【台灣親子遊】花蓮親子民宿大推薦 Part 1

事不宜遲，即刻同大家分享下今次既《迪迪媽一家四日花蓮親子之旅》！

今次旅程，迪迪媽最注重既就係住宿，因為帶住小朋友，行程都偏向悠閒型，萬一遇著天氣唔好，就可能無法如期出外活動，所以一間有親子遊樂設施既民宿係我既首選！

網上有好多花蓮既親子民宿介紹，而我一眼就睇中左「芬奇斯親子民宿」既呢間「201綠野仙蹤」客房。

房間內部牆壁上既壁畫相當可愛，房間內有2張雙人床，兩張床可以合併，呢一點對於迪迪媽黎講非常重要，因為兩位小寶貝夜晚訓覺時，都一定要我係身邊🤷🏻‍♀️。

房間內可以見到有唔少玩樂設施，黑色上下層既滑梯組，妹妹歲半都可以爬到樓梯上去玩滑梯，仲係住宿期間學埋點爬樓梯落返黎🤣，而下層就係小小既秘密基地。旁邊有積木組合檯，打開檯上既盒就有積木，檯面亦可以用黎玩積木用。隔離就係煮飯仔玩具，仲未止，仲有搖搖馬、車仔，另外仲有小朋友用既檯櫈。

除左房間內有野玩，去到浴室同樣有沖涼玩具！

聽到呢度，你都可以想像到，如果帶住小朋友黎到，佢地係會幾咁興奮、幾咁開心，同埋⋯幾咁夜訓😅

但係好玩既設備仲未完，民宿地下果層仲有公共遊樂設施，滑梯、圖書、煮飯仔、車仔、搖馬等等之外，仲設有決明子沙池，真係入黎容易，想出去就要過到小朋友果闗先得🤣

玩樂方面，呢間民宿真係無得頂，咁係配套上又如何呢？

房間內設有冷水壺、熱水壺、風筒、杯、毛巾，牙刷、牙膏、沖涼液、洗頭水、衣架等等，仲有專for小朋友用既設備，如睡袋、浴盆、膠櫈仔、廁板、卡通浴巾，牙刷牙膏，沖涼洗頭水等等👍🏻

而地下果層既公共空間，除左玩之外，都設有茶水間，有民宿主人手工製冰紅茶、冰水、熱水提供，仲有雪櫃、微波爐、餐具、兒童餐具等等。

有一樣野要特別講講，就係插座，大家都知道去旅行有幾多野要充電啦，手機、相機，甚至係電腦或者pad之類既野，而呢間房入面既插座，我敢講，絕對夠你用，而且仲有USB插座添！

唔係誇大，呢間民宿真係迪迪媽既心水推薦，除左以上非常貼心同非常歡樂既設備，地點亦相當便利！

要知道花蓮係一個交通唔發達既城市，出入只可以計程車或包車，又或者租車自駕遊，而民宿主人比左當地計程車既Call台電話卡片比我，Call車往返巿區不論跳表都一律只收TWD100，所以東大門夜市就成為我地幾乎每晚必去既食飯點！

民宿主人親切友善既服務，亦係迪迪媽大推薦既主要原因之一，事緣係咁的⋯⋯⋯

我地選擇左HK Express去花蓮既直航機，但帶住小朋友搭飛機實在係非常疲憊既事，所以一落機就快手快腳搞曬d手續，然後準備出閘後去換台幣，但係如果大家好似我咁就大件事，因為花蓮機場兌換台幣既櫃臺其實係閘內😱！到我發現呢件事既時候已經太遲，因為閘已出⋯⋯

身無台幣既迪迪媽，試過去問海關可唔可以比我入去換錢，又或者幫我換，又試過航空公司職員，但全部都唔得，佢地又建議如果我有銀聯卡，可以試下去ATM拎錢，但係同樣失敗，又膽粗粗咁去問計程車司機可唔可以載我地去換錢，雖然司機哥哥好好人比我地上車，但由於當時銀行已關，最終都係車我地去ATM，唯一慶幸我仲有粒WiFi蛋，同民宿主人聯絡後，佢幫身無分文既迪迪媽比左的士錢，仲幫我地換埋台幣（零手續費！）

要知道我地book房時，其實純粹口頭落實，無任何訂金，原先係要到達後一次付清，好在民宿原來都可以用信用卡，不過因為信用卡會收手續費，所以一般唔會建議，只係我地特別情況之下先比我地信用卡付款！

民宿主人亦比左好多行程上既建議，仲可以代購門票，代租車包車等等，而且佢知道我地會去玩水，仲特別幫我地代購泳帽，所以我真係超級比Like呢位民宿主人，實在太有Heart了！

迪迪媽今次旅程原先想5日都住呢間民宿，可惜其中一日已經比人book左，所以之後仲有住另一間民宿，詳情會再同大家介紹，請大家繼續留意啦！