【媽媽心聲】兩胎順產產後記經驗分享

Jun 24 2019

有人話：「女人生仔就如半隻腳踩入鬼門關」，而順產媽媽更是必經「開10度」的考驗。不少二胎媽媽認為因為有了一胎的生產經驗，面對二胎降臨時也就不那麼緊張了。亦有生二胎會比第一胎快很多的說法。Blogger唯媽就以過來人身份，大方分享兩胎順產的經驗。

撰文&圖片：唯媽 | 編輯：Chloe

兩胎順產產後記

可能唯b太鍾意喺我肚度，要成41週催生叫佢出嚟。本來係約咗5月嘅某一日入院催生，但催生期嘅幾日前（40週幾）發現有啲水狀分泌物，就入院檢查啦。當晚幫我檢查嘅係外科醫生，佢話唔係穿水，但因為已過預產期，又一場嚟到，提議第二朝催生埋啦，唔使等原定約咗嗰日。

但到第二朝，產科醫生巡房時同我講，要跟指引，41週先可以催生，所以叫我出院。本來以為可以見到唯b喇，所以好失望，向佢轉述咗外科醫生嘅說話，問佢可唔可以今日催生埋呀？

佢話幫我檢查吓，如果宮頸軟就俾我催生。好彩，宮頸真係軟咗，就安排上產房吊催生藥喇。

我即刻叫唯爸嚟，但我都要喺產房種豆、人手穿水、放尿後佢先入得嚟陪我。結果，由落藥開始計，3小時後，唯b就出世喇！而今次用嘅減痛方法係笑氣同我覺得作用唔太大嘅香薰。

第二胎嘅預產期係1/6，第38週時醫院已經俾定催生期。到29/5朝早，發現分泌物入面有好少好少鮮血，雖然冇陣痛，但因為係第二胎，都叫唯爸返屋企同我入院先。

入院檢查完都冇特別，醫生仲話第二日可以出院。點知到半夜兩點幾，突然感覺到妹妹好大力用頭鑽咗我一吓，有少少痛，但因為臨近預產期佢晚晚都係咁，我就冇理到。隔咗一陣，突然間感覺到有少少嘢流出嚟，去廁所睇發現有血，就即刻通知護士，佢檢查後話宮頸軟咗，但一度都未開。

我即刻叫定唯爸嚟啦。

護士都擔心第二胎會好快生得，所以叫我一有密咗嘅宮縮要即刻叫佢。佢檢查完之後，我有一吓好痛好想去poo poo嘅感覺，就用app計宮縮。

點知去到第三吓，已經痛到頂唔順，仲穿咗水！叫護士嚟，已經開晒十度，感覺到妹妹出緊嚟喇！

護士大叫要床呀，要去產房生喇！我連過床都好勉強，仲要忍住唔俾妹妹出嚟。

上胎我一次都冇叫過，但今次我去緊產房嘅時候真係忍唔住大叫「我要生喇」！第一次覺得去產房嗰段路真係好漫長…上到產房，助產士都未準備得切，要等佢哋著好衫，準備好，打埋抗生素（因為我中咗B鏈），我終於生得喇！屙咗兩吓，妹妹就出世喇！

咩減痛方法都冇用到，連剪會陰都剪唔切，當然，唯爸都嚟唔切剪臍帶…由第一吓痛到生得，係半小時嘅事。雖然好快，但因為剪唔切會陰，所以撕裂都幾嚴重，個傷口好大，聯咗好多針。亦好遺憾唯爸趕唔切嚟… 所以，太快都唔一定係好事嚟㗎。

個人建議，見紅真係最好入院睇一睇，尤其是生第二胎嘅媽媽，因為真係可以生得好快㗎！好彩生妹妹當晚我喺醫院，否則都驚去唔切醫院。

關鍵詞