車婉婉

囝囝逃過一劫 車婉婉:不能自控的流眼涙

育兒

廣告

高齡媽媽車婉婉今年初誕下囝囝BBQ,七個月嚟經常喺社交網站分享佢嘅「高齡日誌」。身為新手媽媽,難免遇到不同程度嘅湊B難關,婉婉都會同大家分享佢嘅苦與樂。日前,婉婉分享自己一場有驚無險嘅意外,仲呼籲其他媽媽要參考佢嘅經驗,多加留意小心,千祈唔好重蹈覆轍。

撰文:Sunday Kiss
圖片:cheyuenyuen1228@Instagram

車婉婉:不能自控的流眼涙

車婉婉撰文講述囝囝噎到嘅經過。佢表示自己一向負責BBQ嘅膳食,亦有同大家分享佢嘗試BLW嘅影片,一直都平安順利。日前,婉婉希望作出新嘗試,試吓俾BBQ拎住香蕉自己食,可惜不幸鬧出一場意外。年紀小小嘅BBQ已經有六隻牙仔,佢咬咗一口大概有一個一蚊硬幣咁大嘅香蕉,點知就卡住喺喉嚨,不能嚥下。婉婉話自己當時好驚,而且屋企只有佢同囝囝兩個人,見到BBQ好辛苦,喊又喊唔出,佢唔知道可以點樣處理,只好努力拍囝囝嘅背脊,希望囝囝可以將香蕉吞下,但都係冇乜幫助。婉婉話佢當時心痛到想喊,全身出晒汗,諗返起都覺得好可怕。

好彩最後有驚無險,BBQ努力將問題解決咗。婉婉事後不斷向囝囝道歉,自己亦一路忍唔住流眼淚。佢最後話:「這個故事教訓我,雖然BBQ係 Big Baby,但是他其實仲好細個仔,好多事情都要好小心, 不可太激進!」,佢亦呼籲各位媽媽要參考佢嘅經驗,多加留意小心,千祈唔好重蹈覆轍!

關鍵詞
名人親子