做咗香港人幾十年，今日終於有機會嚟到 珍寶海鮮舫 ！佢哋兩個皇帝終於可以坐到龍椅啦
睇食神同埋味吉陽一都可以見到珍寶王國，今日真係有機會嚟到啦！其實好多香港人都去過，不過自細都好少機會到香港仔，又真係唔知點解一路都冇呢個機會嚟！
自駕遊嘅朋友嚟到呢個迴旋處落車，就會見到碼頭㗎啦！
碼頭分別有3個，但係左邊嘅太白海鮮舫已經沒有營業了，問番船夫叔叔佢話因為少咗好多日本客，所以都營運唔到落去！
至於右邊的碼頭就係接載遊艇客，大家除咗可以喺深灣呢個位置上船，都可以喺香港仔碼頭嗰邊上船
伯伯講咗好多珍寶王國歷史俾我哋知，佢每日就係不停駕駛這接駁船來往珍寶王國
越嚟越近真係好似食神個畫面！去飲茶前吹吹海風真係好有風味！
標誌住珍寶王國嘅龍吐珠！(唔知打風嗰陣會唔會吹走咗粒珠呢？)
周圍都好華麗好靚，突然覺得自己好似去咗外地旅遊嘅感覺！
喺酒樓嘅兩端都設有呢個皇帝龍椅，大家如果鍾意仲可以俾錢著埋龍袍影相
唔知可唔可以著住宮女衫同龍袍食蝦餃燒賣呢？！哈哈～
好開心呢度保留咗傳統飲茶嘅特色，有大排檔可以拎住張咭想嗌咩就食咩！
有經典嘅蘿蔔糕點心車，有陣時同呀姐熟絡咗，仲可以一色3味，即係蘿蔔糕、芋頭糕加馬蹄糕，真係超正！
仲有至愛粥點車仔，仲記得細個叫粥食嗰陣，專登會叫呀姐俾一碗薄脆我
點心平均$40-50左右，價錢都算貴，不過嚟得呢D地方食都預咗
離開咗茶樓我哋落番地下，原來喺酒樓後面有個相片展覽同埋魚場
可以見到一條一條好大嘅魚，呢個位置同埋後廚房真係浮喺水面㗎！感覺真係好得意
最後我哋搭番往深灣碼頭嘅接駁艇番過上岸！呢個體驗實在開心，自己好似變咗做個遊客番去自己地頭旅行
Photo byCANON 5D Mark IV,Len|EF 24-70mm f2.8L II USM
呀劍評分:9分
呀劍評語:一個原本唔應該陌生嘅地方，身為香港人好似點都要嚟一次，而且感覺自己好似去咗旅行，呢個體驗真係幾得意，有機會真係要再嚟！
地址
香港仔黃竹坑深灣碼頭徑
營業時間
星期一至六: 11:00-23:30 星期日及公眾假期: 09:00-23:30
電話
2553 9111
(以上資料更新至文章當日)
