胡杏兒結婚兩周年！老公再發甜蜜情書
廣告
胡杏兒同老公Phil噚日結婚兩周年，二人啱啱步入人生另一個階段，成為父母亦無減甜蜜，佢哋分別分享婚照慶祝，老公Phil更在社交網站大講愛的宣言，實行愛要說出口。一篇以英文撰寫的情書在短短一天已獲2萬多人激讚，杏兒亦冧爆留言話「Thank you LG」，相信係「老公」嘅英文短寫，真係閃死人！
撰文：Sunday Kiss
相片：hakkaphil，myoliemyolie@Instagram
胡杏兒結婚兩周年
數數手指，原來杏兒同老公阿Phil已經結婚兩周年，今年仲已經升呢做爸爸媽媽，踏入人生新階段。適逢結婚周年，杏兒同老公都有喺Instagram分享婚照慶祝，而阿Phil更加再度投擲閃光彈，向愛妻大講愛的宣言，唔止大讚杏兒係一個好演員，仲話佢係一個好稱職嘅女兒﹑妹妹﹑妻子同朋友，成為媽媽後，佢更加用盡全力去為佢重視嘅一切而努力。
老公Phil仲話佢會好好珍惜同尊重杏兒，又話佢會同老婆一齊跨越難關，一齊追求佢哋理想嘅生活，真係閃死人啦！
其實阿Phil已經唔係第一次向太太公開發愛的宣言，之前杏兒為佢誕下囝囝Brendan，Phil就喺Instagram發千字文感謝太太，果然係廿四孝老公！
阿Phil透過千字文表達自己對太太嘅感激之意。佢話唔少人都會喺生育後將焦點放喺小朋友身上，但其實生完BB嘅太太係更需要大家嘅關懷！
佢仲憶述太太生育當天嘅一點一滴，由生產日子逐漸迫近，望住太太杏兒除咗身理上嘅痛楚，受盡不安同緊張感嘅煎熬；到當天太太穿羊水、趕去醫院，陪太太入產房，望住杏兒感受無止境嘅痛楚，但自己卻愛莫能助，只可以企喺旁邊睇住，阿Phil表示十分無助。
分娩當日杏兒痛到難以承受，但佢都拒絕打無痛分娩針。阿Phil話杏兒為咗可以感受到愛與犧牲，早就有自然分娩嘅決心。呢個時候，阿Phil理解到比起一個就分娩嘅母親，男人嘅力量其實只係微不足道。
經歷完生育嘅痛楚，杏兒仲要迎接第二波挑戰 – 餵母乳。為咗BB嘅健康著想，杏兒選擇餵哺母乳。而餵哺母乳的痛楚往往讓人低估了。阿Phil十分體諒太太，佢明白媽媽要犧牲睡眠時間去餵BB，但同時亦犧牲緊自己身體康復嘅時間。
