謝安琪囡囡8個月大哥哥肉緊攬攬錫錫

Nov 27 2017

謝安琪（Kay）計劃於下年復出，現時當然要珍惜做湊女婆嘅時光，陪囡囡張靖（Karina）渡過最可愛嘅一歲。日前就係張靖八個大嘅大日子，阿Kay當然要分享囡囡嘅得意靚相賀一賀佢！作為家中新寵，哥哥張瞻當然都錫到妹妹燶，經常肉緊「強吻」妹妹！

撰文：Sunday Kiss
圖片：謝安琪 Kay Tse@Facebook

謝安琪囡囡8個月大

謝安琪於今年3月23日剖腹誕下囡囡張靖，為張家再添一員！數數手指，張靖已經8個月大啦！Kay日前就喺Facebook分享囡囡近照，見張靖著住粉紅色兔仔套裝，可愛度爆燈！

阿Kay留言話：「大家好我八個月大喇就黎學識講Hi 同 Bye你願意做我嘅”Hi-Bye Friend”嗎？」，照片一出就引嚟唔少媽媽粉絲留言，佢哋貼上小朋友嘅相片，仲話：「Hello, 我都係8個月大架」似乎真係有心要同張靖做朋友喎！

正所謂「有哥的妹妹像個寶」，哥哥張瞻當然都唔執輸要親親妹妹！阿Kay分享咗一系列「張氏兄妹」嘅合照，見哥哥肉緊地親親妹妹嘅肉肉面珠，好有愛呀！阿Kay留言話：「有哥哥錫我我什麼也不怕」，仲話：「哥哥愛我我愛哥哥」，情深款款咁，唔知係媽媽一廂情願，定真係兄妹情深？

天氣最近轉涼，但見哥哥都仲著緊短袖衫，睇嚟唔係好怕凍啵！阿Kay都話：「有哥哥不怕冷我哥哥是暖男」，睇嚟係語帶相關，話張瞻唔單止係個人肉暖爐，仲係一個好哥哥！

關鍵詞