九龍城親子遊

【好去處】 九龍城親子遊 一日遊懶人包

專欄

廣告

平時聽d大人講話要去九龍城食好嘢,究竟九龍城有冇嘢啱小朋友玩同食呢?不如等我俾個 九龍城親子遊 一日遊懶人包,包你玩足一日,大人細路都話正!

賈炳達道公園Carpenter Road Park /九龍寨城公園Kowloon Walled City Park

我哋先在太子道東近警察遊樂會乘搭12A巴士去到福佬村道落車, 然後向公園方向行大約10分鐘, 見到KCP九龍城廣場同Aeon就到啦! 公園就喺隔離噢!

其實九龍寨城公園就喺賈炳達道公園裡面, 所以去一個地方就可以滿足兩個願望!

賈炳達道公園同一般公園相約, 仲有一個緩跑徑同埋單車徑

開始玩之前先同小朋友去個洗手間先! 但係原來公園大到有3個洗手間咁多

沿路行上少少斜坡見到有些岩石特色的裝置! 行上去呢條天橋居高臨下望風景先

另一邊亦有幾個用小石堆砌的景點, 我驟眼睇覺得好似係英文字咁, 唔知有咩意思呢?

公園地方好大, 人又唔多, 鍾意點玩都得!
見到九龍寨城公園入口, 雖然未行完賈炳達道公園, 但係都行到嚟呢度就順便入去行吓!

一入到去已經被整個充滿中國色彩的環境包圍住!

沿途見到的建築物全都是亭台樓閣

整個九龍寨城公園有6個出入口, 分別係乾門、北門、艮門、東門、巽門、南門

園內一草一木一磚一瓦都充滿特別, 就連坑渠蓋都咁靚!

唔講唔知道下圖是香港拍的, 感覺也蠻像國內風景!

過咗「艮門」又見到一個洗手間, 但係呢個超有中國建築特色! 全係瓦片屋頂

呢個地方叫「童樂苑」但係大家唔好誤會, 並唔係真係有遊樂設施

呢座叫「邀山樓」但係上層是禁止上去的!

這裡放有十二生肖石像, 每一個都好特別, 有的好寫實像真, 有的只係表達咗那生肖個意境特色

穿過「童樂苑」就見到九龍寨城公園展覽館, 估唔到裡面都有驚喜!!!

其實展覽館設有導賞團, 不過我哋沒有參與, 只想隨便逛逛!

兩個嘢一入嚟就坐咗喺張木櫈度! (嘩嗰刻我諗會唔會係古董嚟架! 一陣坐爛咗打一世工都賠唔起!)

穿過屏風有幾楝磚屋,除咗左手邊的其他都係展覽館

二號展覽館都係介紹城內舊貌-橫街窄巷,三號展覽館介紹家庭工業,而四號則介紹天台的日與夜

驟眼望過去佢哋兩個好似置身在相片中的天台

五及六號展覽館是最大的,裡面都是一些互動展示

剩係呢度佢哋兩個都玩咗成半粒鐘!真係燒時間好地方,另外最重要係這些展覽館內都有冷氣…大熱天時入嚟解吓暑係必須的!

行番出嚟見到有個小食亭!雖然叫「小」食亭,但係都真係乜都有!五臟俱全

大部份懷舊玩具小食,甚至老闆娘自己親手醃製嘅食品都有!

小食亭內真係好似一個寶庫咁,要咩有咩!

老闆娘俾小朋友自己拎竹蜻蜓去玩(其實要$5一個),真係超好人!

佢哋玩得開開心心之際,我同老婆梗係八卦吓小食亭有咩食買,我買咗支麥芽糖夾餅$5(老闆娘即時整㗎!),芊芊食得幾滋味!哥哥就冇興趣,只係掛住玩隻竹蜻蜓

跟住再買杯羅漢果水($10)俾佢哋飲,如果唔係真係玩到中暑!幸好今日天氣熱但係都多雲

因為佢哋兩個玩極都唔走嘅關係(因為$5一隻竹蜻蜓太貴我唔肯買俾佢哋,有得免費玩就俾佢哋玩多陣),所以同老闆娘傾傾吓計,佢再推介我哋飲杯甘筍汁,佢話係「鎮店之寶」!

嘩佢講到咁唔試吓點得呀!價值$16嘅甘筍汁有幾巴閉,老闆娘即刻拎出紅蘿蔔切開再搾汁

續下頁

呢個釀米醋來頭都唔小!佢話係古法釀,完全唔同出面超巿買到嘅,佢話嗰D全部用醋精整,但係佢話呢個係佢自家純釀製出嚟!

呢度全部製品都係源自新界出品,唔好以為係日本貨,所以係真真正正嘅本土貨!梗係要支持啦(之後我哋仲買咗碗豬腳姜食$25)

好啦!「鎮店之寶甘筍汁」登場啦,成杯飲品個色真係好假,好似水彩咁橙色!因為紅蘿蔔喺雪櫃拎出嚟,所以搾出嚟嘅甘筍汁都好清涼!

飲落去…先講真係好好飲,感覺好清甜好新鮮,絕對冇後加工加糖加水溝稀!飲完一啖要即刻飲第二啖!果然名不虛傳(飲緊嘅時侯仲有街坊專程嚟飲番杯)

相信呢個係以前嘅遺址

其實賈炳達道公園都有好多草地,雖然唔係好大好寛廣,但係因為唔係太多人,所以其實都好足夠,如果近近地都可以嚟呢度野餐

最後佢哋喺度玩咗陣瀡滑梯,跟住就離開公園,去一條馬路之隔嘅「石屋家園」嘆下午茶

賈炳達道公園 簡介

公園內設有洗手間其他設施包括1條單車徑、1個兒童遊樂場、1個長者健身站、1個7人硬地足球場、4個籃球場和2個排球場

地址

九龍城賈炳達道

開放時間

24小時

========================================================================

九龍寨公園簡介

九龍寨城公園的原址是九龍寨城,是香港近代歷史其中一個最重要的遺蹟。遊覽其中,除了可以好好欣賞美景,還能緬懷上世紀的老香港風貌。

地址

九龍九龍城東正道

開放時間

每日上午六時半至晚上十一時

九龍公園展覽館開放時間

每日上午十時至下午六時 (逢星期三休館)

電話

2716 9962

下頁:侯王古廟

侯王古廟Hau Wong Temple
喺賈炳達道公園東頭村道出口過對面馬路就見到侯王古廟

侯王古廟 簡介

雖然歷史上對侯王的出處未有定案,但一般認為侯王乃南宋國舅楊亮節,因生前封「侯」,死後封「王」,故稱為「侯王」。傳說,南宋末代皇帝宋帝昺,曾在楊亮節的襄助下南逃至九龍,楊亮節護駕有功,世人敬其忠義,所以建廟紀念。侯王廟採用三幢式建築設計,分別為正殿、羅漢堂、佛光堂及龍華堂,正殿供奉侯王像。而廟內有刻上「侯王座前」四字的鐵香爐、還有以一筆寫成的「鵝」字及「鶴」字的石刻等,最值得欣賞。廟宇曾於2005年重新整修,翻新後不但重現昔日的古雅風采,而且還新增許願角、添褔延壽池等設施。

歷史建築級別

一級歷史建築

落成年份

1730年


地址

九龍九龍城聯合道及東頭村道交界

開放時間

每日上午八時至下午五時

交通

從港鐵樂富站B出口,沿聯合道依路牌指示,步行10分鐘前往

電話

2336 0375

網址

www.ctc.org.hk

░░░░░░░░░░░░░░░░░░░░░░░░░░░░░░░░░░░░░░░░░░░░░░░

石屋家園Stonehouses Family Garden

由侯王古廟行過對面馬路就係石屋家園!

穿過鐵閘右手邊就係Cafe 石屋家園冰室!

呢度都有洗手間, 裡面都尚算乾淨! 不過今日嚟好多蚊

行到過嚟呢邊有個小迷宮(平面), 個名叫做「明陣迷宮」,兩個天真的小朋友已經跟住條路跑嚟跑去!

落番去之後先去探知中心參觀, 中心同冰室係互通的, 可以參觀完就坐低嘆茶

就連入口呢扇門都模彷以前的古舊木門, 用門柵開關(可能你都唔知咩叫門柵吧!)

這裡有個小房間模彷古老廚房灶頭俾人影吓相!

下橧主要介紹九龍城的中式建築, 行到上去上層繼續參觀

上層仍舊介紹九龍城的古與今! 以及被活化後的這棟石屋家園

這裡放着些展板及短片介紹!

呢邊放咗盒波子棋, 七巧板同埋康樂棋俾人玩, 好在佢盒波子棋唔係新式膠盒嗰隻, 如果唔係真係一D懷舊味道都冇

上層空間唔大, 另一邊已經有樓梯可以行番落去冰室!

石屋家園 簡介

屋家園現址見證著上世紀四、五十年代寮屋區的建築特色,其居住模式更反映二次大戰後香港基層居民的生活狀況。石屋的建築沿用傳統中式建築特色,內部以本建築結構為主,如屋樑及一樓層板俱用木製,外牆以石塊及磚塊砌成,屋頂則為金字型上蓋。配以中式筒瓦和板瓦,以及大門的木鎖及石插孔等,均為當時的建築特色。

地址

九龍 聯合道133號石屋家園

交通

港鐵: 樂富港鐵站B出口

巴士: 1, 10, 11D, 11K, 75X, 7B, 85, 85A, 85B, 113,891

小巴: 13, 39M, 66S


文物探知中心

週二至六 10:00-17:30; 週日12:00-17:30; 逢週一休館


石屋家園導賞服務 (導賞服務須預先報 名登記,上限為25人。)

週二至六 10:30 及 14:30; 週日 下午 2:30

費用:全免

下頁:石屋咖啡冰室

石屋咖啡冰室Stone Houses Cafe

 

冰室設計簡單, 陳列好多懷舊物品! 枱櫈都放得有點密, 所以久缺空間感, 若不是坐梳化位置, 都會有D逼同唔舒服!

如果以前細個儲低D餅罐我都可以拎出嚟做博物館!

呢款鐵單車我細個都有踩過, 真係不出一個星期就會生锈!! 哈哈

以前呢款電風扇真係好恐怖, 咁大條罅隻手指一攞埋去都冇咗….


今日星期日人都算幾多, 不過如果唔怕熱都可以坐露天位!

我叫咗個全日早餐同橙汁凍朱古力!

價錢唔算貴, 但係見到食物質素就即刻覺得唔算平….

杯凍朱古力好飲! 夠味, 超濃! 哥哥妹妹爭住飲

同枱的姐姐叫咗兩杯咖啡, 佢哋好好人俾我影番張相, 個兔仔同熊仔拉花真係好靚, 唔知飲落味道如何(So far見佢哋飲完冇話難飲又冇話好好飲)

最後由冰室正門離開, 完成我哋九龍城一日遊既行程!!

地址

香港九龍聯合道133號. 34號屋地下

交通

港鐵: 樂富港鐵站B出口

巴士: 1, 10, 11D, 11K, 75X, 7B, 85, 85A, 85B, 113,891

小巴: 13, 39M, 66S

營業時間

星期二至日: 08:00–18:00 星期一休息


電話

2325 0131

付款方式

現金

九龍城廣場Kowloon City Plaza

近近地可以行番過嚟九龍城廣場濕平吓!或者到九龍城捐㝫捐罅尋找隱世美食

有陣時都會有好多免費活動於商場內舉行,大家可以留意番當日的最新資訊

九龍城廣場 簡介

(英文:Kowloon City Plaza,簡稱KCP)是香港的一個購物商場,佔地約63,700方呎,於1993年12月落成,後來商場業權多次易手。


地址

九龍城賈炳達道128號

營業時間

10:00am-10:00pm

電話

2718 6320

網頁

http://www.kcp.hk


電郵

[email protected]

░░░░░░░░░░░░░░░░░░░░░░░░░░░░░░░░░░░░░░░░░░░░░░░

Smile Yogurt & Dessert Bar

行到攰攰哋又想試吓食好西,可以試吓呢度!佢哋嘅Froyo真係無得頂

食完你唔會覺得有種甜到「流」嘅感覺!我鍾意佢唔會超甜同埋唔會只係食到冰味嘅雪榚

店內環境都好正!天氣咁熱,真係幾個Friends入嚟坐吓Hea吓都無得輸

佢仲有蛋榚買!如果大家朋友屋企人生日剩係識得買美心東海堂,咁就要試吓啦

係咪睇相都已經…..

地址

九龍城獅子石道65號地下

營業時間

星期一至日:13:00-23:00


電話

2382 6669

付款方式

現金

░░░░░░░░░░░░░░░░░░░░░░░░░░░░░░░░░░░░░░░░░░░░░░░

 

義香荳腐食品
食完西式梗係再食埋中式啦,最後嚟到呢家老字號豆花店「義香」食番碗豆花!

價錢正常, 唔貴合理!! 我哋快快咁叫咗兩碗凍豆花, 一杯黑豆漿同埋一碟炸三寶

靚姐豆花嚟啦! 佢冇落糖水, 要自行落黃糖! 豆花唔夠大埔滑, 仲有D”鞋”咀

炸三寶分別係炸豆卜、素雞同埋雲吞, 不過都係粉多過肉, 唔夠脆, 好似一早炸起咁!

最後覺得有點熱氣都係叫多杯黑豆漿飲! 冇豆味, 甜度OK, 還可以!

地址

九龍城衙前塱道74號地下

營業時間

星期一至日: 11:00-20:00


電話

2382 5006

付款方式

現金

░░░░░░░░░░░░░░░░░░░░░░░░░░░░░░░░░░░░░░░░░░░░░░░
Photo byCANON 5D Mark III,Len|EF 24-70mm f/2.8L USM

想跟我去體驗其他活動,快D報名親子團,同埋留意專頁公佈詳情啦!

http://goo.gl/forms/CNZMEPoMIWkouK8o2

呀劍評分:10分

呀劍評語:超爽嘅九龍城一日遊!快D介紹俾嗰D剩係識得跟住地鐵沿線玩嘅朋友仔啦

(以上資料更新至文章當日)