迪士尼花蛋節

小小豬反轉迪士尼花蛋節

專欄

廣告

三月十九對我嚟講都係一個重要日子,因為係我地拍拖念紀日嘛!正當我地諗緊點慶祝之際,就收到邀請入迪士尼反轉花蛋節,所以我地嘅慶祝活動就係陪小小豬入園玩餐飽啦!

 

其實我之前因為嚟做個偽記者,所以基本上都已經知道晒啲花蛋位置。不過為左令小小豬有嗰一份滿足感,所以我都冇乜點提佢,等佢自己去享受尋找花蛋嘅樂趣。

 

一入到場小小豬就已經急不及待拎住一支筆同一張地圖去計劃佢嘅尋花蛋行動,小小豬話每見到一隻花蛋就圈住佢,咁就一定可以搵齊啦~

 

第一站就當然係去美國小鎮大街,第一隻發現嘅就係白雪雪嘅醫神~

 

行前少少就可以見到阿樂同阿愁啦~

 

當然唔少得係大街嘅中央嘅小花槽中見到一眾主角人物呀~

續下頁

毛毛同大眼就係大街街尾等大家呀~

 

搵完大街嘅花蛋之後,小小豬就化身成為小小動畫師,學畫勞蘇呀~

 

一向完全冇天份嘅小小豬畫功都幾驚嚇,真係完全冇期望佢會畫得好好,不過見佢都好似幾專心咁,所以….都放過佢啦~

 

姐姐好用心咁一步步教小朋友畫,只怪小小豬唔係畫畫材料,所以佢個變種勞蘇就唔同大家分享,都係姐姐嗰張靚好多~

 

原本打算去搵醫神,點知話咁快就截左龍,同唔到醫神影相雖然有啲失望,不過一入到幻想世界情況就唔同晒,因為可以同蘇菲亞小公主影相呀!

 

邊個話只係女仔先可以鐘意小公主,依隻小小豬都不知幾鐘意,攬到小公主實一實,走嘅時候都不知幾唔捨得呀~

續下頁

同小公主影完相之後,小小豬又繼續搵花蛋,首先搵到嘅就係POOH POOH一家~

 

之後又見到小白呀~

最難搵嘅係….

小小豬留心一望,指住城堡上大叫,原來佢搵到奇妙仙子呀~

 

依個小仙子可以話係最難搵嘅,所以都要俾個叻叻佢呀~

 

之後係3D劇場前又搵到魔法師米奇呀~

 

行左一個圈,小小豬突然又向轉轉杯方向跑過去,原來佢搵到愛麗絲同佢嘅朋友呀~

 

最後係城堡旁邊就發現七個小矮人呀~

續下頁

哈哈哈…雖然我地係幻想世界都行左好幾轉,但都總算成功搵齊,小小豬真係搵得好認真,做足功課呀~

 

我地就繼續轉戰探險世界,係水入面搵到多莉同MO仔,依個時候小小豬又攪笑,佢話點解啲蛋蛋係水入面呀~

 

之後又係獅子王劇場搵到辛巴同佢嘅兩位最好朋友呀~

 

繼續向前行就到灰熊山谷,依個小小豬開始出茅招,見到職員姐姐就問佢啲花蛋係邊呀~

 

經姐姐一提,話咁快就搵到四位金礦成員啦~

 

迷離莊園原來只係阿拔一位朋友仔係度,小小豬都問點解咁少呀~

下頁有:反斗奇兵大本營花蛋

不過嚟到反斗奇兵大本營就即刻熱鬧起嚟,因為好多朋友等緊我地。第一粒花蛋竟然係俾DADDY搵到先呀~

 

不過,小小豬都好努力,好快手又嚟搵齊啦~

 

我都話小小豬係好認真搵,佢真係瞓身咁去搵,希望可以完成任務呀~

 

最後一站就當然係明日世界,見到一眾星戰朋友,仲有最新推出嘅BB-8~

 

小小豬話佢係咁多花蛋中,最鐘意就係依幾個風暴兵同黑武士,佢話好型仔哦。 不過計我話係因為可以同黑武士嚟個親密接觸就真~

續下頁

其實係搵花蛋嘅過程,係五個園區都會有一個問題,只要留心睇下地圖指示,去適當地區搵職員講出答案,就可以得到限量版花蛋貼紙啦!

 

一聽到有貼紙,小小豬緊係唔放過,要去拎貼紙啦~

 

五款限量版貼紙又真係幾靚哦~

 

可能大家都會覺得因為我係超級迪士尼粉絲關係,所以所有迪士尼活動都一定話好玩。

 

不過我可以好認真同大家講,今年迪士尼第一年舉行嘅「花蛋節」整體上都真係唔錯,我自己都好鐘意「猜猜誰。尋尋蛋」依個尋花蛋遊戲,每一隻花蛋都靚靚吸引唔在講,將佢地分佈唔同園區要小朋友搵,真係可以考考小朋友嘅觀察力。當搵唔到時請家長幫忙,又係一個好好嘅親子時光。

 

當日在場都見好多家長及小朋友都圍住花蛋不停細聲講大聲笑又開心拍照留念,我想大家係依個奇妙地方都一定玩得好開心呀!

 

當然,小小豬都一樣玩得超級盡興,都離開迪士尼之時仲計劃緊下次要再入嚟搵花蛋,一定快要過今次咁話哦…..真係俾佢笑C呀!

 

WRITE BY:小小豬的成長日誌