位於Mega Box的9樓，我哋做好一切準備，實行今晚要玩盡佢…
不過未玩未食之前就俾門口呢個「百獸王」展覽吸引咗去，真係超童年回憶呀，我細個唯一一隻超合金合體機械人，估唔到今日一把年紀可以俾我撞番佢
好在只係展覽全部都係非賣品，如果唔係我驚我忍唔住會買哂佢哋番屋企
不過俾Dreamworks重新推出，唔多唔少都冇咗個陣東洋味
睇到我都唔捨得走，不過太肚餓點都要入去食D嘢先，點知一入門口就到佢哋兩個嘢俾Pokemon吸引番，今次到佢哋唔捨得走
Comic Park & Cafe 以多款不同動漫角色做主題，差唔多每季定期都會更換不同人物角色，保持新鮮感！
Collection Wall上的風褸同T恤都好有型！
中間穿過各款遊戲設施，忍住手唔玩得住，要醫咗個肚先！
買餐方式都係先到櫃枱前點選菜單，付款後給你提示器，提示器響就到取餐區取餐！
取餐區有齊各樣餐區調味料，當然兒童餐具都一定唔少得
周圍都貼上唔同嘅動漫人物牆紙！柴犬Rody並非我年代，冇咩親切感！
芝士焗龍蝦(原隻)跟意粉 $198
– 蟹捧什果沙律
– 南瓜忌廉粟米湯
– 迷你忌廉泡芙
– 凍飲一杯
我哋坐喺四人梳化座好自在好舒服！今晚又唔多人，可以拉埋隔離D櫈嚟攞吓嘢！
意式辣肉腸Pizza 配餐湯及凍飲 $93
Size唔算大，我估得9吋咁上下，餅底用咗薄餅底咬落好脆口
最後呢碟西西里鮮茄牛肉丸意粉 $68
我覺得最好食，肉丸最好哨最重口味！
店內仲提供埋Wifi，真係唔駛驚用哂D Data！
話咁快就食完，其實有咁多嘢玩真係好難專心食，預咗同佢哋一陣食宵夜把啦！
喺餐廳放咗兩部大Tablet，又玩食鬼又玩Angry Bird，完全免費！真係唔駛唱金幣掉彩虹都得喇…
打打吓機呀芊又自己識開個Youtube嚟睇喎，小朋友真係可以發揮無限潛能
喺餐廳對出有個百獸王Backdrop，佢哋真係扮得幾似模似樣！
番去門口可以唱金幣玩，不過原來除咗掉彩虹之外要金幣，其他遊戲設施只需要充值卡(會員卡)扣數就可以，$100得65個，$500就有550個，當然俾得多儲值越多
掉彩虹又俾哥掉中個細獎喎！超開心去揀禮品，點知佢換咗個鉄人28八達通套，喂！全屋都係啦已經，要咁多做咩！
Photo byCANON 5D Mark IV,Len|EF 24-70mm f2.8L II USM
想跟我去體驗其他活動，快D報名親子團，同埋留意專頁公佈詳情啦！
http://goo.gl/forms/CNZMEPoMIWkouK8o2
呀劍評分:8分
呀劍評語:真係可以食完個Lunch跟手玩到夜晚嗰餐再食過! 食物質素唔算話好好, 但係加埋有得玩俾小朋友解禁玩吓都OK, 不過當然一家餐廳最重要都係食物質素。另外都要有足夠彈藥先好嚟啦, 所以我都係少去為妙!
Comic Park & Cafe 簡介
全港首間動漫樂園及主題餐廳「Comic Park & Cafe」將於本月初正式開幕！主題樂園位於九龍灣 Megabox， 佔地 7,000 呎，分三大主題區域，包括發售期間限定產品的精品店、設有 30 多部室內遊戲的動感玩樂專區， 以及以動漫卡通作為食物主題的 Cafe。主題包括：鐵甲萬能俠、幪面超人、鹹蛋超人、Rody 及柴犬等等。
地址
香港九龍九龍灣宏照道 38 號 Megabox 9 樓 L9-23 舖
營業時間
星期一至五: 11:00-21:30 星期六至日: 10:00-22:00
電話
2458 6032
(以上資料更新至文章當日)
