離婚可以好簡單 但牽涉到小朋友 請深思熟慮

好似案中的小妹妹，在一個複雜的家庭中長大，未夠一歲，父母便決定離婚，佢哋做呢個決定之前，有無諗清楚。

世上沒有100分合適的人，夫妻相處無可避免有拗撬，有意見不合的情況，但問題是怎樣去維繫。

小朋友咁細，應該歸邊個照顧呢？就算跟邊個，另一個都會唔捨得，更加確保唔到對方的另一半可以視自己的小朋友如親生骨肉，畢竟社會上太多負面新聞，亦都有太多估唔到嘅人，唔知會對你嘅小朋友做啲咩。

所以為咗啲小朋友，作為父母的，要作出離婚呢個決定，一定要諗清諗楚。

同對方係咪一定行唔到落去呢？

可唔可以再好好同對方溝通下呢？

問題係咪咁嚴重呢？

係咪離婚就可以解決到問題呢？

最重要的問題係，離婚後，啲小朋友點算呢？

由第二個人去照顧自己的小朋友，你又係咪真係放心呢？可唔可以俾到同親生父母同等分量嘅愛個小朋友呢？

我相信每個人都人壓力，但作為成年人，係咪應該可以好好控制自己唔好將啲壓力發洩喺小朋友身上？先撇開唔好話暴力，就算對住小朋友發脾氣、語氣態度唔好都會好影響到小朋友成長。作為全職媽媽，我都明白有時太集中喺小朋友身上，可能會唔經意就將壓力發洩喺小朋友身上，其實抒發壓力有好多唔同的方法，對媽媽而言，行街、扮靚、High Tea都得；爸爸的話，飲下嘢，同人傾訴、做運動又得。只要等自己有一個喘息的空間，就自然可以減壓。

最後，作為成年人，應該要負返自己的責任，做所有決定前要諗清楚，即使真係要走到離婚呢一步，都要安排好小朋友的去向，因為一個家庭，只要有咗小朋友，做所有決定都唔可以輕率。