爸爸主題繪本餐廳 PAPA親子餐廳

淺藍色外牆望落非常舒服，早上下午茶時段仲可以直接買咖啡麵包，勁有歐洲Feel

店裡面裝潢好簡潔清新，我自己就最鍾意光線充足的餐廳，真係坐落舒服到唔捨得走

無意中發現有張團隊大合照，睇見全店職員上下都好齊心

其實”PAPA”可以話唔係一間親子餐廳，老闆原來係四位無花無假的真爸爸，佢哋四個PAPA得閒無事就會鍾意周圍去搵邊度有好嘢食，所以識飲識食最後就自己開咗呢間”PAPA”

我哋先試試老闆推介的Apple Juice，這品牌的果汁係用Cold-pressed技術將水果製作，讓果汁味道更濃洧好味，仲有啖啖果肉！

睇吓，杯蘋果汁的顏色都唔係我一般認知嗰種顏色

飲落仲唔會好似一般蘋果汁有少少酸澀味，反而係非常Fresh！

先來個餐湯，西蘭花忌廉湯配。餐湯好滑又夠味，唔會感覺好水，仲啖啖西蘭花蓉；麵包仲非常咁軟熟，好好食呀…

特別介紹 PAPA Salad，總共有6種顏色，每款顏色代表不同蔬果。我哋揀咗 PAPA Orange，有鮮蝦，沙律菜及多款切片水果，最緊要配上特製的芒果醬，將所有鮮味帶出來，仲非常之香！

我同哥哥 Order 了一碟Roasted Fish Fillet in Lemongrass & Lime Butter Sauce with Risotto

他們所做的Risotto 意大利飯，飯粒帶點硬度(這是最正宗的做法)，魚柳煎得好香好入味，外面薄薄的脆口，魚柳肉好軟滑，入口溶化，自己滑咗入喉嚨…連哥哥都讚不絕口

食到咁上下，還有一客碳燒牛扒未上，就同哥哥看看”PAPA”店內提供的繪本。

全部繪本都係關於爸爸㗎！突然自我感覺良好，覺得好有地位…

其實爸爸雖然成日有點粗心大意，照顧得未必夠媽媽細心，但係好似呢幾本繪本的故事內容，爸爸真係好多變，係一個寶礦嚟架。

哥哥安安落落坐一旁，邊看書，邊吃沙律，感覺很自在！而我也可以舒舒服服咁用餐

壓軸出場 Char-grilled U.S. Rib Eye Steak，見到個樣都流哂口水，我叫咗 Medium，但係一

D血水都冇，切開裡面是粉紅色的，就知道塊扒質素甚高，外面燒得香香，一食入口就Feel到陣碳燒香味，然後牛肉味再跟住出，肉唔”un”入口溶化，100分…

哥哥好少鍾意据扒，但係我切開同佢分享，佢一食就追住要！(總之叫多份啦)

最後哥哥又繼續番去睇書，仲問我攞埋紙出嚟畫畫！

連我都好想繼續喺度坐，休息一下，慢活一下。

今日好去處終於到我做主角啦

餐廳外仲有個大大的露天廣場，食得飽飽仲可以帶埋燈籠到外面，玩玩走走後再食過

Photo byCANON 5D Mark IV,Len|EF 35mm f/1.4L USM
呀劍評分:10分

呀劍評語:餐廳食物質素極高，環境清新舒服，仲有繪本個空間可以俾小朋友看看書，實在適合一家大細。今次爸爸們可以大大聲拉大隊去食番餐好啦，再同小朋友一齊睇書，親子親子一番！

招牌菜

PAPA Salad

Char-grilled U.S. Rib Eye Steak

營業時間

Mon-Sat 8:00-22:30

Sun: 10:00-22:30

地址

沙田石門安群街3號京瑞廣場一期地下G09號舖

交通

港鐵石門站 C 出口

電話

3460 3050

(以上資料更新至文章當日)