2人 $1,000平遊澳門親子秘點攻略 @ Travel 佳

專欄

廣告

Presented by MGTO

大家成日以為Travel佳周遊列國,唔遠嘅地方都唔去,其實阿佳覺得,去旅行遠近都冇所謂,最緊要係識得玩,be a smart traveller planner。好似上個星期咁,阿佳就同姨甥仔去咗一轉澳門輕旅行,發掘了不少適合親子遊的平價好去處,小朋友學到嘢,大人又慳到荷包,好似阿佳今次咁,兩個人一日合共都唔使用$1,000,同喺香港上一日play group加去街,條數完全差唔遠。

科學館 兒童實驗天堂
小朋友當然最喜歡就係動手動腳發掘唔同有趣嘅事物,不過很多人就遺忙澳門其實也有一個科學館,而館內嘅展館一共有14個,並附設有天文館,阿佳個人就覺得,每一個展館嘅主題都相當明確,讓小朋友落手落腳嘅互動元素比起香港科學館更加豐富。絕對係大人細路都啱玩!

講到展館嘅內容,呀佳就特別鍾意太空館、兒童科學廳、運動競技廳同埋環保廳,特別係兒童科學廳,入面有一個關於水力學嘅大型互動裝置,小朋友可以將小球放喺水柱上發射到唔同嘅容器入面,令佢哋覺得驚喜十足。而環保廳入面有兩部模擬駕駛機,更加係令阿佳嘅姨甥仔叫極都唔肯走添!

澳門科學館
地址:澳門孫逸仙大馬路澳門科學館
開放時間:10am- 6pm(星期四休館)
費用:成人 MOP 25、小童 MOP 15

熊貓館 反斗開開零距離接觸

做完科學家,當然唔少得去搵下小朋友最鍾意嘅動物,阿佳就帶姨甥仔去到路環嘅石排灣郊野公園,唔講唔知原來呢度有個迷你動物園,梅花鹿、山羊、鴕鳥、眼鏡猴等嘅動物都可以睇到,不過重頭戲當然係大熊貓館。

大熊貓館入面有兩隻大熊貓居住,分別係開開同心心,同香港嘅熊貓館較唔同,澳門呢邊人同動物嘅距離相對較近,特別係開開嘅活躍程度相對高,阿佳同姨甥仔喺現場停留咗20分鐘,期間開開真係非常為食,不斷去攞一紮紮嘅竹枝密密食,又四圍行來行去,真係跳跳紮紮,令我哋影咗唔少靚相。

澳門大熊貓館
地址:澳門路環石排灣郊野公園
開放日期:星期二至日
開放時間:10am-1pm / 2pm-5pm
費用:MOP 10

滑草場 考小朋友膽量

睇完動物,姨甥仔話想試下啲刺激啲嘅玩意,阿佳就決定帶佢去滑草,每逢星期六、日,呢度都免費開放俾小朋友,可以領取滑草兜喺山坡上面滑落嚟,咪睇個草坡好似冇乜挑戰性咁,姨甥仔玩到「we嘩鬼叫」咁聲,最衰大人唔玩得,如果唔係阿佳都想親自落場呀!不過,大人都玩得嘅氹仔大譚山滑草場已重開,阿佳下次都會親身落場試玩!

黑沙水庫郊野公園
地址:澳門路環黑沙海灘以北的山谷
開放日期:星期六至日
開放時間:9am-5pm(逢星期一至五休息)
費用:真草滑草場免費

二龍喉公園 坐纜車上燈塔

最後一站,返到澳門半島,但去澳門行公園?阿佳唔係同你講笑㗎!講緊嘅係二龍喉公園,入面有全世界最短嘅登山纜車,全長只有186米,只需要1分20秒就行勻全程上到山頂嘅松山市政公園,來回都只係要3澳門元。

講到松山山頂,風景靚就理所當然啦!除咗澳門同珠海嘅全景都盡入眼簾,天氣好嘅時候連大嶼山都會睇到添!而另一個重點當然係東望洋燈塔,呢座白黃色充滿殖民地色彩嘅建築物,已經有過百年歷史,而每逢打風,仲會掛上「T」、「⟂」、「Δ」、「+」等風球代號,大家入到去都可以參觀,小朋友就更加覺得親切添!

二龍喉公園
地址:澳門士多鳥拜斯大馬路
開放時間:8am-6pm(逢星期一休息)
費用:單程 MOP 2、來回 MOP 3

就係咁,阿佳同姨甥仔就玩足一日,計埋船飛同搭的士,食咗兩餐飯埋單都係900幾蚊,可惜姨甥仔嘅父母今次唔得閒嚟,如果唔係過埋夜一定仲好玩啦!