【台灣親子遊】聖誕遊台灣 之 LEGO餐廳

LEGO餐廳 供應輕宜簡單嘅小食 全部都係兒童餐嘅份量，如果午飯時間嚟到，大人可以陪小朋友食少少，之後再去第二度食下午茶，因為市區街邊四周圍都有嘢食，唔怕會餓親。

LEGO餐廳 都有其他選擇如意粉、三文治等，建議下午茶時段黎可能更加適合，因為食物嘅選擇不算多，食完午飯同小朋友嚟玩，大人飲杯野坐吓會啱D，但要注意餐廳有每位最低消費，可以睇返餐廳嘅告示。

下頁：LEGO 任玩

每個小朋友都可以拎個LEGO盒去裝LEGO返檯到玩。話說小時候連續好多年嘅聖誕節，LEGO都係我最想收嘅聖誕禮物嚟㗎！嚟到呢度，媽媽緊係唔執輸砌埋一份。

呢兩個迷你兵係 LEGO餐廳嘅自創版本，幫襯開野食就可以加550台幣換購一款，共兩款。店員會即場比張教學圖教你砌，最好即時砌好佢先，因為咁啱兩份裡頭嘅LEGO都唔齊，即場砌發現唔齊件就可以問店員補返。

砌呀砌，唔覺唔覺都玩咗2個幾鐘，小朋友會好滿足，而呢D靜態嘅活動，可以考慮一下大人無咩電嘅時候去玩。因為大家都會明白同小朋友去旅行尤其係同一D未識得享受放假可以瞓晏D果種幸福感嘅小朋友去旅行，全日陪玩分分鐘攰過返工。

所以我哋夜晚一定要識得急叉神功，要快速進入深層睡眠，同埋佢哋一瞓著，就把握時間快D瞓 唔好玩咁耐電話。因為佢哋朝早會好準時，一個6點，一個7點就起身，準過鬧鐘，喺你攰佢都未攰嘅情況之下，去 LEGO餐廳 大家可以一齊靜靜哋咁砌吓傾吓思考吓，係一個唔錯嘅選擇。