為小朋友打造動感自信造型
呢兩日都喺 GAP 位於又一城同海港城嘅分店，為嚟到嘅小朋友揀一套衫，再幫佢哋 set 頭同化少少妝之後，帶佢哋上一個小舞台影相，總共影兩張即影即有，一張畀小朋友留念，而另一張就會釘喺 GAP 特設嘅宣傳板上高，大家得閒經過都可以見到呢班小 model 㗎！
其實造型、包裝對大人細路都好重要，造型應該要配合場合、地點嚟打扮，唔好過份誇張，要以舒服、質料為主，有時 gel 吓個頭，換個髮型，或者戴少少飾物、戴頂帽，又或者搭件褸喺膊頭度，就可以變得好特別，會好有型！
呢個活動真係好好玩，因為平時只係喺屋企對住三個仔女，幫佢哋打扮，而呢兩日嘅活動，係一次過幫好多位小朋友做 styling，諗起都覺得好得意，而且對我嚟講都好有紀念價值，因為今次係我第一次做小朋友 event ，之前一直只係做大人嘅 event，所以呢兩日玩得好開心，可能因為太投入為每位小朋友嘗試獨特嘅造型，所以時間過得特別快，而最難忘嘅係，見倒換咗衫、扮咗靚、set 咗頭嘅小朋友，同家長一齊對住鏡展露由心而發、好滿足嘅笑容。
呢兩日呢個畫面出現咗好多次，我真係好開心呀！
另外，我仲發現而家好多小朋友都好有天份，上小舞台嘅時候好識擺 pose，好有自信，對好多嘢都好有要求，會表達自己鍾意咩唔鍾意咩，諗返起自己細個嘅時候都係一嚿飯咁樣，媽咪畀咩就着咩，不過而家嘅小朋友就唔係咁樣喇。
原來有時幫小朋友扮靚、扮吓 model，係可以增加自信，出到外面，或者喺學校對人對事都會有幫助，因為經驗多咗，做咩事都唔會驚青，有多少少信心。
呢兩日，所有見倒自己小朋友扮靚咗嘅家長，都好滿足好興奮，用手機不停影相。
呢件事好似一面鏡咁樣，見到平時嘅自己，我都係見到自己小朋友做乜都好開心，覺得佢哋好叻，就會用電話不停咁影相。
參加活動嘅家長見到小朋友打鼓都好開心，雖然只係求其拍幾吓，但都會圍住好大反應咁話：「好叻呀！」
換轉係我都一樣會咁，可想而知，每位小朋友都係家長嘅心肝椗，個個都好矜貴、好重要，亦都非常幸福！
FB: KeicyKK
