台北親子遊之小朋友職業體驗城

Mar 15 2016 - 18:42

台北親子遊，除咗動物園同貓空纜車，最啱同小朋友去嘅一定係呢個BabyBoss職業體驗任意城，可以比佢哋去體驗唔同嘅職業，每做完一份工都會有糧出 (代用卷)，臨離開之前可以買返自己鍾意嘅紀念品。

好！講吓點去先。
第一日我哋遊完小巨蛋，諗住一邊逛吓街行過去，但行咗好遠先到；第二日搭捷運到中山站搭的士去好快就到。

未到營業時間閘口已經排哂長龍，因為每一個職業都每一節都有限人數 (約10-15位)，有好幾個特別好玩又受歡迎嘅職業，如警察、消防員、救護員、機師等等，一定長期滿額，所以大家都會趁一開場就拔足狂奔到目標地點。先排最難排嘅項目，而每到項目完成嘅時候，就會見到各爸媽搶住要先接自己嘅小朋友，然後再奔跑去下一個心儀嘅職業果度排隊。

由於每個項目都一定要小朋友自己排，每次排隊時間由20分鐘到50分鐘不等，除左去洗手間之外唔可以走開，要乖乖坐定定排，大個少少嘅小朋友會比較有耐性同明白要玩就要排隊，眼見其他年齡較少嘅小朋友，都會等到唔耐煩、會坐唔定、會扭計，所以爸媽們要有心理準備。

每個職業都會有相關嘅資訊同體驗，仲會好細心安排影相位比各位家長。

羲廷分別做咗太空人

機師

救護員

有模擬受傷處理

仲有得坐救護車添好迫真

下頁：做小廚師整真pizza

仲做左小廚師學整PIZZA

上PIZZA班交$50代幣 (定$35 失憶症發作添**) ，即是你之前要先去做其他職業，賺到錢之後先可以玩到呢一個項目。

玩完呢幾個都已經好攰，爸爸媽媽應該更攰，全日不停排隊四圍走，每次排隊都想盡方法傾計、講故事、唱歌，連搶答環節都玩埋，務求每一節都可以又期待又開心咁等。

BabyBoss職業體驗任意城
適合：3-12歲小朋友
簡介：場內有50種工作場館、70種不同職業可以選擇。