新生嬰兒黃疸 ? bb 無大便? 湊仔必經之路

新生嬰兒黃疸 ? bb 無大便? 湊仔必經之路

茄蛋仔四個月大喇!今次茄蛋媽想湊湊熱鬧,開題講產後幾個月 湊仔 忙甚麼,各位媽咪有無遇到以下種種呢?新生嬰兒黃疸 ? 胎毒爛面? 人奶惹痰卡痰?bb 無大便? 鼻塞? 戒夜奶 ?先戴頭盔,此篇只在於分享個人經歷,絕無意褒貶任何人之意。
撰文︰茄蛋媽

1. 新生嬰兒黃疸

茄蛋媽照顧蛋仔第一個月最大感受:好眼瞓。好多人都話:「BB瞓你咪瞓囉」,之但係,每個bb嘅作息、健康狀況都唔一樣。

蛋仔未出院就出現 新生嬰兒黃疸,頭幾日進出醫院照顧蛋仔真係好攰,主要係要泵奶到醫院比蛋仔食比較頻撲。不過果幾日蛋媽都有好大得著,因為姑娘貼身教點換片、用杯餵奶、掃風,對於新手媽媽黎講都算係好事,返屋企前上照顧BB嘅速成班。健康院因為蛋仔黃指數唔合格先後兩次轉介返醫院抽血驗指數、肝功能,令坐緊月嘅蛋媽既擔心又疲累,到第三個月終於完全退黃放心喇。

黃疸 抽血
茄多仔未出院就發現新生嬰兒黃疸,進出醫院幾次抽血驗肝功能,紗布仲大過隻手。

 

人奶標籤
儲存人奶時要貼好標籤,姑娘就知道餵邊樽先

 

新生嬰兒黃疸
新生嬰兒黃疸,要照燈,又蒙眼又無衫著,蛋媽見到蛋仔咁樣就喊咗

 

頭一個月每日做紀錄,方便了解BB作息飲食時間進程
頭一個月每日做紙本紀錄,方便了解BB作息飲食時間進程,健康院姑娘會問㗎

 

2. 餵夜奶

頭一個月BB胃仔細食多餐,蛋媽同好多媽媽一樣,晝夜不定時餵食,加上bb吸啜能力未係好叻,每次餵奶都花近一個鐘或以上,搞掂掃風、bb瞓覺,下餐奶又差唔多嚟喇。

餵夜奶
餵完奶唔可以立即瞓低bb怕佢嘔,唯有抱在心口一陣等落隔,有時抱抱下蛋媽會瞓著咗

3. BB好多痰

蛋媽係全人奶媽,但蛋仔竟然食到痰上頸, 卡痰 令蛋仔成日抖唔到氣喊,日夜都瞓唔到,最瘋狂試過全日只瞓咗5個幾鐘,睇過醫生用咗噴鼻劑效用不大;又聽講 肥仔水 化痰,但食完兩次都狂嘔,日夜不停拍痰拍到蛋仔幾乎甩肺,蛋媽幾近崩潰。

後來茄蛋媽懷疑因為自己感親有痰,而由人奶惹比蛋仔,所以又比蛋仔食 保嬰丹 ,食咗半次又有少少擔心咁細個唔受得,所以自己食 猴棗散 ,希望由人奶過比蛋仔,終於第二個月中就好返七七八八喇。

BB卡痰
卡痰令蛋仔無覺好瞓,只好用斜角枕托起令佢呼吸順一點
噴鼻劑
醫生處方噴鼻劑

 

肥仔水
肥仔水

4. 胎毒粒粒爛面

第二個月蛋仔身體、面仔開始出好多粒粒,聽講係 胎毒 ,粒粒生長嘅情況好嚴重,一度令蛋媽認為蛋仔會毀容,好在經過多重保養,皮膚終於靚返晒。

首先婆婆每日幫忙用 金銀花 煲水比蛋仔沖涼,一整煲都係金銀花,一d都唔慳皮,話說d金銀花價錢都幾貴,一小包已經成舊水,我地沖過兩三星期,見粒粒好返好多後就改為重點抹患處。

另外,茄蛋媽每晚臨瞓前都會同蛋仔做 人奶面膜 ,直接用人奶敷面過夜,面上粒粒第二日就結焦剝落,過程係幾惡頂,因為好似出曬血就快裂開咁,好在BB 新陳代謝快,呢頭敷完人奶,兩三日就好返,所以唔好睇小自己嘅奶,既天然又有效。

胎毒爛面
胎毒爛面,好得人驚,如引起不安,敬請原諒

 

 

金銀花水
金銀花水
胎毒爛面
胎毒每BB成塊面出粒粒,繼而爛面,情況都幾令人不安
做完人奶面膜好快好返
胎毒爛面,用人奶敷面一兩日好轉,甩皮後就靚仔返

5.戒夜奶

講到 戒夜奶 ,蛋媽真係好恩惠,因為蛋媽無刻意餓佢成晚,三日就成功令佢連續瞓6個鐘,順利戒夜奶。開始時將尾奶安排到12點,當時都要餵4點,第二日拖延到5點,到第三日佢自己瞓到7點先起身。

BB瞓咗,媽咪就可以爭取時間恰一怡喇
BB瞓咗,媽咪就可以爭取時間恰一恰

6.頭泥

第二個月開始蛋仔個頭好臭,無論每日點勤力洗頭,隔一陣又會有陣酒味好惡頂,到發現佢個頭出現硬皮先知道係頭泥,坊間提到用油洗頭泥好有效,但茄蛋媽唔想整到油淋淋,用咗隻專洗頭泥嘅洗頭水,兩星期就KO頭泥了,唔笠又香噴噴。

頭泥
頭泥

 

7. 教bb瞓覺

蛋仔同好多bb一樣,都唔識自己瞓覺,要佢按時瞓覺,每晚都要同佢搏鬥一輪,唱歌、聽歌、搖床、抱抱,樣樣都試齊。食完尾奶,好彩嘅話佢會好眼瞓而自己瞓咗,唔好彩嘅話佢會扭眼瞓喊、狂捽眼捽面,試過扭到晚上兩點都未瞓到。

聽講bb係需要訓練先識得自行入睡,當中要經歷忍著bb瘋狂大喊而唔可以抱佢,蛋媽試過一次由得佢喊,喊到攰就瞓著咗,但過程太殘忍,我地後來以「陪伴、幫助」方式教佢瞓覺,第三個月已經令佢識得自己合起眼培養瞓覺情緒了。

Bb瞓覺
茄蛋奶瞓喺蛋仔旁邊佢就會自己入睡,一個月多就一覺瞓天光戒埋夜奶喇

8. BB無大便

人奶b大便質地都係好水,頭個月大概有8次或以上大小便,但到第三個月蛋仔開始愈來愈少大便,有次連續兩日都 無大便 ,心急死蛋媽,幾乎帶去睇醫生。後來有經驗嘅朋友教路,原來全人奶b唔會日日大便,朋友個b試過兩星期無大便,暫時蛋仔最長試過4日咋。據講因為人奶好易消化,所以身體吸收晒無需要排大便喔。

Bb大便狀況
BB唔同階段嘅大便狀況

 

9. 鼻塞

最後要講bb 鼻塞 ,呢樣野令蛋媽感受良多,因為蛋仔第一次鼻塞發生喺深夜,3個月大左右,有一晚佢3點幾瘋狂咁喊,我當時無深究發生咩事就塞咗個奶嘴比佢,但唔夠10分鐘又喊,來來回回三次,蛋媽發好大脾氣鬧佢,開燈準備餵奶,見到蛋仔好可憐地打開口抖氣,成個下巴都係口水,原來佢一直都抖唔到氣。

原來空氣濕度低會令鼻垢硬咗,大人會識得自己整出嚟,BB就慘喇,會塞住抖唔到氣。當時蛋媽無細心理會,到而家都好自責,因為自己個性衝動又大意令蛋仔受苦。好在蛋爸好細心處理呢件事,首先比蛋仔聞蒸氣,再用棉花棒將鼻屎挖出嚟,蛋仔立即抖返順條氣有覺好瞓。

吸鼻器
呢款吸鼻器效用麻麻,主要係吸力唔夠
吸鼻器
推薦呢款吸鼻器,出入管分開,用口吸鼻涕都算衛生,而且百發百中每次蛋爸都可以成功吸走蛋仔嘅鼻屎

幾辛苦都值得!

呢四個月大概就咁過咗,除咗第一個月最難捱,之後幾個月都算穩定落嚟。對於轉成全職湊仔婆嘅茄蛋媽嚟講,而家嘅生活的確係有D悶,覺得自己無生產力、無咩作為,唯有將副心機放喺蛋仔身上,每日同佢唱歌傾計,睇住佢每日長大、牙牙學語、識玩識笑、手舞足蹈,真係無價。

茄蛋仔
茄蛋仔

更多精選內容