【清熱兼消脂】 紫背天葵 茶

其實買左包紫背天葵都有個幾月，不過當時都唔係好熱，所以都好似未啱時候煲嚟飲。依幾日都真係開始熱熱地，所以就可以拎出嚟煲，可以清熱、消暑兼消脂啦！

紫背天葵係大澳嘅特產，所以行過每間小店都一定可以買到現成一支支嘅飲品或者材料。我就緊係買幾包材料返屋企，咁就可以慢慢飲啦~

一包份量都足夠一次(約四至五杯)，入面除左紫背天葵之外，仲有幾粒山渣，我地再加少少冰糖就煲到啦~

紫背天葵其實係秋海棠科無莖草本植物，因嫩莖葉富含鈣、鐵等，營養價值較高，所以有清熱解毒及生津解渴功效。再配埋山楂一齊煲，就可以消脂消滯啦~

將紫背天葵及山楂浸洗一陣~

煲內放約十碗水~

接下頁

然後加入材料(冰糖除外)~

待水滾起時，轉慢火加蓋煲15分鐘~

然後加入冰糖再煲10分鐘~

焗多5分鐘，之後開蓋隔渣，話咁快就飲得啦~

酸酸甜甜，小小豬話有啲似利賓納。不過又真係唔錯，幾啱熱熱地嘅天氣飲，我個人覺得雪凍仲正，完全係解暑首選呀！

除左大澳之外，有朋友仔話曾經見過啲大間少少嘅藥材店都有得買，所以未去大澳上貨時，可以去藥材店搵搵呀！

溫馨提示：由於紫背天葵就比較性涼，所以怕寒涼嘅人就不宜多飲用，要留意自己體質呀！

BY 小小豬的成長日誌