免疫力

【提高 免疫力 】蟲草花螺頭烏雞湯

專欄

廣告

一過左立冬,天氣就開始凍凍地,又係時候要煲啲比較補嘅湯水,咁先可以提高 免疫力 。講到補湯就一定諗起烏雞(即係竹絲雞),所以就買齊材料煲返個蟲草花螺頭烏雞湯啦!

其實蟲草花嘅功效則和蟲草差不多(當然佢地兩者價錢差好遠啦),兩者都有滋肺補腎護肝、抗氧化、防衰老、抗菌抗炎、鎮靜、降血壓、提高機體免疫能力等作用。而且蟲草花不寒不燥,具有補肺、補腎和護肝養肝的功效。依家啲天氣又好容易病,所以就煲多啲蟲草花,咁就可以增強免疫能力,等病痛都少啲啦!

 

另外烏雞含有大量蛋白質,而膽固醇含量極低,是高蛋白、低脂肪的滋補佳品。而且烏雞所含有嘅DHA和EPA物質還可以提高兒童智力,經常食用可以有效調節生理機能,提高人體免疫力。原來係咁有益的,所以真係要煲多啲。

將有益嘅蟲草花同烏雞,再加埋螺頭一齊煲,仲唔係補益氣血兼提高機體免疫能力,所以真係好啱依個天氣呀!

蟲草花1兩、螺頭2兩、淮山及杞子各1兩、烏雞半隻及瘦肉約$20~

點解用烏雞又要加瘦肉?因為烏雞本身都帶點燥,所以加點瘦肉可以中和返,另外加左瘦肉啖湯係會甜好多呀。由於我都幾怕煲雞湯嗰一陣油,所以我會將雞都除去個皮及剪去一啲肥膏~

乾螺頭就先用清水浸泡過夜,等佢浸至軟身~

 

烏雞及瘦肉洗淨汆水備用~

所有藥材用清水浸泡幾10分鐘~

煲內放約4L水,待水滾後就可以加入所有材料~

待再次滾起後,繼續用大火加蓋煲約30分鐘~

再轉慢火加蓋煲多1個半小時~

最後加少少鹽就飲得啦(真係少少就得,因為啖湯係勁足料呀)~

我今次落足料兼勁夠火喉,啖湯真係勁甜超好飲,我估都可能係毋為螺頭夠鮮甜,我地三口子都好鐘意依個湯,齊齊飲左三大碗,老公仲讚有驚喜,叫我下次再煲過添~

其實我只係一名師奶仔,我嘅工作都只係好好照顧我家兩位老細,能夠見到佢地不停添飲,就係我嘅動力,亦令我充滿正能量,所以我湯唔怕煲得多,最重要係有人真心懂得欣賞!

 

BY 小小豬的成長日誌