親子民宿

【台灣親子遊】花蓮親子民宿大推薦 Part 2

專欄

廣告

上次介紹完花蓮既「芬奇斯親子民宿」,迪迪媽仲有入住另一間「涵閣親子民宿」,木製長長既滑梯絕對不能錯過,連迪迪爸都大讚好好玩!

「涵閣親子民宿」位於花蓮既吉安鄉,距離巿中心會比之前介紹既遠少少,不過其實如果Call的士出巿中心,一樣都係TWD100,所以迪迪媽覺得都無咩所謂,唯獨係當地既的士司機,似乎對民宿地點既路段唔太熟悉,回程試過遇上幾次司機行錯路既情況,所以可以上網既手機好重要,有咩事都可以GPS導航一下嘛😅

轉民宿當日,迪迪媽直接安排當日包車,咁就可以放埋行李上車,遊山玩水完仲可以直接到達,非常方便!

到達「涵閣親子民宿」,就見到民宿主人已經係門口迎接,地下一層大半都係公共空間,有檯櫈提供,旁邊係茶水間,有雪櫃、奶瓶消毒器、熱水、餐具、杯,仲有咖啡、奶茶、茶包等等。

而再行入多少少,就會見到決明子沙池同小朋友玩既電動車,仲有塗鴉牆,沿路直入可以見到一道門,原來係玩電動車既小型車場,鍾意揸車車既小朋友可以入去玩返幾轉!

不過要注意所有公共空間既遊樂設施,都有開放時間,因為其中一間親子客房就係地下果層,太早或太夜玩影響到人就唔好啦!

民宿全棟有4層,1至3層都係客房,頂層就係民宿主人一家既居所。

迪迪媽一家既房間係「303 直升機」3人客房,故名思義就係3樓,爬樓梯搬行李上去既苦差交左比迪迪爸,真係辛苦爸爸了👨🏻💦

一開房門,嘩!粉紅色既房間,間房細過之前果間一半既😅,不過上次係4人房,而今次係3人,細少少情有可原啦,而間房最吸睛既一定係條木製長滑梯,2姐妹見到就已經按奈不住衝左去玩了,成條滑梯估計至少2米長,非常滑,爬上去瀡落黎感覺好快好刺激,妹妹開頭驚驚唔太敢玩,不過玩耐左就瀡到不亦樂乎,同家姐2個玩到拆樓咁🤣🤣🤣除左滑梯,仲有一組工程組合類玩具!

呢間房一樣可以拼床,一張特大雙人床拼單人床,同之前一間相比,拼床後好似差不多大,足夠我地一家四口,不過拼床後有部分床會係滑梯底下,可能就比較有壓迫感了!

房間內有雪櫃、風筒、衣架、樽裝水、紙杯、毛巾、牙膏牙刷、兒童廁板等提供,而浴盆櫈仔就入住時係地下茶水間果邊帶上去。

房間都有電視機,但唔知點解,迪迪媽唔識用,㩒極都搞唔掂,最後要迪迪爸相助先可以睇電視,唔知係我蠢定部電視機難用呢?!

整體黎講,其實都唔錯,不過有幾樣野要提提你!

第一樣,條滑梯係的確幾好玩,但製作出黎既聲音真係唔細,我大女每次行上樓梯都嘭嘭聲,瀡落黎又因爲太好玩太刺激,笑到勁大聲,嘈到一個點😵仲要玩極唔肯訓,結果樓下頂唔順同民宿主人投訴🤣,家長們要衡量下好玩同聲浪既問題了!

第二樣,民宿條樓梯都幾長,每層最後一級都特別高少少,原因係民宿主人將每層既地板做左少少隔音設備,雖然係相當貼心既設計,但小朋友上落要特別小心😅

第三樣,迪迪媽覺得無論你想揀邊間房都好,都唔建議選擇地下果間,因為就算小朋友肯聽聽話話係開放時間先玩,但公共空間仍然開放比其他人食飯、洗碗等,多少會製造到少少聲音妨擾你休息,唯一好處就係方便,搬行李同使用公共空間內既設施都唔洗上落樓梯了!

今次既民宿體驗就分享住咁多先,下次再同大家分享下花蓮既玩樂景點,密切留意啦!