【郵輪假期。海上之旅】

專欄

廣告

從來都冇諗過要喺退休前參加郵輪之旅。直到年多前,野人突然變咗郵輪忠粉,我開始鑽研海上假期係咩一回事 – 郵輪公司有邊幾間?邊架係現時最大嘅郵輪?郵輪上有咩玩?睇下睇下,我都被吸引咗,原來郵輪假期已經唔係以前感覺咁退休人士先會去嘅活動 😛

咁啱喺暑假最後幾日,皇家加勒比國際遊輪旗下嘅海洋航行者號有個由香港出發到台灣嘅5日4夜海上之旅,所以就帶野人「抓住暑假嘅尾巴」,上郵輪玩埋暑假嘅最後幾日 🙂

上船地點喺郵輪碼頭,一落的士已有工作人員Check-in大型行李,行李就會直接被送到船上我地間房門口,呢個安排真係非常好!!!!!因為如果要拖住個大喼行上行落,去辦登船手續然後再去登船都幾麻煩。

搞完唒手續,即刻去睇下間房 🙂 由於我地訂房時間比較遲,4人房已經全滿,所以我地一家四口最後入住兩間連住嘅雙人海景房 (中間有門互通)。感覺比想像之中寬敞,好舒服 🙂

每日負責執房嘅職員都會砌好毛巾公仔放喺床,小朋友每次返房都有驚喜 🙂

帶小朋友同行,當然關心有咩玩???船上有滑水、攀石、溜冰、Golf、藍/排球、乒乓。。。(記住留意每日船上派發嘅日程,會有滑水、攀石、溜冰嘅開放時間)

游泳池可以邊睇戲邊游水,好寫意~~~當然唔少得POOLBAR,游游下水飲杯嘢,感覺更舒服 🙂

船上仲有一個小孩遊玩點:Adventure Ocean,有少量電玩、仲有分咗唔同年紀嘅專屬PlayArea。每日船上會派發小朋友日程,介紹每個PlayArea有咩主題節目。全部活動都由船上職員負責帶領,例如做下手工、跳下舞。小朋友去咗玩,大人就可以趁機「休息」下 😛

除咗「玩」,仲有一個娛樂,就係睇Show/Parade。船上晚晚都有表演睇,我地去睇咗兩個野人較有興趣嘅表演︰魔術、溜冰。兩個表現都非常精彩!!!! Parade主題都非常啱小朋友口味,果然係一個合家歡嘅郵輪之旅 🙂

膳食方面,船上有3間餐廳可以任你食(唔使另外收費),包括一間自助餐、一間點餐式餐廳同埋一間輕食CAFE。另外仲有幾間要額外收費嘅餐廳可供選擇,包括日式、西式等等。。。

今次海上之旅,抱著「陪太子去玩」心態,原本都怕可能會悶悶地 😛 但原來船上節目都幾豐富,5日4夜好快過。10月、11月,皇家加勒比國際遊輪旗下嘅海洋航行者號以及海洋贊禮號都有唔同航點嘅海上遊旅程,詳情可參考以下皇家加勒比國際遊輪官網 (http://www.royalcaribbean.com.hk/tc/index.php)