澳門巴黎人

【親子好去處】 澳門巴黎人 The Parisian 2日1夜 “玩”轉巴黎鐵塔之旅

專欄

廣告

多謝 澳門巴黎人 邀請,可以率先到新酒店嘆一嘆,體驗酒店內所有精彩節目及享用配套設施,而且又咁啱撞正我生日小日子,所以真係好開心好興奮!

未到酒店門口就遠遠見到巴黎鐵塔,呢座鐵塔係對照巴黎真實的鐵塔1:2比例建造而成

我哋推住行李入去Check-in囉!

華麗嘅入口,我哋先喺門口影番張相先

在酒店左方全係接駁穿梭巴士,往來碼頭、威尼斯人酒店及金沙城中心

一入到去就見到呢個噴水池同埋超高樓底的天花,真係靚到我不停咁影,都唔知自己影咗幾多張

呢個景同威尼斯人南門個噴水池一樣咁靚咁宏偉

Check-in/out的大堂仲勢利,唔講以為自己去咗藝術館!

未入到房先興奮!呢度已經咁靚,之後嘅行程真係不得了

行到過嚟去個洗手間,連外面都咁富麗堂皇

轉過嚟Shopping的街道,望去上面5樓天橋同玻璃天花都好靚

巴黎人裡面仲有好多各式各樣嘅餐廳店舖,有機會真係想試哂全部

Q立方王國處於北翼附近,酒店6樓出咗lift之後步行2-3分鐘就到,入口前左右兩排扭蛋機,呢個係Q立方嘅獨有特色,未入場就要小朋友纏住你!

呢度收費$150,平日$120,戴上手帶後玩2個鐘,職員會喺張單上面寫明完結時間。

呢度冇特別要求小朋友必須穿著長袖衫褲,內設洗手間非常方便,仲有儲物室$20任用

一入場佢哋兩個就去咗睇電影…一睇就睇咗好耐!冇理由嚟Q立方睇戲卦,所以我就叫佢哋即刻起身去周圍玩

場內都有電腦區俾大D嘅小朋友可以上吓網,但係我諗最主要係俾大人喺度Hea就真

唯一較舊場遜色係呢個迷宮,因為地方比較細同埋只有兩層高!

當然唔少得嘅就一定係波波池啦!呢度波波五顏六色同埋都夠深,成個人瞓落去匿埋都得!

頭先講過的儲物櫃,仲有水機設置免費入用

另外都有個衣帽架免費享用,如果冬天嚟到可以將D大褸掛喺度

洗手間門外都放了些拖鞋喺度,裡面都好乾淨企理!

出番嚟去玩Q立方王國嘅主要遊樂區,城堡主題的攀爬架,一嚟就見到有條超激瀡滑梯(6歲或以上),我叫哥哥玩嚟俾我睇,都唔知佢今日做咩扮冇膽唔肯玩!(之前喺另一個場有條近乎80度傾斜瀡滑梯都夠膽,擺明係想番去睇卡通多過玩)

小朋友沿住呢條爬梯就可以上到上層,分別有幾款唔同難度嘅瀡滑梯可以揀!

呢條好明顯係冇難度啦!

妹妹當然玩番D入門級瀡滑梯啦!

見到佢哋兩個Pat就好想打落去

妹妹每次都會交足戲真抵錫

場內仲放咗4部Wii喺度,全部都係賽車Game,佢哋兩個一見到Mario就走埋去玩孖寶賽車

不過又真係幾好玩!想當年超任版我都玩到唔願瞓,同埋去Friend屋企必玩Game之一

打完機繼續玩!再次爬咗去城堡上層,大人如果要跟住小朋友上去就冇咁方便,因為瀡滑梯係唔俾大人玩㗎

所以大朋友就要沿住呢條樓梯落番地下

跟住唔少得梗係波波池啦,呢度D波波都係七彩咩色都有!

玩完波波池就去隔離個迷宮玩,裡面都幾細㗎,大人唔適合行入去啦!其實大家可以放心,因為每個設施基本上都有職員駐守,確保小朋友安全!

向住洗手間方向行,中間會經過Party Room,然後盡頭會見到個出口,原來行出去仲有個城堡可以玩㗎!大家出外可以穿著拖鞋(又或者著住襪都OK)

其實頭先我都覺得室內個小迷宮唔係好夠喉,原來出面真係仲有一個咁大咁高嘅城堡迷宮

呢條3色滑梯唔算長,但係佢質地好跣,所以滑起上嚟都幾激㗎!

睇吓媽咪個樣就知道我冇講笑

沿住城堡側邊行過去有個小食亭

小食亭係同隔離的水世界分享的!今次我哋就冇機會過去玩水,留番出年夏天吧!

穿過小食亭,終於見到澳門巴黎人廣告個旋轉木馬啦!

木馬毋須另外收費,可以任坐唔嬲!只要你唔怕頭暈的話

跟住叫埋哥哥出嚟一齊坐!哥哥真係長大咗…只係坐咗一個圈就番入去打機了…

芊芊玩個不停!我都轉到有D暈

兩個鐘好快就過,如果可以好似香港的室內場可以全日任玩就好!玩咗咁耐哥哥最唔捨得嘅都係…Mario賽車Game!

玩完Q立方之後,哥哥芊芊都話肚餓到不得了,我哋嚟到御蓮宮嘆番個靚茶,食番一盅兩件,但係估唔到…

待應先為芊芊預備一套巴黎特色嘅餐具,哥哥又唔抵得又要一Set!

啱啱落咗單,芊芊就問「點解咁耐都未有得食?」

認住呢個蓮花燈,室內整個環境都超美超高貴,估唔到佢哋嘅點心都一樣咁高水準

前菜放上枱佢哋都唔放過,點知食咗D有芥茉嘅青瓜即刻嗌「好辣好辣」

正式嘅點心上枱啦!當然唔少得嘅係最識食嘅芊芊且最鍾意食嘅蝦餃,真正皮薄蝦靚!

每餐唔少得嘅蔬菜,媽咪一定要嗌俾小朋友食!面上仲有少少炸白飯魚,兩個第一時間食,叫呢一味都唔知健康定唔健康

最巴閉係呢碟乾炒牛河,有咩咁巴閉,因為佢係平時去食都要幾百蚊嘅安格斯牛肉,真係好重牛肉香,唔知點解一路食一路覺得佢用嚟炒河有D嘥

兩個食得幾滋味!

跟住媽咪再嗌多個好有特色嘅點心!

又來一個巴閉點心,因為佢係長腳蟹+蝦腸粉!蟹肉超鮮甜

最後實在唔夠飽,因為餓咗太耐,所以再叫多籠燒賣…噢媽呀!原隻帶子燒賣呀

食完嘢下半場我哋就參加咗Venetian Macao Open高爾夫球公開賽,當然我哋唔單止係去睇人打波,自己都玩埋一份

真係好大好大個高爾夫球場,佢哋兩個見到大草地即刻想跑入去,場裡面仲有兩隻狗,起初我以為佢哋係守住個場唔俾人入去,後尾先發現原來佢哋係負責執波嘅

行咗十幾分鐘落到去另一高球場,波就唔睇住啦(因為同時間正在進行比賽),我哋即刻去咗玩先

由幾位姐姐負責,有攤位遊戲,桌上遊戲同埋面部彩繪!

芊芊好開心畫咗個Elsa喺隻手臂度!之後姐姐見冇咩其他小朋友,再幫佢畫埋Anna喺另一隻手度㖭!

有三架好靚嘅綿羊仔放咗喺度俾人影相!

有個小小嘅瀡滑梯設施,啱哂芊芊玩!

之後我哋參加咗個高爾夫球親子班

首先有前公開賽選手Sam Brazel為我哋示範一下

球場對住個海,所有波都係直接打出去個海度!佢好利害,想個波去幾遠有幾遠,去幾高有幾高

然後仲有Cao Yi親自教路(唔好意思其實我唔識佢),做埋兩個小朋友嘅私人教練,一對一咁教佢哋打波

嘩真係好有姿勢!

芊芊都好有台型

芊芊經訓練後,真係幾勁喎!起碼打到個波先啦,你睇佢目光幾有殺氣(其實係對住日落夕陽好「殘」眼)

哥哥呢兩下都真係大板有眼,但係亮點係…兩個姿勢都係揮桿完成,但係個波仲喺度

兩個一路揮桿打咗成個日落,真係好舒服好自在!

最後仲有靚仔車我哋番上去入口轉酒店專車離開,真係五星級享受呀!

落咗車先見到原來彩繪姐姐畫埋個小白送俾芊芊!超開心

嚟到3樓一個地方見到有個街頭表演, 哥哥望咗好耐都諗緊係咪真人, 芊芊就唔敢行埋去覺得好驚! (其實就算係一個普通人佢都唔敢行埋去)

跟住哥哥就行埋去同佢握握手, 握完手玩完一輪, 都仲係問我「佢係咪真人嚟架?」

在酒店周圍都會有D巴黎人行嚟行去, 你可以邀請佢哋同你一齊合照架!

差唔多黃昏, 我哋行出去同巴黎鐵塔影相! 真係好高呀….我拎住支24-70都要瞓喺地下先可以連人帶塔影得到

到佢哋兩個幫我同媽咪影相! 妹妹幫手睇水…

我諗大家要帶埋支16-35先可以影得舒服D

在塔的前方有一招牌噴水池!

開始入夜, 鐵塔燈光SHOW開始啦, 成個SHOW十多分鐘一邊播住唔同音樂一邊閃上Colorful燈光, 好期待一陣上個塔頂睇風景!

欣賞完個巴黎鐵塔燈光Show之後就去醫醫肚,我哋本來諗住去試吓巴黎人自助餐,但係真係超多人要等位,所以要揀咗另一間日本嘢食
店位於巴黎人近南翼的地方,入口非常隱閉,如果唔係睇地圖都真係搵唔到,就算俾你經過都可能見佢唔到

店內環境超讚,好靚好舒服仲好乾淨!不過就稍為有D暗,我哋先點了個芒果蟹籽沙律,簡直係香港人口味,通常去親食日本嘢都會必叫
蟹籽唔鯹,芒果好新鮮,食落有好清新感覺

之後呢個滑蛋吉列豬扒飯,豬扒就稍為有D林唔夠脆,米飯加上滑蛋同炒香了的洋葱都好好食!

再上呢碗鮮牛肉稻庭烏冬,烏冬果然彈牙好爽,牛肉好林唔韌!佢哋兩個都食完再添

跟住再嚟個海蝦什錦天婦羅

所有惠顧嘅客人都會送一客火炙蝦壽司

經理見我哋有兩個小朋友,知佢哋食唔到個壽司(因為半生),就特登幫我哋換咗兩客藍莓布甸請佢哋食,真係好開心!

我自己叫咗一大客什雜刺身,嘩!發達啦…冇人同我爭,我自己食哂!Yeah
刺身肉厚新鮮!Yummy

食飽飽之後我哋就準備上鐵塔頂啦

上到五樓嘅巴黎鐵塔精品店,入口就喺隔離!沿住走廊一直行,會睇見牆上面掛住好多張相,其實全部都係原裝正版巴黎鐵塔的建築工程由開始到完成的照片

行到最後一段見到照片已經係大致完成的狀態

跟住沿扶手電梯上到七樓

7樓就係售票處,票價分為7樓及37樓的觀景台

售票處隔離就已經有條通道直達觀景台,張票俾職員望過下後就直接推門出去(我起初以為有票尾要搣),原來7樓觀景台有分為上層及下層

出到去近距離見到鐵塔,覺得比起喺地下望上去更正更近

今次好失策唔記得咗帶腳架嚟!所以勉勉強強咁都影咗張,我自問對手都幾定㗎!哈~

然後見到有個閘口,原來呢度先係入閘上7樓上層,即係話原來頭先下層嘅地方係免費,直至到過咗呢個閘口搭扶手電梯上到上層先至要購票入場

真係好利害,人仔細細識得配合媽咪,扮個鐵塔擺Pose影相

上咗扶手電梯之後轉左經過條情人鎖橋就去到鐵塔嘅前面

如果拍緊拖又相信Lock個鎖喺度係情比金堅嘅話就可以喺頭先個精品店買番個鎖上去鎖鎖佢

喺塔底炒上去睇住佢D燈一路變色真係好靚

然後去到塔底有另一個閘口,就係通往最高塔頂37樓觀景台,職員抱起芊芊將飛插入去入場等Lift

因為哥哥突然鬧情緒,所以我同芊芊先上去塔頂,辛苦哂媽咪喺7樓安撫佢

上到搭頂睇到好好好好靚嘅夜景!

我哋喺上面逗留咗10分鐘度,好快就落去7樓

離開觀景台就穿番去精品店,店內真係有好多巴黎鐵塔嘅貨品

土豪金鐵塔都有!

玩咗成晚我哋終於番去酒店房休息啦

今次我哋住嘅係南翼房間,指示好清晰,就算冇地圖都好容易去到

房間係屬於家庭式「天倫大床客房」一張大床+上下格床,室內環境仲好色彩繽紛,小朋友見到都好開心!

最得意呢度有塊黑板牆,可以喺度亂畫同玩磁石!(但係又唔見有粉筆…)

最好笑係呢個玩具箱,我以為裡面一定收埋好多玩具,點知一打開個箱只係得本圖書仔

佢哋兩個沖完涼就Set好位喺度睇電視嘆世界

好開心今次收到巴黎人送俾我哋嘅紀念品,有個巴黎鐵塔鎖匙扣同埋一個國際版萬能插蘇

唔駛講兩個鍾意呢張床,爬上爬落,一於叫佢哋坐喺度俾我影番張相

到咗第二朝起身,見佢哋好唔捨得間房,所以再幫佢哋同間房影多幾張靚相!

媽咪最鍾意牆上面嗰兩盞汽球燈!

哥哥就最Like呢幾個Macaron Cushion

芊芊最鍾意就梗係個巴黎鐵塔啦,就算佢依家平時喺街度見到佢都會即刻諗起呢個澳門巴黎人

然後我哋出發去食早餐啦,今日我哋預約咗去參加功夫熊貓之舞林盛宴,可以邊食住早餐邊睇Show

由巴黎人可以行過去威尼斯人酒店,然後再沿天橋行過去金沙城中心,不過我行過一次,最後發現都係行出去條街過馬路係最快,又或者可以搭穿梭巴士到達

去到金沙城中心就會見到呢個招牌,再搭扶手電梯上兩層

右邊係功扶熊貓學堂,左邊先至係我哋要去嘅舞林盛宴

因為我哋遲咗少少,但係都可以被安排到好前嘅位置坐

早餐係自助餐式,我哋兩老就周圍搵嘢食,佢哋兩個大帝就好嘆咁坐喺度睇史力加表演

好嘢到主角阿寶出場啦!

表演完之後就安排各位可以上台合照,都唔知係咪想谷我幫襯佢官方相,所以個職員影成咁!

等我自己補番張先!

最特別係有幾款特色食物!

本來以為完咗,原來仲有其他角色繼續出場,去到每一枱同大家影相,我相機都未停過,影完一個想坐低食嘢,另一個又嚟緊!哈哈~

真係㗎喎,叫職員幫我揸機,佢又影到咁啦

個Show終於完啦!可以坐低慢慢食

兩個食完捉住我話要去繼續影….係真㗎!真係唔係我迫佢哋去影,證明佢哋真係超興奮!

如果大家想買番官方為你哋影嘅合照,喺離開嘅時侯職員會主動搵番你,價值$180一張!

我哋食過早餐之後番房執行李Check-out,芊芊知道我哋就嚟出發去睇MJ,就已經好開心!點解佢會識?因為我一早就同佢哋喺Youtube煲熟咗幾首歌

(明明就dup低頭,芊你做咩向上望㗎?)

我哋喺南翼落到5樓一出就已經係巴黎人劇場,非常方便!

我哋入到去先寄存行李,然後就入場睇SHOW啦!

開場前影番張相先(溫馨提示:如果小朋友坐唔夠高可以問職員拎坐墊)

兩個忍唔住又要扮多次MJ…笑死我

準備開SHOW啦!

因為場內係嚴禁拍攝,我都好守規矩嘅!哈哈~所以就俾番幾張官方相大家望吓

成個Show真係由出道嘅MJ介紹到最後期嘅MJ,由幾位唱功好勁嘅歌手去演譯MJ名曲,起初幾首慢歌都真係唔係太識,直至中段開始,BadBeat it!DangerousThrillerBlack or WhiteEarth Song全部都有!

每首歌前奏一起全場就尖叫啦,估唔到下晝場都可以咁好氣氛!4位歌手當中有一位係女人,估唔到都唱得好好!超有Janet Jackson影子

除咗4位歌手外,仲有一位模仿MJ的朋友,真係有9成似㗎,尤其係當佢Moon Walk嘅時侯真係好感動…我同哥哥都大叫!

仲有45度傾斜,真係型到震!到依家我都唔係好明點做到~

到最後一連寸跳舞快歌全場觀眾起哂身!超High超爽,我唔知點解睇到有少少感動好掛住MJ!睇完場Show,準備去搭船番香港…但係喺個腦度一路喺度….Thriller….Thriller night!

最後我哋都要同巴黎人講聲拜拜,今次個旅程真係玩得好開心!我哋搭番Shuttle Bus去番Taipa碼頭搭船番香港!

Photo byCANON 5D Mark III,Len|EF 24-70mm f2.8L USM

想跟我去體驗其他活動,快D報名親子團,同埋留意專頁公佈詳情啦!

http://goo.gl/forms/CNZMEPoMIWkouK8o2

呀劍評分:10分

呀劍評語:雖然澳門巴黎人只係三星級酒店,但係由踏入去第一步,由大堂至酒店房間,都完全唔覺!仲有當你企喺巴黎鐵塔前嘅時侯,真係覺得好震撼好靚!

《Q立方王國》簡介

Q立方王國擁有超過20,000平方英尺(1,858平方米)的室內及室外遊樂區,炫彩波波池、城堡主題的攀爬架、具有挑戰性的攀登太空艙、滑滑梯、可愛的旋轉木馬等各種遊樂設施,無論大孩子還是小朋友都能樂在其中!

地點

澳門巴黎人6樓


開放時間

每日上午9時30分至晚上9時30分

費用(包括室內和室外空間):

週一至週五:首兩小時澳門幣$120

週六及週日:首兩小時澳門幣$150

儲物櫃:$20

=================================

《御蓮宮》簡介

色香味是中式美食的象徵,御蓮宮的每一道菜均力求極致。品味海鮮、火鍋、粵菜、點心及中國特色菜餚,豐富而不失純正精緻,並嚴選優質食材,再經名廚烹調最佳口感,讓您品嚐到傳統中式美食的精髓,體驗味覺盛宴。

地點

路氹城路氹金光大道連貫公路澳門巴黎人3樓


開放時間

星期一至日: 11:00-00:00

電話

2882 8833

=================================

《Venetian Macao Open》簡介

為了讓球迷可以好好現場觀賞世界級球星在「威尼斯人澳門高爾夫球公開賽」的賽事,今年在澳門高爾夫球鄉村俱樂部設有一家大小的活動與公眾同樂。 由於去年的「兒童天地」深受歡迎,因此今年我們繼續為小孩及家長提供一系列的節目,令他們可以感受到比賽以外的樂趣。 當中包括多個互動桌上遊戲、面部彩繪,以及高爾夫球入門訓練班,讓他們可以初次體驗高爾夫球的樂趣。一小時的入門訓練班由今天比賽的球手Sam Brazel 及曹一負責教導小朋友。

地點

澳門路環黑沙馬路1918號澳門高爾夫鄉村俱樂部

電話

(853) 2887 1188

=================================

《千喜膳日本料理》簡介

千喜膳日本料理由經驗豐富、創意無限的廚師團隊主理,以獨特嶄新的烹調手法,演繹出美食與藝術相融合的創意料理。店內的裝潢雅致,富有空間感,並設有多間格調舒適的貴賓房,其中一間設有鐵板燒枱,讓尊貴的客人可以細意品嘗廚師即席製作的佳餚,而最大一間更可容納二十多人,適合宴饗商務夥伴或好友相聚,同時備有多款會席料理以供選擇。

地點

巴黎人購物中心3樓圣奥诺雷路349號舖


營業時間

星期日至星期四: 早上11:30時 至 晚上11:00時

星期五, 星期六及公眾假日前一天: 早上11:30時 至 晚上12:30時

電話

(853) 2877 0139

=================================

《澳門巴黎鐵塔》簡介

巴黎鐵塔依照艾菲爾鐵塔1/2比例建造, 並設有超過6,600只絢麗閃亮的景光燈,為您呈現浪漫璀璨的光影藝術, 閃耀澳門夜空!繽紛璀璨的巴黎鐵塔燈光秀,即將為您每晚徹夜點亮,她是澳門獨一無二的亮麗風景,也是令人心之嚮往的浪漫聖地!您可以發揮獨特的心思,讓澳門巴黎鐵塔亮起您愛人的名字或是真情祝福,讓更多人見證您的動人故事,讓愛與浪漫綻放耀眼光芒!

地點

從五樓巴黎鐵塔紀念品商店550号可至主入口


開放時間

每天10:00 – 22:00(視天氣情況而定)

巴黎鐵塔訂票電話

+853 8111 2768 / +853 8111 2763

巴黎鐵塔燈光秀

每天18:20 – 00:00,每15分鐘一次

*敬請留意:澳門巴黎人響應並支持“地球一小時”活動,鐵塔燈光秀將在每月第一個週二20:30-21:30之間暫停演出。

門票

觀景台 週一至週五費用(澳門幣) 週六、週日及公眾假期費用(澳門幣)
7樓 & 37樓
成人 $168 $188
小童
(12歲或以下)
$138 $158
7樓
成人 $98 $118
小童
(12歲或以下)
$68 $88
家庭套票 – 兩名成人+ 兩名小童(12歲或以下)
僅7樓 $288 $350
7樓 & 37樓 $528 $590

=================================

《「體驗夢工場」功夫熊貓之舞林盛宴》簡介

《功夫熊貓》阿寶和一眾夢工場動畫巨星誠邀您一同享用星光熠熠的“舞”林盛宴,欣賞巨星們的精彩舞台表演﹗記得準備好相機和與您喜愛的動畫明星盡情合照,締造難忘回憶﹗除了星級演出外,當然少不了多不勝數的動畫主題美食及甜點;千萬別錯過這最炫酷的功夫主題早餐。

地點

澳門金沙城中心四樓烏魯木齊宴會廳


時間

星期六至一:早上10 時至11 時30 分

星期二至五:早上9 時至10 時30 分

電話

+853 8113 7915

+853 8113 7916

電郵

[email protected]

費用(包括室內和室外空間):

成人: 澳門幣238+

小童: 澳門幣138+

家庭套票(3位家庭成員+1位小童): 澳門幣688+


=================================

《Thriller LIVE》簡介

已連續公演8年的THRILLER LIVE不斷推陳出新,風靡英國倫敦西區,至今已踏足全球30個多國家,演出超出5,000場次,逾四百萬觀眾入場欣賞,贏盡讚歎!巨星米高積遜「漫步月球」至國際,最終以澳門作其下一站的「登陸」地點。 最新落成的澳門巴黎人即將呈獻精彩絕倫的THRILLER LIVE,這將是澳門巴黎人正式開幕後,首齣在巴黎人劇場公演的節目。

地點

巴黎人劇場


表演日期

2016年9月30日至11月13日


門票價格

A區: 澳門幣/港幣 $ 480

B區: 澳門幣/港幣 $ 280

C區: 澳門幣/港幣 $ 180

(以上資料更新至文章當日)