暑假玩盡愉景灣

暑假尾聲，約咗朋友仔一齊去大嶼山愉景北愉景灣酒店癲返一晚，我哋一大清早收拾好行李，去到愉景灣酒店，放下行李走去對面north plaza 地下嘅大型play house EpicLand玩。

地址: 愉景灣 愉景北商場31號舖
電話: 2441 0098
營業時間 星期一至四：9:30am – 7:30pm
星期五、六及公眾假期前夕：9:30am – 8pm，星期日：9am – 7:30pm

其實上星期已經去過呢個全港最大，佔地14000平方呎，適合大人細路嘅歷奇王國。但係呢度實在太多嘢玩啦，玩足一日都未夠。

我哋今次由朝早開門九點半，玩到兩點幾，食少少野就去愉景灣酒店check in ，上到房間，嘩！L型全海景大房，個view真係無敵，沖涼房又係對住一望無際嘅海。

小朋友急不及待係張床彈下彈下，重大到可以玩捉迷藏添。

整理好行李，我哋落到大堂等待乘坐馬車，離遠聽到馬蹄聲向住我哋嘅方向行過嚟，好震撼，小朋友手舞足蹈好興奮。

我哋坐上馬車，係海邊到咗一個圈，有落車同馬仔接觸，沿途好多市民向我哋揮手，搞到啲小朋友好興奮大叫，最後同馬仔影完相就去想返去酒店play House玩。

愉景灣酒店好新好乾淨，仲配合埋好多適合一家大細嘅設施，真係住幾次都玩唔晒啊。

我哋周圍影吓相就去食晚餐，又出返去海旁吹下海風傾吓計，好自由自在好寫意咁。

由於早上好早起身，小朋友都放曬電，係個咁靚海景嘅廁所沖完涼之後，小公主Jasmine帶左幾本故仔書來，話要同朋友仔講bed time story ，講完一本又一本，好快佢哋就進入夢鄉。

第二朝早七點幾，小朋友就精力充沛咁大叫，因為佢哋偷偷地揭開窗簾望到出邊，太陽伯伯出咗嚟啦！

原本睇天氣報告話會落雨，估唔到會放晴，我哋爭取時間落大堂食早餐，然後就跑去泳池游水，呢度有小朋友細池，又有BB池同埋按摩池，當然有深水池，完全適合一家大細老幼！四周環境又清靜又靚，遠望就係一望無際嘅海，真係好有resort feel ，好寫意。

玩咗幾個鐘，沖洗過後，我哋就坐免費巴士出返碼頭搵嘢食，呢度真係有好多選擇，我哋就揀咗東南亞美食。

愉景灣酒店會因應不同時段推出不同節目.

我哋今日就試咗做香皂，工作人員細心講解，小朋友留心聽講，短短45分鐘，小朋友的master piece 已經出世左啦。

開心嘅時間過得特別快，有好多遊戲都未玩，就要離開啦。下次一定要book三日兩夜先得！