海洋公園

【親子好去處】海洋公園Ocean Park 動夏嘉年華2018

專欄

廣告

真係話咁快又到暑假,每年呢個時間都會去海洋公園大玩一番,今年主題由「夏水禮」變做「動夏嘉年華」,入場睇Show勁歌熱舞。(威威天地一樣有得玩水玩泡泡) 同哥哥呀芊由朝玩到晚超High!

雖然今年主題唔係「夏水禮」但係在威威天地同樣有「威威嬉水泡泡陣」(記住只適合於130厘米或以下之小童)

兩個入到場就已經自己搵方法玩。


冇幾耐就開始有「加勒比夏日巡遊」,地點就係夢幻水都附近(即係入場後不遠的大噴水池位置),佢哋會分別在幾個點進行巡遊,包保你喺任何位置都可以清楚睇到。

巡遊以海洋生物、野生動物及雀鳥為主題,即係所有小朋友都鍾意嘅嘢啦!

一眾舞者一齊大跳熱舞,跟住仲大玩水槍,噴到在場觀眾濕哂身,超爽!

哥哥仲俾其中一個外國Dancer帶咗出去跳舞,呢個怕醜仔出到去又望住我唔知點算,真係要帶佢多D出嚟見下世面。

睇到熱辣辣,我地就入去怡慶坊睇集技表演,順便過一過冷河涼涼冷氣。


除咗有歌舞表演外,仲有幾Part集耍高難度動作表演,每個場次都會有不同表演,所以就算你入場睇多次,可能都會遇上不同表演。

芊芊都戴上面罩同舞台上的表演者打咭。

兩個好似參加咗化妝舞會。


呢張合照大家見唔見到個亮點呀…哥哥居然可以自己轉緊隻碟喎。(梗係有人轉俾佢啦~)

到咗夜晚我哋搭個海洋列車去冰極餐廳拆一餐。

兩兄妹一人一架海洋列車造型的兒童食到LamLam脷。

最後仲有個甜品喔!真係正

講真以前嚟親海洋公園都一定玩機動遊戲,今次嚟咁樣玩法都真係幾特別。

夜晚仲有巴西戰舞睇,估唔到佢哋個個咁肥C大隻,但係身手可以咁靈活。


最後到夜晚臨走前,估唔到原來有晚間巡遊,著埋燈真係靚幾倍,同日頭睇嘅時侯感覺好唔同。

可能因為夜晚好黑,哥哥今次再俾人拉出去跳舞就一D都唔怕醜。


最後幾枚煙花結束整個巡遊表演,今日真係興奮度爆燈。

8:30後仲可以免費入場,玩到11:00呀!!!

Photo bySony A7IIIFE 28mm F/2
想跟我去體驗其他活動,快D報名親子團,同埋留意專頁公佈詳情啦!
呀劍評分:10分
呀劍評語:嚟咁多次海洋公園,都係第一次入嚟唔係玩係睇Show,而且節目仲一個接一個好精采,暑假啱啱開始,快D一齊嚟玩啦!

簡介:全新超盛大夏日嘉年華國際勁SHOW 日夜上演。海洋公園打造全港空前盛大的夏日嘉年華,三大重量級勁SHOW矚目上演!首度登場的大型加勒比巡遊全面啟動,浩浩蕩蕩的國際級表演隊伍穿上華麗動物主題服飾,以連場勁舞與你近距離熱情互動!另一重頭演出於怡慶坊火熱登場,集齊高難度奇藝雜技,而海洋劇場就上演世界級韻律泳表演,呈獻極具藝術美感的水上匯演!

地址:黃竹坑道180號
活動日期:2018年6月30日至9月2日
入場時間:早上10時至晚上8時
入場費用:成人$480;小童(3-11歲)$240
免費夜場:逢星期五及六 晚上8時30分至11時正
網址:https://www.oceanpark.com.hk/tc/park-experience/ocean-park-summer-carnimal-2018

(以上資料更新至文章當日)

Facebook專頁:呀劍萬帥 kimfamilytravel

Blog網誌 :www.kimfamilytravel.com