五款家常湯水食譜 孕媽媽推介

家常湯水1:杜仲續斷巴戟湯

孕中期腰痛總係難免，係時候要補腰補肝腎先得啦！杜仲續斷巴戟湯除咗補補肝腎之外，亦有安胎之效，不過這款家常湯水，就係苦啲咁囉。

杜仲: 有補肝腎、安胎之效
巴戟: 強健筋骨
續斷: 同樣有助補肝腎
黑豆: 美髮保髮之選

材料：
杜仲、巴戟、續斷、黑豆、豬骨、生薑、黑棗

講到安胎，其實桑寄生蓮子蛋茶都好正架，滋潤安神之餘又益肝腎，以前做女時有經痛，媽咪都會煲俾我飲。

家常湯水2:粟米栗子淮山瘦肉湯

呢款湯四季皆宜，不單止啱晒一家老少，就連孕媽都一樣啱飲。特別適合脾胃虛弱、腹瀉、腎虛腰痛、夜尿頻嘅人仕飲用添架。

栗子: 又被稱為腎之果，含豐富葉酸，啱晒孕媽媽
淮山: 健脾益胃，補氣血兼補腰腎

材料：
粟米、栗子、淮山、紅棗、瘦肉/豬腱

家常湯水3:花膠螺頭舒壓安眠湯

孕後期開始訓得有啲差，一晚醒幾次，攪到個人又好攰，有時仲有少少暈添。
係時候煲返啲安神舒壓湯水幫助入眠，同時要繼續好好補充鈣質、鐵質等多種營養，為日後嘅母乳路做好建設！

螺頭：滋陰補腎、清熱去濕
淮山：補脾腎、改善頭暈 及 改善血氣虛弱
杞子、圓肉： 有助改善睡眠質素

材料：
急凍響螺頭、花膠、淮山、圓肉、杞子、豬腱

家常湯水4:蓮藕章魚黑豆湯

蓮藕章魚黑豆湯不單含豐富營養，仲有補血養顏之效，而且對預防骨質疏鬆亦好有幫助。母乳媽媽飲仲有助泌乳，可幫助催乳及上奶添。

材料：
章魚、蓮藕、黑豆、去核紅棗、瘦肉/豬腱、生薑

家常湯水5:蓮藕花生排骨湯

孕後期都啱飲，而且不寒不燥，一家大細都可以一齊飲。最重要係有助補血，同時亦健脾益胃。
母乳媽媽飲咗仲有助催乳添架，可以話係一舉幾得之選。

材料：
蓮藕、花生、排骨、紫花果