食譜『香芒蟹肉酥皮盒』
今次我整左個小食「香芒蟹肉酥皮盒」，主要材料有急凍蟹肉、急凍酥皮、鮮芒果、鮮忌廉等。好多人都喜歡食蟹，我都唔例外，平時食蟹多數都係炒或蒸，雖然鮮味，但煮蟹本身已經係一輪搏鬥，食蟹又要拆殼，都幾麻煩，所以即使鐘意食，一諗起處理既過程就卻步。急凍蟹肉倒是方便又乾淨既選擇，啖啖肉食得過癮，煮法也靈活好多。
材料：
蟹肉 150g
酥皮 3-4張
芒果（切粒） 1個
洋蔥 1/4個（切粒）
忌廉 半杯
蛋汁（塗酥皮用）少許
調味：鹽、黑椒、糖、香草 少許
做法：
1. 酥皮用模具切出3塊相同形狀，其中兩塊叠起，用較少的模具剪去中心位置。
2. 完整的酥皮放下層，再鋪上剪去中心的酥皮（每個3層），然後塗蛋汁入焗爐180度焗20-30分鐘至金黃起酥。
3. 炒香洋蔥粒，加蟹肉炒，倒入忌廉，加調味煮至稍為杰身後熄火備用。
4. 酥皮焗好後，中央會拱起，用刀輕刀切走拱起的酥皮，然後填入蟹肉忌廉，放上芒果粒和裝飾，完成。
蟹肉鮮味同白汁好match, 加埋焗得香脆既酥皮盒同新鮮芒果，真係好食到停唔到口， 夏天唔想食得太油膩，依款小食清新得黎口感十分好，家庭聚會或做派對小食一流。
