Shaun Shaun 5歲喇！

今年Shaun Shaun生日，因為我太忙，沒有上年那麼有準備的安排生日活動（上年與好朋友去主題樂園酒店住了一晚），但我答應幫安排一個小型生日會，幸好最後都做到！雖然這樣，但我其實心裡都有點內疚，因為不能一家人好好的慶祝一番！估唔到，原來唔聲唔聲既爸爸神秘地安排咗兩日一夜既活動！真係好驚喜！好開心！

記得因為爸爸安排得太突然，我有一個工作要改時間添呢！真係多謝那位客人的體諒，令我可以順利同佢哋過咗好開心既兩日一夜！原來爸爸睇到啲網上介紹啲親子好去處，於是BOOK咗沙田凱悅酒店，佢話聽聞果度啲自助餐好好食（真係好為食囉！）同埋附近可以踩單車（阿仔近排好鐘意！）於是就試一試！

好嘢出發喇！好方便！坐港鐵轉東鐵就到！

酒店位於大學站附近，離開大學站，步行兩分鐘就到！

呢個小朋友好開心！急不及待要去攞房！唔好話係佢，我都好期待，唔知間房正唔正呢？

嘩！ 一入到房就係呢個大廳！呢個小朋友真識嘆！九秒九就坐咗係呢度嘆世界！

跟住佢帶我週圍睇又一連串講：「媽媽你睇下呢度⋯你睇下果度⋯你睇下呢度⋯」未去玩都開心成咁！

好好風景既窗台

一個透明既浴室

有張好大好舒服又好好玩（阿仔話）既床！原來呢間酒店啲房好光猛！影相一流！！啱晒我呀！！嘻嘻！

爸爸真細心！知我哋好懶瞓！最後仲叫人加多張床呢！（不過係爸爸自己瞓！XD）

最後佢哋兩個開心大發現！原來廳既窗台係望到房既窗台！阿仔就覺得好攪笑！

究竟一間酒店可以有乜嘢活動玩呢？原來爸爸話呢間酒店有小朋活動，所以BOOK呢間。爸爸BOOK咗個叫做環保小園丁既活動比阿仔，因為佢話平時阿仔好少接觸呢種活動，比佢試下喎！究竟係點架呢？

轉眼間，我哋就去咗間好靚既叫做凱悅兒童營既房度，個導師哥哥已經準備好一切。

話明做園丁，所以由零開始，首先認識乜嘢叫做種子！

然後就要學習乜嘢叫做泥土同佢既用處！

然後學種植，如何將泥土同種子一齊令佢生長？（佢好認真啊！）

做完最機本既嘢，就學下植物名，哥哥仲比咗一啲依家好難見得到既怕醜草比佢接觸，真係好！因為我哋以前屋企留下好多！依家想搵都無，終於可以比Shaun Shaun見到！

話明係環保小園丁！原來仲有任務，就係學移植！因為植物唔夠生長空間，要幫植物搬去另一處大啲既地方。

因為環保關係，哥哥就教佢點樣將植物移植到去一個水樽度。

小朋友活動，當然要比佢做多少少嘢，首先，哥哥就叫佢裝飾下佢個水樽！

似模似樣喎！

整好之後，原來任務係要將外面一棵羅漢菘移植去自己個水樽度。哥哥好細心講介每一個STEP。

佢哋三個好努力咁挖！羅漢菘終於出來了！仲成功移植呢！

最後，當然要落水喇！而哥哥早已係樽蓋開了一個孔，等多餘水份可以流出來！

登登登登！大功告成！！好大的滿足感！

係兒童營外邊原來有個細公園，阿仔一出黎就忍唔住玩！

開心到呢！

開心就係咁簡單！

玩完之後上房休息一陣我哋就去食自助餐！餐廳地方好大！中式西式日式海鮮乜都有！

我哋就梗係食好嘢，但阿仔就主攻甜品！

大滿足之後原來爸爸安排咗個蛋糕！！太完滿了！！

食飽飽就返去沖個靚涼！（我有影到相，但為咗保護返Shaun Shaun我決定唔POST張相，希望大家見諒！）

呢個小朋友瞓足11個鐘，一起身就走咗去廳嘆世界！

第二朝食早餐，今次唔係主攻甜品，今次係主攻包同熱香餅！

食飽飽之後原來係最精彩既活動！踩單車！我哋攞單車時又遇返哥哥！哥哥仲好細心咁幫Shaun Shaun戴頭盔。

出發喇！！原來行三分鐘就到單車徑！

當日好曬！我都好擔心！好彩成條單車徑都好多樹，好舒服！

最開心的活動！

估唔到係酒店附近有條咁正既單車徑，直來直去有少少暗斜，來回10分鐘內攪掂！對於一個五歲小朋友同家長黎講，呢條單車徑直頭PERFECT！最正既係沿途有Shaun Shaun最鐘意既東鐵行駛，佢一路踩單車一路見到開心到不得了！！

好不容易可以一家三口放低一切工作玩兩日一夜！真係好開心好回味！唔知幾時再有機會呢？

最後，我老公好似好醒咁話：「呢次我安排得咁好，應該會有人問你點BOOK架喇！你都係放定條LINK係度喇！你呢排咁忙，我諗你都唔會覆得切！」您，會唔會真係太了解我呢？XD

預約網址：http://www.hongkong.shatin.hyatt.com/zh-Hant/hotel/offers/offer-detail.html?offerId=55662349&icamp=specialOfferId_55662349_landing&isBookable=true