減痛及助產呼吸法課程

Aug 20 2014 - 22:54

選擇順產既媽媽真係需要好大勇氣，因為一定聽過唔少人講有幾痛幾辛苦，痛幾十個鐘之類！聽到係會心慌慌，但係大家都知道順產一定係對媽媽同BB最好既，而且復原得較快，所以都一樣無懼去嘗試！

如果你同我一樣選擇順產既，我非常鼓勵你去報讀減痛及助產呼吸法課程，因為上完確實令自己信心大增，亦都更加了解生產過程，同可以學習係陣痛時減痛既方法。上網搜尋呢一類課程都有好多唔同機構舉辦，不論去邊間相信都一定有幫助，當然搵一間較大或有信心既機構啦，一般都係搵資深既助產士作講解，所以絕對可以解答到你既疑問！

課程可以同先生一齊上，有先生陪伴佢亦可以更加明白太太生產時既辛苦，同時亦可以學習到係陪產過程點支持太太，係我上呢一個課程的導師更會邀請每位先生親身感受生產過程，雖然感覺點都唔會一樣，不過每位太太見到自己先生做示範都會表露出甜絲絲既笑容，過程真係好有趣同有愛。