阿樂阿愁助小朋友成長

專欄

廣告

終於睇咗呢期嘅大熱動畫《玩轉腦朋友》,故事將一個 11 歲女仔 Riley 嘅五種情緒刻劃為五個角色:歡樂嘅阿樂、憂愁嘅阿愁、暴躁嘅阿燥、憤世嫉俗嘅阿憎、大驚小怪嘅阿驚,佢哋每日都喺 Riley 個腦入面大鬥法,又各有記憶體。

最正面嘅阿樂,不斷拆解由阿愁、阿燥、阿憎同阿驚嘅煩惱,但又成日畀負能量爆燈嘅阿愁破壞。喺 Riley 一家搬屋之前,「樂愁燥憎驚」都相安無事,但新環境所有人事物劇變,令 Riley 心靈嚴重受挫,最後喺巨大壓力下離家出走。

誠實面對內心聲音

劇中嘅父母想用誇張失實嘅描述,令 Riley 鍾意環境較差嘅新屋,但無論腦入面嘅阿樂點發功,都冇辦法開心起嚟。

好多父母都以為小朋友好易氹,其實小朋友一啲都唔易呃,佢哋易笑易喊,證明對周遭環境非常敏感,只係唔太識用說話去表達,所以每逢小朋友遇上環境改 變,例如搬新屋、返新學校等,父母都應該引導佢哋將不安、唔開心、甚至驚恐嘅情緒抒發出嚟,而唔係好似電影入面嘅媽媽咁樣當冇事,直接叫 Riley 要保持笑容,支持為工作愁爆嘅爸爸。當小朋友嘅感受無處發洩,就會引致往後嘅種種衝突。

小朋友唔開心呃唔到人,家長只要花少少時間分憂,細心聆聽,就會清楚知道問題所在。可惜好多父母因為忙碌,有太多事要處理,連自己都未顧得掂,冇好好咁聽小朋友嘅心聲,雖然樂觀嘅小朋友會諗起以前好開心嘅時刻,暫時唔再難過,但長期忽略仔女嘅感受,冇認清同解決問題,就會好似 Riley 咁,誠實、友誼、傻勁、興趣,全部冇晒,連家庭關係都危危乎。

快樂憂愁可互補

劇中嘅阿愁多次指出前路有危險,但阿樂以為用樂觀正面嘅態度向前衝就會逢凶化吉,反而製造更多問題。其實負面思維唔一定唔好,只要小朋友保持鎮定,有正確邏輯思維,就會識得冷靜分析事件,唔會以為實冇事,可以直接去做, 雖然正面思維可以令當下心情變好,有助解決問題,但有機會模糊焦點,愈做愈錯。

劇中嘅阿愁成日攤喺地下度唔想行,要阿樂拖住自己行,其實係喻意人會沉溺喺負面情緒之中,需要樂觀帶領前進。小朋友唔一定可以自己走出失意,至於點樣同幾時叫返小朋友個阿樂出嚟,重新出發,係一門藝術,身為家長嘅我都要不斷學習。

回憶 Let It Go

Riley 細細個幻想出嚟嘅朋友BingBong,一早已經被「打入冷宮」,以往開心嘅片段,BingBong 諗返起都難過到喊,不過 BingBong 嘅眼淚係糖果。我哋喺成長過程當中遇過好多人,發生過好多事,有好多回憶,雖然回憶會隨住時日褪色模糊,但間中諗返起都會笑中有淚;小朋友嘅回憶比較簡單,不過一樣會唔捨得,所以我哋同小朋友唱完《Let It Go》,仲要灌輸 let it go 嘅意思:放低,識放低過多包袱,先可以輕裝上陣,走得更遠。

電影入面嘅阿樂試過揼低阿愁,獨佔大腦,結果當然係唔得啦!人生又點會只得歡樂,冇憂愁呢?憂愁同歡樂佔據每個人生命中嘅每一個時刻,想避都避唔到,既然係咁,不如好好幫小朋友去認識呢對孖寶,幫佢哋儲存七彩繽紛嘅記憶,過一個精彩嘅人生。

=========

(後記)

呢期最深入民心嘅顏色係藍色,因為阿愁真係慘得好可愛,Keicy 同 Kassy 扮阿愁都扮得好開心!仲係咁話想扮多一次,睇嚟我為佢哋製造咗一個最開心嘅扮唔開心回憶!(喂!我講緊咩呀? :p )

大家可以喺屋企跟住以下 3 個 step 試吓!

1. 材料:

藍色假髮 x 1;
黑色圓形眼鏡 x 1(上次扮 Minions 嗰副);
凡士林
藍色 body paint
海綿
灰色冷衫 x 1

2. 做法:
面部均勻搽上凡士林 -> 海綿印上藍色 body paint -> 濕少少水 -> 油上塊面 -> 戴眼鏡 -> 戴假髮 -> 着冷衫 -> 完成

3. 清潔:

因為搽咗凡士林打底,面部夠油,所以一抹就抹得甩。

FB:KeicyKK