工作點滴之攝宴風雲3

平日我拍攝工作有三成都係生日會呢類宴會，而好多人都知道，其中部份客人係星級家庭，無錯！第一個搵我影生日會既人係靚媽姚嘉妮，但點解會講咗呢個又靚又型既家庭先呢？原因係，我同靚媽姚嘉妮實在太多拍攝經歷，好想再係另一篇Blog先至慢慢分享。

不經不覺，今年已經第三年幫KC（迦晴）影生日會，話說剛過去既星期六係KC六歲生日會既大日子，好媽媽可欣早兩個月前就已經通知我地點同時間，好感激自從影過第一年，佢都繼續搵我影之餘亦都介紹好朋友搵我影生日會及家庭照。就係因為咁既原因，每次去到生日會，有8成小朋友都會記得我！佢哋一見到我就會好興奮咁大叫”Jenny 姐姐”，因為每一次拍攝我都係同佢哋一路玩一路影，其實佢哋明知我係黎幫佢哋影相，都好乖乖唔會Say No，而呢一種感情就慢慢建立起黎；由其係KC，佢最鐘意同我玩Hide & Seek! 🙂 所以我哋都做咗好朋友！

事實上，我亦都唔怕講，記得第一年幫手影，都有啲驚自己影得唔好，因為此終係名人家庭，都會有一定壓力。初時未同佢哋熟落既時候，我都會同一般人一樣，都有少少驚同佢哋講嘢，可欣就因為係聯絡，所以會多啲嘢傾。我記得第一次見到Alex（方中信）既時候（因為佢個樣真係幾COOL！），我就如常做了基本禮貌打個招呼，他也很NICE的回個招呼，感覺不錯！當我係生日會四圍走完一輪，突然，佢用一把好COOL既聲音同我講：「Jenny，食啲嘢喇！」果一刻就開始放鬆D，可能我成日睇佢拍既戲，仍然覺得感覺不太真實！今年影到第三年，除咗係KC生日會，喺佢哋朋友仔囡既生日會，成日都會見到，所以都熟咗好多。今次，我終於好大膽咁同佢講：「我睇咗你套戲（竊聽風雲3）‎喇！」佢就話：「咁快？」哈哈！梗係喇！因為我第一二集都有睇，又點可以錯過第三集！好彩老公前幾日帶我去睇，如果唔係見到佢朋友係咁講：「Everything Under Control！」都唔知發生乜事！未睇既就快啲去睇喇！今次Alex繼千杯不醉既九哥角色後又一攪笑演繹！髮型無得輸！

至於可欣，我哋每次見面若有空檔，都會傾下計。傾下家庭、湊仔及工作，好開心的！而可欣係我其中一位好感激既人，記得我自己前一年攪咗一個HALLOWEEN活動，佢應邀帶埋KC黎之餘仲叫埋朋友黎參加，呢個唔係重點，重點係，佢問我每位收費後，原來背後好細心將每個朋友家庭收費逐一以MSG通知佢哋現場比返幾多錢我。老實講，唔係錢既問題，係我好感動一位其實唔係識咗好耐，而又咁出名既人可以咁支持自己。可欣都成日同我講，好鐘意我影既相，尤其Outdoor相，我真係好開心，有一個懂得欣賞自己既人，所以我亦都好尊重佢，每次有機會要用到相要POST，我都會問過她，如果她不喜歡，我會選擇不POST，而今次，我當然有問，好感謝她給了我佷多次難忘又開心的拍攝經歷及分享這張珍貴的合照！

所以呢，其實呢個又型又靚既家庭係充滿人情味同埋親情，而唔係SO COOL架！衷心祝福呢個家庭繼續溫暖同喜悅啊！