陳茵媺

陳茵媺分享三招產後修身方法

育兒

廣告

已生下三個子女嘅陳茵媺(Aimee)同大家分享佢產後極速修身嘅秘訣,全靠三樣嘢:做運動、調節飲食同戒食澱粉質,又甜爆同老公陳豪喺情人節時嘅浪漫點滴。

原文:東方新地
圖片來源:新傳媒圖片庫、陳茵媺IG

陳茵媺:要捱過第一個星期

陳茵媺透露生完三個子女後點樣收身:「做運動,帶氧運動同埋重量訓練,仲有調節飲食,淨係食蔬菜同埋肉,食好多肉,戒食澱粉質,幾成功,但係就要好有堅持,因為都幾辛苦!我記得第一次第一個星期冇食澱粉質,我覺得自己想暈,仲要湊住三個,都幾辛苦,但過咗一個星期之後,開始見到好有效,但一定要捱過嗰一個星期先!」

二人世界難

問到佢同陳豪婚後有冇二人世界?陳茵媺直言:「好少、好少,我哋盡量想有,但真係好難,我哋兩個都係好親力親為嘅父母,佢都係好親力親為嘅爸爸,佢可以一個人照顧三個小朋友!當我哋都咁親力親為嘅時候,我哋全部時間都係畀晒小朋友,到佢哋瞓晒覺,應該有二人世界嘅時間,我哋又已經好攰,但我哋都盡量,有時叫奶奶過嚟幫手睇一睇啲小朋友,我哋就會出去睇場戲,或者食餐飯。」

偷煮心形牛扒

提到剛剛過去嘅情人節,陳茵媺甜笑指兩人只係喺屋企度過:「因為嗰晚奶奶唔得閒,我哋又唔放心其他人湊小朋友,所以我哋買咗啲牛扒,氹晒啲小朋友沖埋涼、瞓晒覺,之後我哋兩個玩煮飯仔,係好簡單平常嘅嘢,但對我哋嚟講已經好好、好浪漫!」