親子好去處 親子活動玩到上深圳

親子好去處 玩到上深圳

佢分為南北兩個商場，兩個商場係相連的，地方非常大，高級乾淨，絕對唔會有香港商場人逼人嘅情況(呢日我係星期六去諗住好多人, 但係都好舒服唔多人)， 店舖唔係千篇一律香港嗰啲大品牌， 最重要係有好多啱小朋友玩嘅嘢，不過價錢就係香港嘅消費價錢。

好似呢個喺北區嘅小朋友遊樂場，有好多攀爬嘅設計，考驗小朋友膽色同平衡力，138蚊人仔可以玩一日。 仲有呢啲電動車同火車，40蚊玩10分鐘， 當然可以買啲套票啦，例如買200蚊送48蚊之類。 唔洗一次過用曬，分開幾次用都得。 喺香港邊有咁大個商場畀你話玩呢啲，通常都係室外熱辣辣，而家有冷氣涼住玩都不知幾舒服。

除咗呢啲動態活動，仲可以玩一啲靜態嘅嘢，例如堆沙、勞作、陶藝等等。 商場仲有好多其他活動俾小朋友，例如一D體適能gymnastic活動，又或者閱讀圖書講故事， 小朋友一定唔會悶，不過太多地方影唔曬比大家睇。

大人除咗行街仲可以試下呢個一人卡拉ok，電視見得多，你真係可以試下架！

食嘢方面就夠曬多元化，之前報紙雜誌介紹過有親子餐廳，裡面有得玩有得食。我哋就揀咗呢間平靚正老班長湯包，非常好味，一人一籠。 不過就淨係湯包為主，仲有一D冷盤前菜， 如果你有微信支付， 可以透過微信落單畀錢仲有折。 我哋三個都只不過食咗150蚊人仔。

要去呢個商場唔難，我哋搭B2巴士喺屯門上車，十分鐘就到深圳灣口岸。過關之後， 上網打開地圖輸入寶能太古城， 根據指示行過去好快就到。 其實過關之後一直向前行，行到巴士總站再向左行，就是這個方向了。 其實要行曬南北區兩個商場都可以行幾個鐘，再加埋小朋友玩，留大半日絕對冇問題。