幾時有胎動?

政府醫院 (QE) 排結構嘅期一早就Full晒，唯有去私家醫生照，20週可以照得，但醫生約好我21週，係每個醫生安排唔同吧。照結構嘅目的係要係24週之前，睇吓BB身體上有無嚴重嘅缺憾，按香港法例規定，24週前先至合法進行終止懷孕，當然要係因為嚴重殘疾先可以咁做啦。

照結構前，醫生講解，呢個係一個篩查式嘅檢查，照唔到有問題唔代表100%健康，亦會按你個人願意而進行。首先係睇吓BB嘅性別、身體嘅整體骨骼完唔完整，例如頭、身、手腳、手指腳趾，然後會照內臟齊唔齊、血管及功能等等。其實早在照結構前已經上網睇過吓資料，顎裂/ 兔唇/ 心臟問題/ 腦部等等問題都可以透過照結構觀察出嚟。

醫生將個超聲波捧按落肚皮時真係好緊張，可以見到BB的確係好開心，但另一方面又擔心唔知佢會唔會有結構上嘅問題，心情非常矛盾。不過，當BB嘅影像出現係電視屏幕時，憂慮嘅情緒忽然消失，因為佢彈動一下，「佢郁緊?」醫生話係。唔單止屏幕見到佢郁，佢嘅每一下郁動，都震動我嘅肚皮，感覺係似用手指頭輕力彈咁樣。

不過每個人對胎動嘅感覺都唔一樣，每個人胎動嘅日期都唔同，有人18週有胎動，有人要到22週甚至更後期，主要睇返係首次懷孕還是經產婦啦，前者一般18-22週左右會首次胎動，後者則會更早。