開胃消暑 香茅檸檬葉水

帶小小豬去九龍城玩樂之後,就到我行街街嘅時候,因為九龍城一帶有好多泰式香料店,入去行下就可以買到唔少調味料。今次我又八八卦卦咁聽到店員教煲依個泰式特飲 – 香茅檸檬葉水 啦!

 

 

撰文:小小豬的成長日誌
圖片:小小豬的成長日誌

香茅平時都係用嚟煮嘢食,我都真係冇諗過係可以煲水飲。不過店員同我地一班師奶仔傾開計,佢用半咸淡廣東話介紹話煲依個泰式特飲係好好,有助預防傷風感冒,消除飽滯同埋開胃消暑。見佢講到咁好,材料又唔貴,加上可以又好易煲,所以就買齊材料試下啦!

材料:

用左約12支香茅、1包檸檬葉、2粒青檸同埋幾粒冰糖就得,成本都只係$25呀~

做法:

將香茅拍爛,然後切幾段;檸檬葉就洗乾淨備用~

青檸渣汁待用~

煲內放入2.5L水,然後加入香茅及檸檬葉~

煲滾水之後,加蓋轉中火煮15分鐘~

因應個人口味加入適量嘅冰糖,再煲多10分鐘~

熄火後就要即刻夾起啲材料,因為如果浸得耐,個涼茶就會有一重苦澀味呀~

之後就加以加入檸檬汁~

攪勻後就可以飲得啦~

其實係煲嘅過程都已經有好清香嘅檸檬葉味,所以都有一點點嘅期待。所以一煲好我就已經急不及待嚟個暖飲,味道又真係唔錯,有一種好FRESH,而且係非常解渴,雪凍就仲好飲,所以依款可以話係夏日消暑解渴之選,炎炎夏日時真係要煲多啲呀!

 

BY 小小豬的成長日誌

你又點睇?

更多精選內容