月5日。於是我就同佢聯絡,了解過後,原來有朋友幫佢一家影咗家庭照,但就無影大肚相,Ammie好想影輯相留念,於是我應承替佢拍攝。

未講我哋之間既故事之前,等我比大家一個估下,你哋估下以下呢位咁醒神既Ammie媽媽佢今胎係第幾胎?

1?唔係!

2?唔係!

3?唔係喎!

4?都唔係喎!

5?錯!都唔係!

6?唔係咯!

好!開估!答案係⋯⋯ 7

 

係咪好Amazing呢?

講返轉頭,我記得我係2011年認識Ammie,當時已經有5位小朋友,我都呆咗!因為我阿媽有6兄弟姐妹(以前個年代不足為奇),但呢個年代有5個小朋友,真係好罕有,我識既朋友甚至顧客當中,真係無囉!記得幫佢哋拍攝嗰日仲係父親節,所以我哋大家都好記得對方!過咗一排,佢同我講有咗第6個!仲話再會搵我影相⋯⋯當時,我都覺得好Amazing!之前唔係太熟,我每次接觸佢哋只會諗:其實6個小朋友係點湊呢?我一個都咁多嘢攪,6個等於6倍!!究竟係點湊架呢?

 

續下頁

上年我終於去咗DR.Chan度整牙,仲見返我之前嘅作品,原來佢曬咗好多好多張同屋企人嘅合照,放咗係醫務所。記得喺洗牙嘅時候,佢好細心咁俾個Headphone我聽住音樂,等我聽唔到令人好心煩嘅儀器聲;仲俾咗一支鐡柱狀嘅嘢我揸住(應該係同電流有關嘅儀器),佢話會令我減少麻痺嘅感覺。經過DR. Chan嘅治療後,我順利洗完牙、清理好牙肉發炎嘅地方,仲見識咗呢位爸爸嘅超級細心。

睇完牙半年左右,Ammie又有一個令我好震撼嘅消息傳來,就係,懷有依家嘅第7胎!我滿腦子再一次出現好多問題,嘩!7個?7個點湊?佢哋之前好似換大咗架車,依家仲夠位咩?好多好多好多問題,又係我個腦裡面出現!當然!我都無忘喜悅!能夠認識到佢哋,真係好榮幸!你話,人生有幾多個朋友會有7個仔女?:D

 

拍攝當日我哋有一段小插曲,由於呢個拍攝嚟得太突然,地點同服裝都係到前一日先決定,到當日再喺what’s app提醒佢服裝同化妝,成半個鐘佢都無回覆,然後我突然收到佢傳嚟:oh…no! Out Already!

 

我仲同我奶奶講:「噢!要影相個客BB突然出咗世!」腦裡仲不停幻想佢喺屋企臨盆嘅畫面!

 

半小時過後,我收到佢What’s app一張合照相,寫住「That’s what we wear today!」原來佢之前係話佢已經出咗門口!哈哈⋯⋯真係虛驚一場!

 

續下頁

主角終於到達咗我影樓,。認真講,呢次真係我第一次!以往影既媽媽,通常係32-36週,會有化妝師幫佢整造型,仲有安排好多道具同場景配合。但今次,Ammie仲有一星期就生、無化妝、無特別打扮、而DR. Chan就係Casual Tee加牛仔褲。似乎佢哋無乜特別要求!但對我黎講,我真係好想幫佢哋留一個紀念!好彩!我們中間有主有愛有信任!

 

臨近影完,我問佢哋有咩心願,先發現原來Ammie想影一張裸露(遮重要部位)嘅大肚相。好!無問題!我二話不說走去拉閘,免得突然有人闖入(但佢哋異口同聲話:「唔洗喇!」)就喺我SET燈期間,佢哋已經夾好點樣去擺啲甫士,我聽到Ammie話:「嗱,擺好POSE,跟住你幫我除衫咪得囉!好易啫!」DR.Chan當然係照跟!好勁!佢哋九秒九完成好POSE同除衫,而且完全無尷尬嘅感覺,最勁係,一啲都無穿崩!

 

拍攝期間,我終於知道佢哋點湊6個小朋友,具體細節唔重要,最重要係,佢哋之間既愛同默契

 

其實唔好話要生7個,生1個2個都有九幾萬樣嘢要考慮!(雖然好多人都會覺得最重要係錢!當然,呢個係其中一項)但我覺得,最重要始終係有「愛」,先至可以能夠做到呢件事!我好欣賞同羡慕佢哋之間互相信任、包容、愛護,雖然今次拍攝大家都無乜準備,就係因為佢哋既愛(一個簡單既眼神同笑容),已令相片變得很美!

 

在此祝Ammie生產順利!期待7公主的來臨!繼續祝福你們!:)

PS:鳴謝Ammie給我分享相片同寫呢篇分享!