【Cafe Roma親子餐廳】芬蘭理念-馬灣臨海親子餐廳
撰文＋圖片：呀劍萬帥 編輯：Sunday Kiss
去馬灣成日都覺得好遠，其實除咗由中環碼頭搭船過去珀麗灣外，仲可以到青衣或葵方搭NR330，幾乎每10分鐘就有一班$9.5，而且都只係花10-15分鐘就到。
Cafe Roma就位於馬灣東灣沙灘旁，只要在沙灘廣場落車，然後行幾步搭Lift落去地面一轉左就係餐廳，方便到爆！
餐廳裝潢充滿歐陸氣息，未入去都已經感受到陣渡假氣氛。Cafe Roma由芬蘭藉集團行政總廚Jaakko Sorsa主理，精心炮製小朋友最鍾意嘅美食。
由於餐廳跟馬灣沙灘相連接，一出餐廳外就已經係沙灘，所以小朋友未坐䁔張櫈就嗌住要出嚟玩。
餐廳都專程為小朋友準備多款沙灘玩具，小朋友可以食飯前後到外面玩沙。
嘢食未到之前，哥哥就帶埋芊芊出去外面玩沙，我同媽咪可以好放心喺餐廳裏面飲住杯嘢傾下計，因為只係隔住塊玻璃窗就可以清楚睇見外面小朋友玩緊嘅情況。
超細心的預備，餐廳好知道小朋友的喜好，安排埋多個水桶，小朋友可以邊玩沙邊玩水。
餐廳亦都唔介意小朋友赤腳走出走入，實在感覺好貼心好舒服。
兩兄妹玩玩下又走入嚟填顏色(都係餐廳有提供喔！)
完成一張仲有好多唔同款色俾佢哋選擇。
就連平時油幾下就嗌攰的芊芊，呢日油唔停。(睇嚟環境真係直接影響心情)
食物到啦！都唔需要等好耐(因為我最怕等)，上完一道又一道菜，而且仲要每道菜式都超正。
「香脆雞條伴蜜糖芥末醬」雞肉唔會炸到乾哂，裡面肉質仍然好滑好Juicy，配上蜜糖芥末醬特別好味。
香脆雞條伴蜜糖芥末醬Crispy Chicken Strips with Honey-Mustard Dip (HK$88)
「蟹肉牛油果沙律」我真係冇誇張，簡直係我未試過嘅味道，感覺好Fresh，牛油果食落唔會好「漏」，同蔬菜好夾，食完一啖即刻想食第二啖，不過係不定期推出嘅Daily Special！如果想食就要睇吓綠份啦。
這個「焗法國軟芝士」口感好過癮，明明咬落去外面脆脆哋，但係裏面的芝士軟棉棉，配上松子(我超喜愛)真係特別好味。
焗法國軟芝士配白松露油、迷迭香及松子
Baked Camembert Cheese with White Truffle Oil, Rosemary & Pine Nuts (HK$128)
Carbonara係我哋去到任何餐廳必食之選，而呢度嘅「黑松露卡邦尼闊條麵」，可以話係我食過最好味，因為佢意粉係用上Pasta Mancini(來自意大利中部馬其)，總之就係好頂級的意粉。
黑松露卡邦尼闊條麵 Fettuccine Carbonara with Black Truffle (HK$148)
黑毛豬扒烤得好香，肉質好「林」好入味。
香烤美國黑毛豬扒 Grilled US Kurobuta Pork Chop (HK$208)
我自己鍾意食餅底好薄的Pizza，同埋配上Parma Ham特別Match。
意國風情薄餅 Italian Pizza (HK$148)
「甜品拼盤」都係每次嚟未必一樣㗎！因為每個時節當造的水果也不同，而且唔同水果都應配上唔同的做法。
甜品拼盤 Dessert Platter (HK$138)
大人唔駛擔心以上美食要同小朋友分，因為小朋友個兒童餐Kids Set仲吸引。
Cafe Roma x Marcus & Marcus 兒童餐 (HK$88)
– 是日餐湯
–番茄長通粉 或 兒童薄餅
– 新鮮雜果
– 果汁
唔問都唔知道，原來呢份兒童餐用上的餐具，係來自加拿大兒童餐具品牌Marcus & Marcus，餐具物料係以矽膠Silicon製作的，哥哥用上藍色的河馬造型，芊芊就鍾意黃色的長頸鹿造型。
哥哥真的心情好好喔，仲要戴上口水巾去配合，但佢真的還用得上。(陶大宇掩眼)
Cafe Roma x Marcus & Marcus 兒童餐 (HK$88)
佢哋特別喜愛嘅西瓜汁。
Jaakko Sorsa特別注重每一個細節，原來除咗不加味精外，就連用上的茄汁，都係佢自家配方，令小朋友食得好味又健康。
我通常小朋友講好食嘅嘢都唔健康，健康嘢食就一定唔會好好食，但呢度全部用上新鮮蔬菜食材，小朋友可以食得健康，而且廚師又整得咁好味，睇嚟我呢個定律要被推翻喇！
餐廳還提供多款兒童繪本圖書，最啱俾小朋友食飽休息一下睇睇書。
呢本Peppa Pig睇得又玩得！
哥哥特別喜愛看書，所以睇完一本又一本。
餐廳外面就係東灣泳灘，小朋友整裝待發，跑出去海灘繼續玩啦！
身後就係超美的青馬大橋靚景，梗係要打打咭啦！
呢日海水都特別乾淨，加上又唔多人，小朋友都玩得好開心。
仲有一樣最開心嘅地方，就係餐廳會讓小朋友帶埋沙灘玩具出海玩，唔駛自己喺屋企帶埋出嚟，不過大家記住一定要有借有還，玩完之後要執番齊還番俾餐廳喔！
超美超值得推介的一間親子餐廳喔！
想跟我去體驗其他活動，快D報名親子團，同埋留意專頁公佈詳情啦！
http://goo.gl/forms/CNZMEPoMIWkouK8o2
呀劍評分:10分
呀劍評語:真心真心真心推介！(重要的講3次) 除了環境真的悠美連接東灣泳灘，而且所有服務都很貼心，兒童餐及餐廳外的嬉沙區，加上用餐後可到海灘繼續玩，真的可以消磨這個下午。再補充，其實又葵芳或青衣出發，真的很方便，沒想過15分鐘內便到！
Cafe Roma
地址:
香港珀麗灣沙灘商場地下 7-8 號舖 (馬灣東灣泳灘右側)
營業時間:
12:00 – 23:00
電話:
3446 1226
交通：
http://www.pitcl.com.hk/tc/bus_service.php
(以上資料更新至文章當日)
Facebook專頁:呀劍萬帥 kimfamilytravel
Blog網誌 :www.kimfamilytravel.com
