德望幼稚園

有心唔怕遲 德望幼稚園演唱會式賀年表演

專欄

廣告

K-pop、英文 Hip Hop 歌,加埋郭富城嘅《對你愛不完》,強勁節拍加埋可愛 Hopers 嘅舞蹈,令德望小學部校長 Sister Pauline、幼稚園部吳校長、所有老師同家長,都企晒起身一齊唱一齊跳,成個演唱會咁樣!而呢個因為早前流感肆虐而延遲舉行嘅「德望幼稚園新春表演」,禮堂佈置同小朋友嘅打扮都好喜慶,仍然好有新年氣氛!

有心唔怕遲 德望幼稚園演唱會式賀年表演

其中一個驚喜位,係只返咗幾個月學嘅 K1 同學仔,原來已經學咗好多嘢,大膽上台表演之餘,仲表現得唔錯㖭!真係要畀啲掌聲呢班啲小朋友呀!

而我最感動嘅時刻,係 Kassy 做禮儀小姐,佢喺點睛儀式裏面,幫手遞筆畀德望小學部校長 Sister Pauline,同埋幼稚園部吳校長。

時間過得好快,讀緊 K3 嘅 Kassy,真係大個咗好多,好快就幼稚園畢業,升上小一喇!

Kassy 與 Sister Pauline 合照

呢個時候,我一路望住現場坐喺我隔離嘅細佬 Par Par,一路掛住身體唔舒服冇嚟到嘅家姐 Keicy,大家雖然日日見住,不過有時都好想時間過得慢啲。家長唔想囝囡大得咁快呢種心情,真係好矛盾……

Kassy & Par Par 與吳校長合照

呢次新春表演,K1-K3 所有班級都載歌載舞表演,非常精彩,令所有人都睇得好開心!

完 show 後,喺義賣場地見到好得意嘅狗狗攬枕同枕頭,因為喺表演開始前,Sister Pauline 同我哋講解,學校希望大禮堂新翼能夠盡快落成,所以舉行義賣,籌募經費。

*其他得意義賣紀念品:http://www.ghs.edu.hk/sec/dw/souvenir.html

請多多支持!^^

現時,中學部、小學部同幼稚園,都係用同一個禮堂,日程表密麻麻,以致唔夠時間進行各類活動,所以希望提供更多空間畀小朋友使用同表演,令德望嘅同學,好似今次新春表演咁樣,能夠製作出更多有美感嘅項目,為呢個世界帶嚟更多美好嘅事,帶嚟更多歡樂,將喜樂精神更好咁樣宣揚出去。

 

計劃明年落成嘅戴麗雅翼(Delia’s Wing),重建後,大樓連地庫及天台共9層,擁有高科技技術。大樓底層係停車場,地下有各式教學課室、健身室、話劇舞蹈室及數碼影音室等等;一、二樓係大型演奏廳;三樓以上設有多用途室、創新科技室、視藝室,購置先進儀器、3D 打印機等,配合 STEAM 教學。最特別係位於四樓同五樓嘅宿舍,畀外國來港交流學生入住,令Hopers 同交流生有更多互動學習。天台就會建造成一個花園,有自動灌溉系統。大樓仲會有咖啡角,到時,Hopers 就可以好似喺大學咁樣,有自由同自主嘅學習空間。了解更多,歡迎瀏覽:http://ghs.edu.hk/sec/dw

 

祝願學校籌募經費順利,令更多 Hopers 受惠!

 

【捷報】

恭喜黎恩熙同學,喺 3 月 6 日嘅「港九區 D1 中學校際田徑比賽」,奪得女子 B Grade 跳高金牌!

(圖片來源:UPower)

 

FB: KeicyKK