上次我煲紅豆水時，我都有俾小半杯小小豬飲。不過依隻衰豬飲完次後就即刻話『MaMi….我都係鐘意飲菊花茶多啲』，既然佢鐘意，我當然好樂意煲俾佢飲啦，所以今次就煲左金銀花菊花杞子茶啦！
菊花茶我都成日煲，不過今次加埋金銀花同埋杞子一齊煲，三者都係一啲性質溫和嘅藥材， 對清熱解毒同埋眼晴明目都好有幫助。除左啱小朋友飲之外，對一啲眼部浮腫同埋夜瞓人士(即係我啦)都好啱飲呀！
材料都只係需要四樣：金銀花(由於佢嘅味道有點甘味，所以唔可以落太多，如果唔係就會帶點味，所以我只係落左約兩湯匙)、菊花約十蚊、杞子約一湯匙及少少冰糖~
將所有材料浸洗約半個鐘，然後隔水備用(記得要分開嚟浸洗，因為佢地落嘅次序唔同呀)~
煲內放2L水，待滾水後加入金銀花及菊花，用中火煲20分鐘~
之後加入杞子及冰糖再煲15分鐘(冰糖嘅份量可因應個人喜愛甜度，不過如果想更加有效達至清熱作用，就不建議加冰糖作調味，以免影響佢地嘅功效。不過如果俾小朋友飲的話，都係落少少等佢地甜甜地飲得開心啲)~
有佢鐘意菊花茶，小小豬緊係飲得開心，話咁快就飲晒依一大杯啦~
温馨提示：雖然依個金銀花菊花杞子茶簡單易煲又幾好飲，不過蠶豆症嘅朋友仔係唔可以飲用金銀花，所以煲嘅時候要留意呀！
