【小學雞便當】10款營養日式便當 附製作貼士

【小學雞便當】10款營養日式便當 附製作貼士

專欄

廣告

Pok & Da 嘅小學同大部份小學一樣,訂飯一訂要訂成個月,唔訂飯就成個月都要送飯,呢個月出FB post 出得咁密,當然係因為Pok & Da 申請送飯獲批,於是Pok媽三月份又踏上《小學雞日式便當》之旅!

撰文&圖片:Pok媽 | 編輯:Chloe

10款小學雞日式便當+製作貼士

整便當這回事,我仲未拿捏到自己style,可以參考嘅素材網上太多,YouTube / IG 睇到人嘩嘩聲!外貌協會會員當然係想整靚啲擺上FB/IG呃like,Pok媽超級崇日,當然係整日式,不過整嘅過程都有好多限制~

要考慮好多問題:

買唔買到日本便當材料?邊啲食物啱自己小朋友?點樣整又快又過到自己嗰關?夠唔夠時間整?有啲餸要早一晚預備?仲喺度學習中!

 

好可愛嘅三眼仔飯團, 眼睛同耳朵同咀都係用芝士片&紫菜預先整好, 加入綠色飯素, 由於有色素, 所以都係偶然整下, 唔會成日整。

整公仔飯團=食冷飯?

不過有樣嘢我可以好肯定,就係我唔鍾意整公仔飯團,整都只能夠整好簡單的,除咗因為冇乜藝術天份,整嘅過程時間長,整好啲飯會凍晒,唔似日本人,中國人始終都係習慣食熱食暖胃~

菜式搭配 夠營養又美觀

菜式方面, 通常會有以下配搭:

五穀類:飯、烏冬、pasta、意粉、天使麵、麵包等等都係適合嘅素材

蔬菜:用鹽烚嘅比較健康, 用西蘭花, 秋葵, 蘆筍賣相會加分, 仲可以遮住食物之間嘅空位。加少少柚子豉油/芝麻醬已經好好味

肉類:常用鱈魚柳、三文魚、雞柳、雞腿肉、豬肉片、雞翼、肉丸

副菜:即係圖中嘅火腿、蛋皮、日式蛋卷、醬油牛蒡漬、竹輪、腸仔、餃子之類嘅食品。通常係令到個便當更美觀, 又賴係多餸咁樣。

水果:都係令到個便當更加美觀材料, 例如士多啤梨、車厘茄、提子。

如果小朋友唔鍾意食飯又或者成日食剩,整壽司就即刻解決晒以上問題,仲可以擺啲佢哋平時唔食嘅菜落去,例如菠菜。

有冇媽媽掛住煮飯唔記得煮飯呢?唔緊要!家中常備各式各樣嘅pasta粉、烏冬。唔記得煮飯, 即刻整pasta / 冷烏冬就搞掂!

另類便當

All-day breakfast類

有次試過要趕住出門口,冇時間煮,整個炒滑蛋三文治 + 士多啤梨+ 腸仔,又過關!

哈哈! 有次Pok Pok話想食pancake,我又整好晒餸,唯有將飯變pancake,餸菜不變,記得嗰日有整蒸肉餅,變成好搞笑嘅fusion便當!

最後講下我哋個便當盒,日本便當盒大部份都係普通膠盒,一係就圓桶型保溫壼,細細個圓盒仔好難擺餸。想要不銹鋼保溫飯盒,因為開口位大,砌日式便當會靚啲,用咗個幾月,算係喺砌日式便當與保溫之間攞個平衡。

係咪好夠暖呢?保到2-3小時左右,中午送過去都仲暖暖地,如果晨早整定畀小朋友中午先至食,就未必夠暖喇!而且飯盒好重, 小朋友朝早自己帶飯就要諗諗先~

我會先用熱水浸到個盒熱咗,然後再擺飯餸,咁個溫度會keep得耐啲!

今次講住咁多先喇!下次再會!

請follow我的Media:
FB:https://www.facebook.com/pokfamily/
IG:https://www.instagram.com/pokfamily/
You Tube:http://bit.ly/2WobM8P