鮮百合蓮子豬骨湯

鮮百合蓮子豬骨湯

專欄

廣告

早幾日見有朋友仔介紹用鮮百合加蓮子一齊煲湯,話好飲得嚟又好有益。聽就已經好吸引,所以我就買齊材料煲靚湯啦!

 

鮮百合我都好鐘意食,不過多數用嚟炒肉片當一個餸嚟煮,因為爽口得嚟又好有益,對肺部係有好好呀。

 

原來將鮮百合同埋蓮子一齊煲,功效可以清熱、寧心、安神助眠同埋潤肺止咳。好似中晒我要補補嘅嘢,所以我又點可以唔即刻煲嚟飲呀!

 

鮮百合1包、乾白蓮子約30粒、豬骨約$40、粟米及紅蘿蔔1條、蜜棗4粒、南北杏2湯匙及果皮1小塊~

 

鮮百合切去頭尾啡黑色部分,逐塊剝開洗淨~

 

豬骨洗淨汆水,果皮浸軟刮囊,蓮子、蜜棗及南北杏洗淨備用~

 

粟米及紅蘿蔔刨皮洗淨切大塊~

 

煲內放3L水,然後加入果皮開始煲~

續下頁

待水滾後加入所有材料,用大火煲半小時~

 

之後改用中火煲1.5小時~

 

最後落少少鹽調味,熄火後就飲得啦~

 
由於啲鮮百合都已經煲到溶晒係湯入面,再加埋啲白蓮子,所以啖湯都有啲奶白色。不過顏色都唔係重點,入口勁香百合味,而且仲超級甜,真係飲多幾碗都唔嫌多呀!
 
我地嘅FB – 小小豬的成長日誌 ,大家一齊嚟交流下煮飯仔及去玩嘅親子樂啦!