清新地有機農莊

暢遊 清新地有機農莊

專欄

廣告

早前睇左魚子媽嘅分享,知道西貢有一個好靚嘅有機農莊-- 清新地有機農莊 ,剛好魚子媽又組團一齊去玩,所以我又參加埋一份,帶小小豬去感受一下農莊生活啦~

 

白沙灣碼頭有船來往農莊,我地一大班人當然係選擇依個最舒服嘅方法啦~

 

經過大約二十分鐘車程,再行一段小路,就到左我地今日嘅目的地啦~

 

我地分批係農莊進行活動,首先就係連導賞哥哥參觀農莊內嘅植物。導賞哥哥都好用心為我地每樣作介紹,又講解有機農莊嘅種植方法。小小豬都好用心咁聽住導賞哥哥講解,之後仲扮導賞員同我邊行邊講,真係俾佢笑C呀~

閱讀更多

※如欲率先接收資訊,請讚好我們的FB專頁:https://www.facebook.com/SundayKiss/,並於「已讚好/Liked」選單設定「搶先看/See First」,多謝支持。

延伸閱讀
5大 室內緩跑徑 體驗全天候運動樂
最新!$30做 船長 玩航海駕駛模擬設施

參觀之後就開始製作自家鬆餅,其實小小豬一向都有同我一齊整嘢食,所以都難唔到佢,基本上由麵粉加牛油及牛奶再搓麵團依幾個步驟都係佢自己做,我就係旁邊睇下協助下啦~

 

係等鬆餅焗好嘅時候,我地做去做薄荷盤栽。其實小小豬之前都有試過整盤栽,不過今次就有啲唔同,因為由剪薄荷苗到落盤都係佢自己做呀~

下頁:完成品

依三盤係小小豬嘅完成品,佢仲話要負責每日照顧佢地添。其實步驟都真係好容易,只係小小豬成日將個身”痴”得太埋落個身度,攪到成件衫都係泥。不過唔緊要啦,體驗農莊就係會咁,之後洗乾淨手仔,再拍下件衫,咪又可以再玩過~

 

整完盤栽即係我地個鬆餅都差唔多焗好,有隻心急為食豬直頭企定定出鬆餅出爐呀~

 

自己一手一腳整嘅都係特別好味呀~

下頁:小公園放電

食飽飽又休息過後,我地就去小公園玩一陣放下電。嘩….整個公園仔個環境真係唔錯,好靚呀~

 

有咁靚嘅地方小小豬當然係勁興奮,不停左玩玩…右玩玩,玩得不知幾暢快呀~

下頁:齊齊動手整冷麵

玩完一輪,又係我地食嘢嘅時候,齊齊動手整冷麵。麵團大會就為我地提供,小小豬就負責碌平個麵團,然後用麵條機整成一條條麵。

 

小小豬都整得似模似樣呀,攪笑嘅佢仲叫我買部麵條機返屋企,等佢都可以係屋企都可以整麵條~

 

小小豬仲自己煮埋麵添~

 

最後去埋負責人拎埋啲配料,咁就可以食啦~

 

哈哈哈….點解咁好餸?因為魚子媽及小K媽媽帶左啲腸仔同粟米嚟俾我地加餸呀~

 

食飽飽當然又係去玩嘅時候,我地去餵羊仔啦~

 

其實啲羊仔都係好溫柔(只係其中一隻大羊成日好狼C咁衝埋嚟搶食),不過依隻大膽豬越餵越前,旁邊睇嘅我都真係驚驚地呀~

下頁:小型電汽車任玩

農莊內都有一部小型電汽車俾小朋友玩,$25可以玩10分鐘其實都幾……,不過小小豬又非常熱切咁話想玩,佢又肯乖乖去排隊,所以愛豬號DADDY當然答應佢嘅要求。

 

不過,好唔好彩地當小小豬乖乖排左15分鐘之後,部電車仔冇電冇得玩,失望嘅小小豬都有啲唔開心呀。最後,DADDY就推佢行小小嘅一段,滿足一下佢啦~

 

嚟到今日最後一個活動,就係小K媽媽為一眾小朋友講故事,各位小朋友都好留心聽故事,由原本嘅大圈圈,越坐越埋咁變成一個小圈圈,仲有好熱烈咁回答問題,我地在旁都覺得好小朋友們好可愛呀~

 

哈哈哈…聽完故事小小豬都意猶未盡,自己睇下圖書先~

 

其實今日清新地有機農莊之旅都真係唔錯,最好就係整日消費都唔算貴。我地團費每位$80包導賞、整鬆餅、花茶同整小盤栽,再加$40整冷麵,來回船費都係$30,一家三口$500唔洗就可以玩成日,係一個咁舒服環境有得玩又有得食,計落其實都幾抵呀!

 

小朋友可以接觸到有機嘅耕種,又可以親手整嘢食,仲成班小朋友一齊玩,依啲體驗平日比較少,所以有機會我都想再嚟玩過。

 

BY 小小豬的成長日誌