老黃瓜赤扁豆素湯｜健脾袪濕消腫解毒、 一家大細都爭著飲！

老黃瓜赤扁豆素湯

老黃瓜有消暑清熱、降燥火利水、解毒功效；赤小豆就利水除濕，和血排膿，消腫解毒；扁豆可以健脾和中，消暑化濕；紅蘿蔔利尿消炎；粟米健脾和胃，利水通尿，益肺寧心；陳皮主治脾胃氣滯、脘腹脹滿或疼痛、消化不良；蜜棗止咳潤肺、化痰平喘功效。(網上資料)

材料：

老黃瓜一個、粟米一條、紅蘿蔔一個、赤小豆一両、扁豆一両、腰果兩両、陳皮一角、蜜棗三粒~

做法：
赤小豆、扁豆、腰果及蜜棗浸洗一陣~

老黃瓜去籽切大塊~

紅蘿蔔去皮以滾筒式切塊~

粟米去皮洗淨切塊~

陳皮浸至軟身，然後刮囊~

煲內放約2.5L水，然後隨水加入陳皮~

待滾起後，加入所有材料~

繼續用大火加蓋煲約15分鐘~

之後轉慢火加蓋煲多1.5小時~

最後加鹽調味，就可以飲得啦~

其實我都有一段時間冇煲素湯，因為我家兩位老細都係食肉獸，總係覺得有肉落肚先叫好，一聽到話係素湯都會有點……。但今次佢地飲完都話唔錯，清清甜甜又有黃瓜嘅香，每人兩大碗就清晒成煲湯啦！
老公仲叫我多啲煲素湯，咁就可以飲得清淡啲又可以健康啲！(我當然唔介意，只要係地肯飲我就一定會煲，而且煲素湯功序係少啲啲之餘，又可以慳返買豬肉嘅錢嘛…..哈哈哈)
溫馨提示：
– 由於涉及藥材成份，個別人仕體質會有所不同，所以大家記得煲之前了解下自己，如有疑問，請先向註冊中醫查詢！