東京親子遊之出發前準備及第一天行程

專欄

廣告

相信同小朋友去開旅行既家長都有晒經驗,以下都只係分享下我今次去呢個旅程既出發前準備個人經驗,我相信可能你哋果啲仲好呢?

1. 平板電腦 ﹣ 由於今次我哋坐廉航,廉到連電視都無得睇,所以一部充滿電既平板是不可缺少。

2. 平安藥盒 ﹣ 平安藥可以係出發前係睇開醫生既地方叫醫生幫你配,而我就因為之前阿仔近期有傷風、發燒、止嘔等藥仲係屋企未食晒,所以我就帶呢幾支,加埋支輕便探熱針同我哋自己大人合用既止嘔及傷風藥等,就真係好平安!因為唔識當地語言,Touch Wood有乜事上黎,都可以頂住先,唔好話無用,臨返香港前一日,阿仔起身有少少燒,好彩有藥,食完休息下,就無事。

(唔好以為真係意大利製造喎,哈哈!其實只係我用咗個放朱古力既盒入起整齊啲,因為液體的東西要同個喼一齊寄艙啊!)

3. 電話咭 ﹣話說我係FB見到個朋友買咗話準備五月去日本用,於是PM佢問下,原來佢唔係第一次買,佢話係7天1.8GB DATA咭係,鴨寮街檔口有售,售價$100﹣$120不等。佢最後讓咗兩張比我!因為我用iPhone6所以要買nano sim,但我老公發現,原來係唔同size有晒位比我哋自己”摵“,我第一日失手係因為唔記得係FB setting內set返啲video唔好autoload,攪到一日就用咗1.2GB,嚇得我!好彩最後set返,之後就唔洗用得咁慳。

(電話咭是這樣的)

(我朋友比我既MAP,XX位為買咭位置!哈哈!)

4. 兩支香港買既水 ﹣ 呢一樣唔係我預備,係奶奶預備,為咗阿仔慢慢適應當地水而帶的,每日溝少少比佢飲,等佢適應!

新手就最好唔好睇啲好複習既地鐵圖,唔理其他,只係睇返山手線,其實好簡單。所以我哋住係大崎係好易搵,依家連我個仔都記得啲站同點樣轉車添喎!

第一日到機場,我哋好好彩遇上N’EX單程票普通車箱指定座席特價,平咗一半!轉眼間由機場一小時左右就到達JR品川站,再轉去大崎,一小時多就到了!

另外都想分享下住既位置,因為今次扶老擕幼,所以一定要方便,但又要以經濟行先,本來我聽取日本朋友意見住“東京站”,因為我哋要去迪士尼,會較近便,但酒店實在太貴,所以今次選擇咗同樣JR山手線內的其中一個站“大崎”站(OSAKI)上蓋的NEW OTANI酒店入住,平均大約港幣一千蚊一晚4人同房,房內有3張床(一張雙人兩張單人),但我咁多日都唔記得影間房,所以唯有借用酒店網站張相(真係一無一樣架),雖然酒店有啲舊,房唔係話好大,房內又無WIFI(要LOBBY)先有,但勝在留下就有間24小時便利店LAWSON、而同酒店連住既OHSAKI NEW CITY內就有DIASO(香港的12蚊點)、TAX FREE既“藥”房(買平化妝品及藥品好去處)、SANRIO GIFT GATE、LIFE SUPERMARKET、和幸(食炸豬扒)及其他食店等等等等,而大崎站去迪士尼只需45分鐘左右,往其他主要旅遊熱點如台場及新宿等只需10﹣15分鐘超方便!!

剛到步就落雨,但好彩酒店係JR站上蓋!

由於落雨,我哋攪呢攪路都六點幾,於是去咗和幸食炸豬扒飯,記得成個旅程有95﹪的餐廳都提供小朋友餐具,有啲仲有包配菜比小朋友撈飯一齊食,阿仔食得好開心!

落雨我哋都無打算再週圍去,好彩酒店留下有間TAX FREE藥房同埋好大既LIFE SUPERMARKET,可以睇下嘢,我第一日已經失守,因為藥房的產品實太吸引,由其限量版的潔臉及化妝用品。

下一個Blog就會開始我哋既行程,第一站係富士急遊樂場既Thomasland記得留意主我更新啊!:)