迷你酥皮檸檬撻食譜 簡易下午茶

今次整酥皮檸檬撻遇到最大難題，就係行咗好幾間鋪都買唔到酥皮呀！

不過呢少少野係唔會難到媽媽嘅，我已經諗好兩個方法：
1.) 自己搓皮
2.) 用印度餅皮

結果又好好彩俾我地買到印度餅皮，媽媽我又可以懶下啦～

檸檬撻材料:

印度餅皮
雞蛋 三隻
檸檬 兩個 (用作整檸檬皮及檸檬汁)
糖 40g
無鹽牛油 40g
水 15ml

檸檬撻做法:

1.) 先將檸檬洗淨，再將檸檬皮磨出，備用。

小提示：
記住只要黃色檸檬皮，白色部份會澀喔！

2.) 將已磨皮嘅檸檬柞汁，預留40ml檸檬汁備用。

3.) 預備三隻雞蛋，備用。

4.) 將檸檬皮、糖、水及檸檬汁加入蛋中，並攪勻備用。

5.) 蛋液稍為打勻後，隔水以細火加熱，並持續攪伴。

6.) 將蛋液加熱需要持續攪伴，待蛋液稍為凝固即可取出。

7.) 將無鹽牛油加入至剛加熱好嘅蛋液中，並攪伴至牛油完全融化。
待蛋液冷卻後就可以加入蛋撻中。

8.) 取出印度餅皮，並以模具CUT出形狀。

9.) 將印度餅皮放入錫紙兜中，慢慢按壓至完全覆蓋。
焗之前記得要係餅皮桔小孔喔!

10.) 將已桔小孔嘅餅皮放入AF，以180度焗10分鐘，即可取出再加入檸檬蛋液。
加好蛋液再焗 5分鐘即成。

^酥皮波波檸檬撻 及 迷你檸檬撻

^一出爐呢個人仔就已經快手KO咗4個啦！

^親子迷你酥皮檸檬撻製作成功! ^_^V