小一升學兩大疑問 趙Sir分享報讀好學校竅門

小一升學兩大疑問 趙Sir分享報讀好學校竅門

編按:不少家長對小一升學都有不少疑問,例如母校與名校應如何取捨,如何更大機會入讀心儀名校?提供「額外學位」的學校應否報讀?不如讓趙Sir解答大家小一升學報讀學校的兩大常見問題。

上週六作一「小一升學講座策略」的主講嘉賓,現場家長提出不少升學問題,其中兩條是家長時常來信詢問的,在此與各位分享,就快要替子女申報小一家長宜細讀:

撰文︰趙榮德|圖片︰新傳媒資料室|編輯:Don

小一升學 報讀學校竅門

「趙」為本人,「家」為家長:

1. 母校與名校應如何取捨?

家:如果替兒子報自己的母校A會有25分,即是差不多「收硬」,但他卻心儀在另一校排名第一的小學B,但替兒子報該校卻只有15分,我應該替細仔報心儀B小學,還是報有25分嘅A小學?

趙:你的心儀小學在另一校網,在該校網排名第一,加上該校有宗教背景,名氣大,舊生多,用15分來報有九成是「陪跑」,你願意個仔做「陪跑份子」嗎?

家:不願意,但我好想個仔讀到B校呀,有乜方法可以用15分入到B校呢?

趙:B校25分都未必入到,因為好多舊生搶位,幫細仔報,20分已經冇乜機會,15分簡直是緣木求魚,一定徒勞無功。

小一
趙Sir建議,選校時應取向「穩陣」,應考量子女入學計分數,不宜盲目報讀心儀名校。

家:我可以用『1-1-1』搏叩門嗎?

趙:你不是住喺心儀小學校網,所以至多用「1-1-0」報,而用「1-1-0」機會不大。所以我勸你用25分報母校。

家:咁個仔豈不是永遠都冇機會入我的心儀小學?

小一
趙Sir認為家長可以插班方法,在二年級時再報讀心儀學校。

可嘗試以插班方法入讀心儀小學

趙:暫時冇機會,遲啲會有,這樣做總好過俾佢有種香港之大,竟然冇學校肯收我」嘅悽涼感覺。好啦,安心俾個仔讀你母校,便要行第二步,那便是安排佢去你心儀小學於小二插班!

趙:大部份名小學,喺每年五、六月都會喺學校網頁出插班通告,家長只需在網上下載表格,帶齊文件,效俾學校,學校經過一輪篩選,便會邀請適合該校程發申請者,參加筆試及面試,過咗果兩關便OK了。所以,只要你兒子在小一讀個好成續,便大有機會在小二成功插班,讀心儀小學了!

小一
家長們可留意各間學校的插班要求。

2. 提供「額外學位」的學校好唔好?

家:是否報其他校網提供的「額外學位」冇乜用?又「額外學位」提供啲學校是否全部都係「賣剩蔗」?

趙:何謂「冇乜用」同「賣剩蔗」?

家:「冇乜用」即係派唔到,而「賣剩蔗」即係「冇人要』嘅學校!」家長答得直接和清楚。

趙:先答你「額外學位」是否全部都係「賣剩蔗」,答案是:「不是!」部份可能是,不是全部!

小一
趙Sir認為,提供「額外學位」的學校未必等於差學校。

趙:舉例,校網14,有5間小學提供「額外學位」,其中一間是非常受家長歡迎的中華基督教會荃灣小學,咁證明提供「額外學位」並非「賣剩蔗」。不過,如果你喺14校網揀荃灣,被取錄嘅機會又真係極微,因為該校只提供7個學位,比在14校網平均提供50幾個學位細7倍,所以俾你嘅感覺係報都「冇乜用」,實際上,如果夠運,如果你個仔嘅隨機號碼喺頭果7名,就會派到喇!

小一
家長可嘗試報讀「額外學位」的學校。

如何從「額外學位」中找好學校

家:趙Sir,你是說我哋做家長唔好忽視呢啲「額外學位」應在「禾桿」之中找「珍珠」,找到之後,可以將該校放在乙部第一選擇,但我哋點樣從「禾桿」找到「珍珠」呢?

趙: 你可以自己細心研究,我亦在新書「2020-2021小學選校一本通」把全港所有校網小學排了位,家長不妨買一本參考,前列排名的小學便是「珍珠」!

家:多謝趙Sir介紹「額外學位」的填表方法發你的著作,我會買一本參考,希望在「禾桿之中」找到幾粒「珍珠」!

小一
趙Sir建議,家長不妨買一本選校書籍作參考。

小一

趙榮德

前喇沙書院副校長,曾任社工註冊部紀律委員會會員,香港輔導教師協會榮譽顧問。曾任教育局家庭與學校事宜委員會副主席,熟識香港教育及香港升學制度,同時為香港大學專業進修學院之客席講師,亦為升學指南作家,現有著作多達廿二本。

更多精選內容