小一入學

小一入學策略篇:直資、私立小學點取捨?

教育

廣告

【小一入學策略篇】有家長問我應替子女報幾多間直資才是足夠,「20間夠未?」我答:「好多家長都替子女報10間以上,但我不贊成報咁多!」以下為我與家長在這議題上的討論,內容有趣和意想不到,值得一讀再讀。

撰文:趙榮德 圖片:新傳媒資料室

趙為本人 家為家長

趙:為乜要報20間咁多?

家:一來要報多幾間給孩子有機會熱身,如果只報兩三間,冇機會熱身,好容易「全軍覆沒」,二來個個都報十幾廿間,如果我只報幾間,好蝕底也!

趙:報考直資私立小學唔係人報我報,而係因應小朋友嘅能力同體力去報,我不贊成報超過十間,實際上你個小朋友只需要去一間就讀,報咁多間無論在安排上,體力、能力上,同策略上都不算明智。

家:點樣唔明智?報幾間冇學校收會好可憐的!

趙:先從安排角度,你報20間,絕大部份會安排在星期六,如果同一星期選同一時間有兩三間,你去邊間考?就算不同時間,同一日有兩個面試,小朋友是否可以應付?從體力能力角度,小朋友未必間間夠程度應付的,你叫佢一日考兩三間力所不逮的小學,一定將佢「打沉」,信心盡失,仲邊有心機考其他面試。

家:明白,咁從策略角度來看又如何?

趙:從策略角度來看,我認為家長最好先替子女報私小,後替子女報直資。原因是在私小註冊後,仍可以參加官津小的「大抽獎」,但直小就唔可以!此其一也,跟住,家長宜根據子女程度報,程度高的可以報女拔萃、嘉諾撒聖心學校私立部、聖保祿學校(小學部)、弘立書院(小學部)、聖方濟各英小、培正小學,九龍塘學校(小學部)、德望小學、宣道小學、真光等,程度一般的可以揀其他,替子女揀不適合程度的小學,好易成為「陪跑份子」,費時失事!

家:直資又應該點樣報?

趙:直資一家會比官津小先放榜,所以報的直資小學宜與官津小學「同level」。舉例:如果你幫佢報咗喇沙小學、華仁小學、聖保祿小學、聖瑪利、聖心、瑪利諾修院學校(小學部),你最好幫佢在直資報聖保羅男女小學、拔萃男書院附屬小學,港大同學會小學。

家:我唔可以報漢華(小學部)、嶺南大學香港同學會小學、聖瑪加利男女英文小學嗎?

趙:當然可以,但你是否會在六月前走去同你孩子註冊呢幾間與津小不同level的直資?反之,如果一早男小拔、港同或聖保羅男女小學收咗你的小朋友,你便可以諗都唔使諗就替子女註冊了,明白未?重點是在直資註了冊,便冇咗官津「大抽獎」的機會!

家:係噃,如果level比官津低的直資一早收咗我個仔,我真係唔知點算好!註冊,又驚失咗level高嘅津小,唔註冊,又好似嘥咗個機會。

趙:用呢個因應子女程度的方面報直資私立,你便可以刪咗一些唔啱子女程度的私立小學,以及一大堆唔同level嘅直資小學,剩餘嘅可以喺五至八間左右。

家:我覺得趙Sir呢個方法幾實用,我試吓將唔啱個仔程度嘅小學,同唔啱level嘅直資刪咗先至報啦!多謝趙Sir指點迷津。

趙榮德

前喇沙書院副校長,曾任社工註冊部紀律委員會會員,香港輔導教師協會榮譽顧問。曾任教育局家庭與學校事宜委員會副主席,熟識香港教育及香港升學制度,同時為香港大學專業進修學院之客席講師,亦為升學指南作家,現有著作多達廿二本。