張頴康大晒甜蜜居家相 ：「女，始終係好嗲嘅！」
廣告
張頴康一向出名係「愛妻號」，不時向太太麥雅緻大講愛的宣言。但人人都話女兒係爸爸上一世嘅情人！老婆為佢帶來兩個小寶貝後，地位會否不保？張頴康早前就大晒同兩個小寶貝嘅甜蜜居家相，仲話：「女，始終係好嗲嘅！」，莫非咁快就要偏心囡囡？一齊嚟睇吓啦！
撰文：Sunday Kiss
圖片：cheungwinghong，angie617@instagram
張頴康：「女，始終係好嗲嘅！」
張頴康日前喺Instagram大晒同囡囡「小豆」同細囝「小花生」嘅居家合照！見囝囝「小花生」好似大帝咁坐喺梳化上面，阿康就雙手搭喺囝囝身上，睇起嚟好似好疲倦咁！另一邊廂，囡囡「小豆」就好似糖黐豆咁，黐到爸爸實一實，成隻樹熊咁箍住爸爸大腿，唔怪得阿康話：「女，始終係好嗲嘅！」！返工幾攰都好，返到屋企見到兩個小寶貝就充滿電啦！
張頴康：呃吓呃吓就80歲
張頴康喺社交網站分享一張2012年嘅結婚相，原來早前正正係佢同Angie結婚五周年正日！佢話因為老婆仲坐緊月，唔方便出街慶祝，只可以同佢簡單「Tea一Tea」。不過，佢就應承老婆下年一定會補返慶祝！佢講笑話：「我決定由今年起，每年都講同一番說話，因為咁樣，佢就會喺我身邊等下一年嘅結婚紀念日！」，因為咁樣一年呃一次，呃吓呃吓就80歲！冧死人咩！
張頴康同麥雅緻喺2012年11月8日喺伯大尼教堂舉行婚禮，當日星光熠熠，場面熱鬧。
經常發愛的宣言
其實張頴康已經唔係第一次同老婆講愛的宣言，之前「小花生」出世一星期，阿康就深情剖白話：「無論以後嘅日子點樣，我都會盡我能力保護我嘅家庭！多謝老婆用自己嘅身體完成咗我呢個願望！我老婆為我嘅付出，坦白講，我都唔知點還，點報答！希望下一世我可以做女人幫返你生BB啦！」
