【我係小童工】齊來做個小小咖啡師

話說之前參加小小麥職場體驗日傳媒活動時,小小豬就已經率先扮個小小經理。當日佢玩得未夠喉,所以我就即刻幫佢報名,等佢可以再玩過,今次就扮演一個小小咖啡師~

上次玩得咁開心,小小豬就梗係非常期待, 所以今日就一早嚟到麥當勞,等姐姐幫忙換件小小咖啡師制服,就準備開工啦~

今日有五個小朋友同小小豬一齊返工,首先就係由姐姐教我哋點樣做個稱職嘅咖啡師~

換左件制服又好似幾型仔喎,等大家推廣下最新McCafe產品先啦~

之後就要去接待賓客,個個小朋友都大大聲講歡迎光臨,真係好搞笑呀~

接下來就由咖啡姐姐教小朋友係熱鮮奶上面灑上朱古力粉同埋拉花~

睇姐姐真係好快手,三兩下手勢就已經整到一杯花花圖案拉花同薑餅人嘅熱鮮奶,仲幾靚呀~

睇完姐姐示範,就到一班小朋友開始動工,當然首先要洗乾淨隻手先啦~

小小豬原本係想整拉花,不過就話驚整唔到, 所以最後佢都係決定將個可愛嘅薑餅人朱古力粉灑上去杯熱鮮奶到啦~

有姐姐幫手就梗係冇問題,成個薑餅人都灑得幾好樣呀~

各位小朋友都好滿意自己作品喎~

自己整梗係特別好飲,小小豬轉眼就飲晒一整杯啦~

接著就去下一個崗位,就係做店員幫手落Order啦(依個月都係小小豬最期待嘅一環節嚟㗎),睇佢又好似似模似樣喎,簡直係店員上身咁……哈哈~

之後仲做埋服務員,幫我拎啲食物去坐位度添~

要有好嘅服務態度,禮貌係好重要,所以一班小朋友仲係店前排排企,不停同啲顧客講再見,叫佢地下次再嚟呀~

每個小朋友表現都唔錯, 最後每人有張小證書加以鼓勵~

雖然只係一個半鐘頭嘅工作,不過其實都好充實, 小朋友可以接觸唔同嘅事物同客人,真係一個唔錯嘅體驗嚟,希望麥當勞可以再搞多啲類似嘅活動,等多啲小朋友可以嚟開心玩樂一番啦!

 

BY 小小豬的成長日誌

你又點睇?

更多精選內容