德望小學暨幼稚園, Good Hope, 愛心師長

感恩丨德望校風嚴謹樸素 愛心師長助兩女順利成長

專欄

廣告

時光飛逝, 三年前, 我呢位新手媽媽第一次帶 Keicy 返幼稚園, 依依不捨, 剩係識捉實佢隻手仔唔放, 一切記憶猶新。眨吓眼, Keicy 已經幼稚園畢業, 九月開始, 就開開心心大踏步跨過校門, 入讀小一。

 

其實 Keicy 能夠順利完成幼稚園階段, 真係非常感恩!

因為 Keicy 有段時間鬧脾氣, 更試過企喺校門外唔肯上堂, 當時吳嘉美校長好有耐性咁拖著 Keicy 隻手, 遊學校一周, 循循善誘, 鼓勵佢上堂, 跟住 Keicy 就好快乖乖哋入課室.

喺一般人眼中, 呢件係小事, 但對我呢位德望舊生嚟講, 係一件大事.
因為親身見證自己母校嘅師長, 令自己囡囡重新愛上課室, 愛上學習, 改變佢嘅一生!

日前要返小學參加家長同小朋友第一次會議, 好開心可以見到笑容親切、和藹可親嘅 Sister Pauline (校長兼校監阮嫣玲修女), 佢一見到 Keicy 就講: “Hello Keicy!”

全校上上下下咁多個學生, 佢都記得小朋友個名, 認真犀利!
Sister Pauline 平易近人嘅個性, 不斷增加我對母校嘅歸屬感!

從細節中 向學生灌輸正確價值觀

上到小學, 各方面都執得好正, 例如皮鞋唔可以漆皮, 唔可以令面, 要着暗啞色、冇花紋嘅黑色皮鞋.

今年開始, 全校統一用同一款書包, 而德望嘅書包係同名牌 crossover, 所以喺護脊、護肩、承托力等都非常出色, 仲好經濟實惠, 每個只要200零蚊!

一般市面售買嘅書包好貴, 由每個一千至三千幾蚊不等, 所以我覺得校方呢個安排好好, 學生之間唔會「鬥書包靚」, 大家樸素啲, 冇比拚, 少咗物質主義……

連襪仔嘅設計都好有心思, 有晒 logo, 易分左右腳.

全套校服好統一, 唔止靚, 更係力求進步嘅好例子!

另外, 文具方面, 無論係筆、間尺、抑或筆袋, 都要簡樸為主, 太多卡通圖案嗰啲, 全部都要係留喺屋企用, 返學校用啲物品, 唔可以太 eye catching、太多公仔、太 fancy, 令學生專心學習, 唔會出現「嘩! 你把間尺好靚呀! 可唔可以借嚟用吓?」, 或者上堂嗰陣分散注意力, 偷望隔離位同學啲文具靚唔靚等.

培養閱讀風氣

校方為咗令同學識自動自覺睇書, 特設閱讀時間.
學生要帶一本書返學校, 同大家一齊坐定定, 好安靜咁睇書.

從課外活動學習均持之以恆 完善人格

學校有好多課外活動選擇, 包括手工、英語戲劇、數學、各國歌曲頌唱、烹飪、摺紙、聖經研習、合唱團等, 而且主張家長同小朋友一齊商量, 因為已經大個囡喇, 要問吓佢想學咩, 然後填志願揀想學乜嘢, 學校會再分配.

而分配準則, 係老師認真嘅篩選, 睇吓適合參加邊樣.
Keicy 日前都做咗篩選, 當佢知道自己適合參加多種課外活動, 笑得好開心!

校長強調, 參加課外活動時, 要盡力做好, 持之以恆.校長更表示, 一個團隊, 係一齊出席活動, 一齊去訓練, 所以每次都要準時出席, 如果少咗任何一個, 都唔成隊, 所以要一齊設定一個努力嘅目標, 亦即係話, 我哋Hopers(讀德望學生統稱)讀興趣班要好專心、好留心, 要花時間培養、堅持.校方更明文規定, 唔畀中途退出, 揀咗, 就要完成一整年嘅學習.

呢番說話, 令我諗起我細個嗰陣, 亦都係透過參與課外活動, 學到好多嘢.

眼見現今好多小朋友學好多嘢, 但係有時會半途而廢, 或者樣樣學少少, 冇一樣精.
所以我都認同校方嘅做法 – 揀返一至兩樣小朋友鍾意、有興趣嘅去栽培, 好過「仙女散花」咁.

正係呢個「盡力做好, 持之以恆」嘅精神, Hopers 先喺各大學界比賽中表現優異, 勇奪多個獎項, 例如喺 2015-2016年度獲得:

全港小學校際劍擊比賽 女子佩劍組亞軍及女子乙組團體優異獎

全港學界精英羽毛球比賽(小學組) 女子組亞軍及女子雙打亞軍
九龍北區小學校際乒乓球比賽 甲組殿軍及乙組冠軍

九龍北區小學校際游泳比賽 女甲團體亞軍及女乙團體冠軍

香港學校舞蹈節
小學高年級組現代舞(群舞)甲級獎
第44屆全港公開舞蹈比賽(青年組)銅獎
小學低年級組現代舞(群舞)乙級獎
小學低年級組中國舞(群舞)甲級獎

第 67 屆香港校際朗誦節 獲得多個獎項

有獎攞當然開心, 但其實參加課外活動最重要嘅目的, 係得到滋養一生嘅良好嗜好, 例如音樂.

德望學校有好多音樂活動, 連樂團都係一條龍, 好多 Hopers 都係由小學學到中學, 就算升讀大學, 都會繼續返嚟學, 可能有家長會話:「嘩! 玩音樂咁花時間, 會唔會分心, 上唔到大學㗎?」

家長可以放心, 喺德望學校, 參加樂團嘅學生, 接近 100% 可以升讀大學, 多數成員更由小學開始好鍾意玩音樂, 一直到中學, 甚至大學.

每次喺學校三五成群咁去玩音樂, 練習樂器, 係成長時期嘅美好回憶, 期間更被音樂陶冶性情, 唔會咁易學壞, 一舉幾得!

Keicy 喺K3 被甄選咗入 choir, 代表學校出賽, 仲有攞獎添!
希望升咗小學部嘅 Keicy, 有機會繼續參加學校嘅合唱團啦! ^^

運用新科技 與家長溝通更緊密

現時通告係透過電腦或手機嘅 apps 嚟收, 利用科技慳返啲紙張, 同時亦都好尊重家長, 會問家長係咪願意將小朋友嘅相放上網. 另外亦會公開部分活動嘅帳目, 包括場地費用、車費等, 畀家長參考, 透明度高.

而學校嘅消息, 就會喺 Facebook page 同網站發布.值得一讚嘅係, 學校嘅 fb 管理好好, 為咗保護私隱, 家長加入前要 inbox小朋友個名、班別同班號, admin approve 咗, 先可以瀏覽內容.

而德望嘅家長教師會, 亦都舉辦好多活動, 邀請家長同老師一齊參與, 拉近家長同學校嘅距離, 實踐家校合作, 大家嘅感覺好親切, 好似一家人咁warm, 其中一個例子, 就係去年嘅 60 周年晚宴, 大家同心合力, 花咗唔少心機、時間同心血將場館佈置得美輪美奐.

可以為學校出一分力, 真係好榮幸同好開心呀!

當晚最深印象係 Sister Pauline, 佢一聽倒音樂, 就即刻拖住大家隻手輕輕咁揈吓, 當時我同佢相認, 話我係校友嘅時候, 佢畀一個大力嘅擁抱我, 好溫柔咁同我講: ”welcome home!”

柔情愛貓校長 宣揚愛心

所有 Hopers 都知道, Sister Pauline 好鍾意小動物, 尤其對貓隻, 充滿愛心.依山而建嘅德望校園, 吸引唔少流浪貓聚集. 當 Sister Pauline 得悉學校附近嘅流浪貓好可憐, 加上校內多位師生都好鍾意貓之後, 就為貓隻絕育, 仲設立一間「貓室」, 畀貓隻容身.

現時學校一共收養咗 10 幾隻畀人遺棄嘅流浪貓. 呢班「貓老師」每日喺校園周圍「巡遊」, 令校園充滿生氣, 有時貓貓會坐喺圖書館睇書, 有時坐喺保安室, 有時企喺校門睇風景, 自由自在咁生活.

學校每年都會舉辦動物權益同愛護動物嘅講座, 從小教育學生點樣尊重、愛護動物.

另外, 學校更會邀請非牟利獸醫診所、群貓會等唔同機構同學生分享, 講授動物被棄養嘅慘況, 教導學生點樣做一個負責任嘅主人.

冇架子校長 挺身而出阻抄牌

講到親民, 德望幼稚園嘅吳嘉美校長, 有一次令我哋一班家長印象深刻.六月尾, 有警察到學校前抄牌, 吳校長為免一眾家長因怕被抄牌手忙腳亂, 急於帶囝囡過馬路, 釀成危險, 主動上前同警察協商.

而令眾家長感動同難能可貴嘅係, 全校咁多學生, 吳校長都樂意花大量時間同各家長溝通, 察覺同知悉每位小朋友嘅優、缺點. 細囡 Kassy 同校長嘅接觸, 係個好例子.

年前帶 Kassy 去德望做入學面試嗰陣, 吳校長好快就發現佢有說話發展遲緩問題, 部分發音唔準, 即場同我講要花更多時間留意, 更建議儘快帶 Kassy 去睇醫生, 改善情況.

多得校長之金石良言, Kassy 原本比較怕醜內向, 唔太鍾意講嘢, 到而家日日好開心咁講唔停, 性格亦都變得開朗, 我哋嘅家庭生活隨即變得更加和睦, 家人之間有更緊密、良好嘅互動, 真係要感謝吳校長嘅專業判斷、意見、同一直對 Keicy、Kassy 嘅關心!

感恩.祝福

兩個寶貝囡Keicy同 Kassy 能夠就讀自己嘅母校, 係緣份;能夠係一間咁高質素嘅學校讀書, 得到咁多幫助同照顧, 係福氣, 的確需要感恩!

祝德望學校嘅校長、Sisters 同全體師生身體健康! 事事順利!

`

FB: KeicyKK