【親子旅遊】宜蘭5日4夜 親子遊懶人包
【親子旅遊】宜蘭5日4夜 親子遊懶人包
終於俾我等到佢識揸電動車，我就帶佢去咗一個5日4夜宜蘭台北包車遊。原來宜蘭除咗好啱親子遊，亦係一個可以令大人放慢腳步、放鬆心情的地方，果然不負「台北後花園」之稱
宜蘭可供選擇的親子景點繁多，計劃行程時真係會睇到花多眼亂，但係時間有限，總希望唔會去左有「伏味」的地方。今次田媽就主力同大家分享一下我的行程編排、同有邊個係值得去的親子景點同餐廳
Day 1 – 桃園機場 – 包車到宜蘭民宿 – 民宿玩玩 – 紅樓櫻桃鴨
第一日冇乜特別，我哋到達桃園機場已經中午，就直接包車到宜蘭民宿，大概3點左右到達民宿。因為考慮到小朋友周車勞頓咁耐都會攰，所以下午都留喺民宿玩、游下水咁（由於田媽離開台灣後先發現今次住間民宿係無牌照的，所以恕我今次唔可以話俾大家知我哋住邊間）
晚餐我訂咗蘭城晶英酒店紅樓的櫻桃鴨。其實我哋過兩日都會住晶英酒店，但係週末去食就限定一定要點5人餐。由於朋友們話我知佢正常的「一鴨五食」（相等於2-3人份量）已經飽到要打包，所以唯有安排閒日去食
價錢喺台灣嚟講算貴，不過真係物有所值！
個鴨壽司超正，可惜田媽只係食咗一舊，其餘落晒人仔個肚
我哋打破左朋友間的紀錄：唔駛打包走！一家的食量突然好驚人，田爸連湯渣都唔放過
紅樓櫻桃鴨
- 地址：宜蘭蘭城晶英酒店6樓
- 營業時間：午餐 11:00-15:00 晚餐 17:00-21:00 （分時段用餐）
- 線上預約：http://www.silksplace-yilan.com.tw/n/food_booking.html
- 值得去指數：5 （5分為滿分）
食完我哋就麻煩酒店幫我哋call的士返民宿。留意返宜蘭唔會好似台北咁周街都截到的士，而且宜蘭大部分地方都係鄉郊，如果當日無揸車/包車，就可能要請酒店或餐廳的職員代你call車
Day 2 – 包車一日遊
宜農牧場 – 小卡車 – 甕窯雞午餐 – 蠟藝彩繪館 – 幸福轉運站/幾米公園/丟丟噹森林 – 大碗公滑梯 – 掌上明珠晚餐
一起身個景就係一大片稻田，仲想點？
喺民宿食飽飽早餐，就出發一日遊，首站係宜農牧場
裡面有baby豬、羊、鸚鵡、雞等等，小朋友都可以好近距離咁餵佢哋食野，除咗好熱之外，都係值得一去的地方
農場隔離有小卡車玩，速度都幾快
宜農牧場
- 地址：宜蘭縣冬山鄉柯林村長春路239巷17號
- 開放時間：09:00-18:00 （年中無休）
- 官網：http://goat.efarming.org.tw/supergood/front/bin/home.phtml
- 值得去指數：3 （5分為滿分）因為太熱
- 玩完就出發去食雞，之前去清境都食過，一樣咁好味咁滑
番割田甕窯雞
- 地址：宜蘭縣蘇澳鎮海山西路309號
- 營業時間：11:00-16:00；16:30-20:00
- 值得去指數：3 （5分為滿分）
食飽就到對面的蠟藝彩繪館，每個入場人士都可以參加4個DIY工作坊。
我哋整左風車
水筆
仲有蠟筆。最後的人體彩繪因爲Justin有點攰，我哋冇玩
蠟藝彩繪館
- 地址：宜蘭縣蘇澳鎮海山西路500號
- 開放時間：08:30-18:00 （最後入場時間16:30）walk in入場便可
- 官網：http://www.lucky-art.com.tw/p02.htm
- 值得去指數：4 （5分為滿分）
然後我哋就出發去幾米公園。其實幸福轉運站、幾米廣場、丟丟噹廣場都係宜蘭火車站前的幾個景點，都係步行距離。不過除咗影下相，就真係有點無聊
時間許可，可以俾小朋友玩下個波波池。不過Justin似乎對幾米的繪本比較有興趣，可惜只能站立睇，有點辛苦
幸福轉運站/幾米公園/丟丟噹森林
- 地址：宜蘭市宜興路 1段
- 開放時間：09:30-18:00 （幸福轉運站）
- 值得去指數：2 （5分為滿分）
見晚餐前仲有時間，司機姐姐就帶我哋去最近好hit的大碗公滑梯玩。估唔到一條咁raw的石滑梯，可以令大人小朋友都咁開心
大碗公滑梯
- 地址：宜蘭礁溪鄉龍潭村環湖路1號
- 開放時間：全年無休
- 值得去指數：4 （5分為滿分） 好玩，但地點係有點偏遠
去到宜蘭就緊係要一試無菜單料理，因為價錢平香港好多。大部分人推薦食鐵板燒，但係田媽唔想咁熱氣（一陣病左之後果幾日就玩得唔盡興啦），所以我就選擇去食這間懷石料理無菜單料理
去到成個環境好特別，小橋流水咁
食物方面，餐廳選用當地時令食材，有點fusion的感覺，味道還可以，但冇乜驚喜，其實係食環境多
掌上明珠會館
- 地址：宜蘭縣壯圍鄉大福路２段１０２號
- 預約電話：03-9308988
- 營業時間：11:00-14:30；17:00-22:00
- 值得去指數：2 （5分為滿分）
Day 3 民宿 – 蘭城晶英酒店
今日係完全無安排節目，因為我哋入住蘭城晶英酒店！由於價錢都唔平（對於田媽係貴呀）、又咁多野玩，當然唔好放過玩盡佢啦！
住得晶英酒店，就唔爭在俾多少少錢住「芬朵奇堡」，因為小朋友們可以係走廊揸車，仲可以不停換車。
佢果晚就係訓呢度
8樓個open area係俾所有住客玩，唔知係咪當日有落過雨，田媽一行出去果個半露天Area就覺得好臭，有陣廁所味。不過Justin就覺得果度好好玩
呢度有太多人介紹過，田媽就唔多講啦
蘭城晶英酒店
- 地址：宜蘭市民權路二段36號
- 值得去指數：5 （5分為滿分）
Day 4 梅花湖 – 三星蔥文化館 -蔥油餅DIY – 武淵堂宜蘭親子館-羅東夜市-台北酒店
酒店11點check out後就出發到當日第一站：梅花湖。其實呢個景點係司機姐姐推薦，所以我哋都唔知去到有乜玩
原來係揸電動單車！
當日天氣雖然好熱，但係一路揸一路都有好清涼的風吹埋黎，係十分舒服！
沿途可以停低餵魚魚
又可以飲下咖啡，去到台灣一日一咖啡是常識吧
我同田爸只係慨嘆，點解香港冇咁寫意既地方，真係好relax。梅花湖係意想不到地適合親子遊的地方。
梅花湖
- 地址：宜蘭縣冬山鄉得安村環湖路
- 開放時間：全年無休
- 值得去指數：5（5分為滿分）
午餐係附近的一家牛肉麵，味道非常一般，所以唔介紹喇
然後就要去三星鄉果邊，摘宜蘭最出名的三星蔥。我同田爸都係蔥怪，所以好期待
由於當日時晴時雨，我哋唯有先去三星蔥文化館，買下手信，然後先去農田摘蔥
我哋好幸運，落田摘蔥時冇落雨，摘完自己洗乾淨，就可以整蔥油餅
Justin親手整當然最好味
做完農夫（其實只係幾分鐘）咁緊係要relax一下啦，田媽就知道宜蘭有親子按摩店，家長可以一邊享受按腳、一邊望住小朋友玩。Justin自己乖乖一個玩咗成個鐘冇搞過我哋，讚！
武淵堂足體養生工廠
- 地址：宜蘭縣羅東鎮中山路3段269號
- 營業時間：10:00-02:00
- 預約電話：+886 3 955 2992
- 值得去指數：3（5分為滿分）
其實田爸住蘭城晶英果晚想去羅東夜市，但係佢太天真了，點會叫得走個車迷呢？司機姐姐知道我哋未去，寧願開OT都安排我哋宜蘭最後一站去夜市。
田媽就認為羅東比較細，食物種類亦唔多，有點失望（特別去過台中台南夜市後）
羅東夜市
- 地址：宜蘭縣羅東鎮民生路(羅東中山公園旁)
- 值得去指數：2（5分為滿分）
Day 5 Baby boss – 回港
最後一日我地留喺台北，方便下午上機回港
由於上兩次帶Justin去台灣都未滿3歲，所以一直都未有機會去玩baby boss
當日都有一間幼稚園，所以要排少少隊。我地11點玩到下午4點，都玩到5個遊戲，每玩完一個遊戲都會出糧俾小朋友
消防員
油站叔叔
救護人員
超市收銀員
建築工人（Mr Bull）
有家長會擔心小朋友太細、唔識普通話，不過Justin當時3歲多D都完全冇問題。午餐可以係場內解決
最開心係俾佢感受一下返工搵錢係點樣一回事
Justin玩完上的士係立刻斷電
Baby Boss
- 地址：台灣台北市松山區八德路四段138號7樓
- 開放時間：10:00-20:00
- 網上預訂：https://www.babyboss.tw/tickets.aspx
- 值得去指數：5（5分為滿分）
總結：
田媽Business trip+去玩已經去過台灣十幾次，本來都諗住唔再去。不過今次宜蘭之旅，令我再一次愛上台灣。喜歡他們果種慢活的態度、喜歡他們貼心的服務
去到宜蘭，令我感到香港人是在生存、當地人是在過生活
最重要，當然係圓滿的親子行程，為我地一家帶來無限的快樂回憶。而今次的包車司機姐姐亦為我地影左好多靚靚全家福，原本諗住要出去影一輯相的田媽又可以慳返一筆
建議大家訂民宿前都睇睇間民宿係唔係合法，唔好好似田媽咁大頭蝦
查合法民宿：
=========================================================================
田媽玩樂誌
Facebook: https://m.facebook.com/justinmamablog/
Instagram: https://www.instagram.com/justinmamablog
